Osy aptada qalamyzda bolǵan mańyzdy jańalyqtarǵa sholý.
Bıyl qalada 87 myńnan astam jańa jumys orny ashylady
Bul týraly habarlaǵan qalalyq jumyspen qamtý jáne áleýmettik baǵdarlamalar basqarmasynyń málimetinshe, 87 226 jańa jumys ornynyń 84%-y nemese 73 293-i turaqty bolady. Jumyspen qamtý sharalary 32 myń adamdy qamtıdy. Olardyń ishinde 10,6 myń adam turaqty jumysqa ornalasady, 8,7 myń adam sýbsıdıalanatyn jumys oryndaryna jiberiledi.
Botanıkalyq baq jazǵy ýaqytqa aýysty
Almatynyń Bas botanıkalyq baǵy 1 sáýirden bastap jazǵy ýaqyt kestesine kóshti. Resmı málimetke sáıkes, botanıkalyq baq kún saıyn 09:00-den 20:00-ge deıin jumys isteıdi, kassa jumysyndaǵy tehnıkalyq úzilis: 15:00–15:30, ár aıdyń birinshi dúısenbisinde sanıtarlyq kún ótedi. Biraq, eger bul kún tehnıkalyq sebeptermen nemese mereke kúnine sáıkes kelse, sanıtarlyq kún keıinge qaldyrylýy múmkin.
Ashyq aspan astyndaǵy murajaı
Uly Jeńistiń mereıtoıyna oraı Almatyda jaýyngerlik tehnıkalardyń ashyq aspan astyndaǵy jańa murajaıy ashylady. Armıa úıiniń aýmaǵynda ornalasatyn murajaı 28 gvardıashy-panfılovshylar saıabaǵyndaǵy memorıaldyq keshenniń bir bóligi. QR Qorǵanys mınıstrliginiń málimetinshe, Keńes Odaǵynyń Batyry general-maıor Ivan Panfılovtyń nemeresi Alýa Baıqadamova basqaratyn Ulttyq áskerı-patrıottyq ortalyq pen Jaýyngerlik dańq murajaıynyń fılıaly ornalasqan Armıa úıinde de qaıta qalpyna keltirý jumystary júrgizilip jatyr. Ǵımarattyń konserttik jáne mármár zaldary, sondaı-aq Jaýyngerlik dańq murajaıy kúrdeli jóndeýden ótýde. Onda ofıserler klýby men balalarǵa arnalǵan áskerı-patrıottyq fılmder túsiretin kınopavılon ashylady.
«...Mal qalǵansha, tal qalsyn»
Almatyda «Taza Qazaqstan» respýblıkalyq baǵdarlamasy jáne «Almaty – bizdiń ortaq úıimiz» qalalyq naýqany aıasynda turǵyndar kópqabatty úılerdiń aýlalary men qoǵamdyq keńistikterdi kógaldandyrý úshin japyraqty aǵashtardyń kóshetterin tegin ala alady. Aksıanyń kóktemgi kezeńine qatysý úshin ótinimderdi qabyldaý 2025 jylǵy 1-11 sáýir aralyǵynda jalǵasady.
Úlkenge – qurmet!
Almatyda «Jaqynyńa járdemdes» aksıasy aıasynda jas eriktiler qalanyń túkpir-túkpirinde aýlalardy aralap, erekshe qamqorlyqty qajet etetin jandarǵa – qarttarǵa, ardagerlerge, múmkindigi shekteýli azamattarǵa kómek kórsetti. Aksıaǵa Almaty qalasynyń Jumyspen qamtý jáne áleýmettik baǵdarlamalar basqarmasynyń qyzmetkerleri de atsalysty. Sońǵy aptada olar 142 jalǵyz turatyn zeınetker men múmkindigi shekteýli adamǵa kómek kórsetti. Onyń ishinde 74 jaǵdaıda aýlalar tazalanyp, usaq jóndeý jumystary men turmystyq sharýalar atqaryldy.
Almatylyq oqýshylar respýblıkalyq olımpıadanyń jeńimpazy atandy
Jaratylystaný-matematıkalyq baǵyttaǵy pánder boıynsha respýblıkalyq olımpıadanyń qorytyndysy jarıalandy. Almaty qalasynyń namysyn qorǵaǵan oqýshylar QR Oqý-aǵartý mınıstrliginiń I, II jáne III dárejeli dıplomdarymen, altyn, kúmis jáne qola medaldarmen, sondaı-aq baǵaly syılyqtarmen marapattaldy. Sonymen qatar, erekshe jetistikteri úshin eki oqýshy QR Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵynyń Qurmet gramotalaryn ıelendi.
