Prezıdent jastarmen jumysqa erekshe toqtaldy. «Assambleıa jastary» uıymy, Stýdenttik Assambleıa, Jas ǵalymdar klýby jáne «Jańa tolqyn» jobalary myńdaǵan jas azamatty el bolashaǵyna jaýapkershilikpen qaraıtyn, birlik pen yntymaqty qadirleıtin tulǵa retinde tárbıeleýde.
"Bul qurylymdar myńdaǵan jastarymyz úshin birlik pen otanshyldyq mektebine aınaldy. Olar ‘Adal azamat’ qaǵıdatyn nasıhattaýǵa eleýli úles qosyp jatyr", – dep atap ótti Toqaev.
Qasym-Jomart Toqaev QHA músheleriniń kúndelikti tynymsyz eńbegin joǵary baǵalady. Onyń aıtýynsha, bul jumys birden kózge kórinbeýi múmkin, biraq strategıalyq turǵydan el bolashaǵy úshin asa mańyzdy.
"QHA músheleri kún saıyn kózge kórinbeıtin, birden nátıje bermeıtin, alaıda uzaq merzimdi, strategıalyq turǵydan tıimdi, aýqymdy jumys júrgizedi", – dedi Prezıdent.
Ótken jyly Assambleıa elimizdiń barlyq óńirinde 15 myńnan astam is-shara uıymdastyryp, oǵan 1 mıllıonǵa jýyq adam qatysqan.