TEO SUP XIV: kezekti týrnır bastalý aldynda
Jastardyń ıntellektýaldy damýy aldaǵy ýaqyttaǵy eldiń básekege qabylettiligin arttyrady. Elimizdiń adam kapıtalyn damytýdaǵy basty ustanymdary, qolǵa alǵan bastamalary da jastardyń jańa oılap, zamanaýı bilimderdi ıgerýge jol ashyp keledi. Al osy bastamalardy tereń ıgerý, ony jastardyń ortasynda keńinen taratýda pikirsaıys jobalary aıtarlyqtaı úles qosyp kele jatyr.
Qazir elimizdegi jastardyń ıntellektýaldy damynda joǵary oqý oryndary men túrli qoǵamdyq birlestikter jaǵynan ótkiziletin pikirsaıys oıyndarynyń mańyzy aıryqsha. Mundaı jobalar jastarynyń synı oılaý qabiletin damytyp, kóshbasshylyq qasıetterin jetildirýge aıtarlyqtaı yqpal etip keledi. Bunymen birge osyndaı jobalar arqyly jastar arasynda pikirsaıys mádenıetin nyǵaıyp keledi.
TEO SUP – jastardyń zıatkerlik alańy
Jastardyń ıntellektýaldy damýyna áser etip otyrǵan pikirsaıys jobalary az emes. Degenmen, respýblıkalyq deńgeıde jastardyń zıatkerlik alańyna aınalǵan TEO SUP týrnırin aıryqsha ataýǵa bolady. Bul týrnır bıyl óziniń on tórtinshi kezeńin bastaý aldynda tur.
NARHOZ ýnıversıtetindegi bilikti, alǵabastar jastardyń bastamasymen TEO SUP XIV týrnıri 5-6 sáýir kúnderi ótpek. Oǵan respýblıkanyń túkpir- túkpirinen 80 komanda, 40 tóreshi, 40 gıd jáne 1500-den astam qonaq qatysady dep kútilýde.
Bul týrnırdiń basty ereksheligi Brıtandyq (BPF) ,Amerıkalyq (APF) jáne Lınkoln - Dýglas (LD) formattarynda pikirsaıysqa túsedi. Al kótergen negizgi taqyryby «Modern Kazakh» dep atalady. Bul qazirgi Qazaqstandaǵy áleýmettik ózgerister, ekonomıkalyq damý , jastardyń róli jáne ulttyq biregeılik máselelerin qamtıtyn ózekti taqyryptar tóńireginde pikir almasýǵa múmkindik beredi dep sanaıdy týrnır uıymdastyrýshylar.
TEO SUP XIV- bul pikirsaıysshylar úshin ǵana emes, qoǵamdaǵy belsendi jastardyń damýyna serpin beretin biregeı alań. Joba elimizdegi pikirsaıys mádenıetin nyǵaıtyp qana qoımaı, jańa býyn kóshbasshylaryn qalyptastyrýǵa zor úles qosýda.
· Taqyrypqa oraı:
Erasyl MYRZALIEV, Týrnır qatysýshysy jáne tóreshisi:
AÝQYMY JYL SAIYN KEŃEIİP KELEDİ
2023-2024 jyldary men bul týrnırdiń bas tóreshisi ári uıymdastyrýshysy boldym. Týrnırdi ótkizý barysynda talaı qıyndyqtar men qyzyqty sátterge tap boldyq. Bul jarys jyl saıyn aýqymy keńeıip, joǵary deńgeıde ótedi. 2024 jyly da úlken kólemde uıymdastyrylyp, oǵan Erbolat Muhammedjanov pen basqa da tanymal reperler qatysyp, erekshe atmosfera qalyptastyrdy.
Bıylǵy týrnırge de Erbolat Muhammedjanov, Maqsat Halyq, Rýslan Jeldibaı, Azamat Skakov syndy qurmetti qonaqtar qatysady. Biz jarysty ótkizý úshin jarty jyl buryn daıyndyq jumystaryn bastap, demeýshiler izdep, olarmen kelissózder júrgizemiz. Bul kezeńde keıbir qıyndyqtar kezdeskenimen, uıymdastyrý jumystary júıeli túrde atqarylady. Qatysýshylarǵa aıtarym – árdaıym joǵary deńgeıde daıyndyqpen kelińizder! Biz týrnır barysynda kóptegen jańa tájirıbe jınaqtadyq. Osy sharany uıymdastyrýǵa qoldaý kórsetip jatqan barlyq seriktesterime alǵysymdy bildiremin.