Shýdyń boıyna...
Endi «Astana-Almaty» baǵytyndaǵy poıyzdar toqtamaıdy. «Jolaýshylar tasymaly» AQ Astana men Almaty qalalary arasynda qatynaıtyn № 4/3 jáne № 10/9 «Talgo» poıyzdarynyń qozǵalys baǵytyna ózgerister engizildi. Sáýir aıynan bastap bul poıyzdar Shý stansıasyna toqtamaı, tikeleı marshrýtpen qatynaıtyn bolady.
Astana men Shý arasyndaǵy poıyzdar:
№ 72/71 «Astana — Shymkent»
№ 86/85 «Astana — Shymkent»
Shý men Almaty arasyndaǵy poıyzdar:
№ ½ «Tashkent — Almaty»
№ 11/12 «Shymkent — Almaty»
№ 25/26 «Shymkent — Almaty»
№ 27/28 «Oral — Almaty»
«Jas kelse – iske...»
Almatyda jastar saıasaty basqarmasynyń qoldaýymen iske asyrylyp jatqan «Jastarǵa arnalǵan jalpyqalalyq mansap kúnderi» aýqymdy jobasy bastaldy. Bastamanyń maqsaty - jas mamandarǵa jumys tabýǵa, kásibı daǵdylaryn damytýǵa jáne áleýetti jumys berýshilermen baılanys ornatýǵa kómektesý. Bul týraly óńirlik komýnıkasıalar qyzmetiniń baspasóz konferensıasynda qalalyq mansap ortalyǵynyń jumys berýshilermen jáne áriptestermen jumys bóliminiń basshysy Aqarys Tórebekov habarlady.
Abattanǵan aıaldamalar
Almaty ákimi Erbolat Dosaevtyń Áýezov aýdanynyń turǵyndarymen kezdesýinde aıtýynsha, Almatyda eki jyl ishinde barlyq aıaldama keshenderi jańarady. Búgingi tańda qalada pavılondary bar 1900 aıaldama bar, onyń 795-i ınvestorlardyń qarajaty esebinen ornatylyp, jarnamalyq konstrýksıalarmen jabdyqtalǵan. Qalǵandary búdjet esebinen ornatylyp, modýldik metal jaqtaý túrinde oryndaldy.
Mopedterdi tirkeý naýqany aıaqtalyp keledi
«Mopedterdi tirkeý formaldylyq emes, tártip pen qaýipsizdikke baǵyttalǵan mańyzdy shara. Zań qozǵalystyń barlyq qatysýshylary úshin birdeı, al ony saqtaý árkimniń qaýipsizdiginiń kepili», - dedi Almaty qalasy PD ákimshilik polısıa basqarmasynyń prosesıngtik ortalyǵynyń bastyǵy, polısıa podpolkovnıgi Aıdyn Merkimbaev.
N. Sas atyndaǵy teatr jóndeýden ótedi
Almaty ákimi Erbolat Dosaev teatrdy rekonstrýksıalaý qala úshin mańyzdy joba ekenin atap ótti. Qurylys jumystary aıaqtalǵannan keıin teatr vızıt kartochkalardyń biri retinde qala turǵyndaryn tartatyn mádenı orynǵa aınalady.
Teatr ǵımaraty 1980 jyldary salynǵan jáne eshqashan kúrdeli jóndeý júrgizilmegen. Rekonstrýksıalaý 2026 jyldyń maýsymynda aıaqtalady dep josparlanǵan.
Balaly bolǵysy kelgen almatylyqtarǵa 673 mln teńge bólindi
Áleýmettik medısınalyq saqtandyrý qory Almaty fılıalynyń málimetinshe, bul qarajattyń arqasynda MÁMS sheńberinde pregravıdaldyq daıyndyq kezinde konsýltasıalyq-dıagnostıkalyq kómek qoljetimdi bolady. Endi erli-zaıyptylar tirkelgen jeri boıynsha óz emhanalaryna júginip, júktilikke daıyndyq kezinde dárigerlerdiń tolyq keńesin jáne qajetti dıagnostıkalyq qyzmetterdi jan-jaqty alady.