QR Eńbek sińirgen qaıratkeri Murat Qusaıynov: bul kúndi uzaq kúttim
QR Eńbek sińirgen qaıretkeri Murat Qusaıynov saılaýǵa baryp, daýys berdi, dep habarlaıdy Almaty-akshamy.kz.
Ol jastar Ádiletti Qazaqstanda ómir súrse degen tilegin bildirdi.
«Kóńil-kúıim tamasha! Tabıǵat ta búgin bizge qoldaý kórsetip, kún jarqyrap shyǵyp tur. Men bul kúndi uzaq kúttim. İshteı bir saıası ózgeris bolý kerek sıaqty bolyp turatyn. Mine, qazir ǵana №262 saılaý ýchaskesine otbasymmen kelip, daýys berdik. Durys tańdaý jasadym. Kimge daýys bergenim ózime belgili. Jalpy, men elimizde oń ózgerister bolsa deımin. Elimiz ál-aýqatty, baqýatty el bolsa deımin. Táńirdiń bizge bergen baılyǵy ózimizdiń halqymyzǵa, bolashaǵymyzǵa buıyrsa deımin. Sondyqtan búgingi saılaýdan úlken úmit kútemin. Osyndaıda aýzy dýaly bir azamattyń «Bizdiń Qazaqstannan artyq, elimizde, jerimiz de joq. Basty baılyǵymyz Qazaqstan» dep aıtqan sózi oıyma oralyp tur. Sondyqtan Qazaqstannyń árbir azamaty óz eliniń baıandy, turaqty bolýyna úlesin qosýy kerek. Jastarymyz, nemerelerimiz Ádiletti Qazaqstanda ómir súrse degen armanym bar. Qazirgi geosaıası jaǵdaı ýshyǵyp turǵan kezeńde, bizdiń elimizde, shúkirshilik, tynyshtyq bolyp tur. Jalpy, qazaq halqy qonaqjaı, darhan peıildi ǵoı. Osynaý tynysh, beıbit ómir sol peıilinen, qasıetinen shyǵar deımin. Árbir adam bolashaqtan úmit kútedi. Bir kúnnen bir kún jaqsara túsedi. Saılaýdan keıingi kúnimiz budan da jaqsy bolsa deımin», - dedi ol.