Biz tyǵyryqtan shyǵar joldyń sańylaýy da kórinbeıtin qıyn kúnderden qaqtyǵys pen qantógiske urynbaı aman shyǵyp, eshkimge esemizdi jibermeı, jańa sıpattaǵy Qazaq memleketin qurdyq. Búgingi jáne bolashaq urpaq muny árdaıym bilip otyrýy kerek.
Qasym-Jomart TOQAEV.
2018 JYLDYŃ BASTY OQIǴALARY
- «Prezıdenttiń bes áleýmettik bastamasy».
- Qazaqstan Respýblıkasy Prezıdentiniń Ulttyq dombyra kúni týraly (2018 jylǵy 12 maýsym, № 699) Jarlyǵy
- El astanasynyń 20 jyldyǵy
- «Astana» halyqaralyq qarjy ortalyǵynyń saltanatty ashylý rásimi.
- Besinshi Kaspıı samıti.
QAZAQTYŃ JANY MEN RÝHY
2018 jylǵy 1 shilde kúni elimizde tuńǵysh ret Ulttyq dombyra kúni toılandy. Memleket basshysy elorda turǵyndary men qonaqtary aldynda sóılegen sózinde barsha qazaqstandyqtardy Ulttyq dombyra kúnimen quttyqtap, bul mýzykalyq aspap qazaq halqynyń mádenıeti men tarıhynda aıryqsha oryn alatynyn aıtty.
– Jaqynda meniń Jarlyǵymmen shildeniń birinshi jeksenbisi Ulttyq dombyra kúni dep jarıalanǵanyn bilesizder. Búgin bul merekeni elimizdiń barlyq óńiri atap ótýde. Dombyra – qazaqtyń jany, rýhy, tarıhy, salt-dástúri, búkil bitim-bolmysy, – dedi Qazaqstan Prezıdenti.
Búginde dombyra qazaqtyń brendi bolyp sanalady. Dombyra men kúı IýNESKO sheshimimen adamzattyń materıaldyq emes mádenı muralarynyń tizimine engen. «Qazaq Eli» alańynda ótken is-shara barysynda dırıjer Aıtqalı Jaıymovtyń jetekshiligimen 2 myńnan astam ónerpaz bir orkestr retinde dombyramen qazaqtyń belgili kúılerin oryndady.
12 tamyzda Aqtaýda Besinshi Kaspıı samıtiniń plenarlyq otyrysy ótip, Kaspıı teńiziniń quqyqtyq mártebesin bekitken tarıhı qujat qabyldandy. Bes memleket kóshbasshylarynyń bátýalastyq jáne barlyq taraptardyń múddelerin ózara esepke alý negizinde tujyrymdalǵan bazalyq halyqaralyq shartqa – Kaspıı teńiziniń quqyqtyq mártebesi týraly konvensıaǵa qol qoıýy joǵary deńgeıdegi kezdesýdiń basty oqıǵasy boldy.
2018 jyldyń qańtar aıynan Qazaqstan BUU-nyń Qaýipsizdik Keńesine tóraǵalyqqa kiristi. Saıası arenadaǵy salıqaly kelissózder nátıjesinde Kaspııdiń quqyqtyq mártebesi bekitilip, Elorda tórinde Álemdik jáne dástúrli dinder kóshbasshylarynyń sezi tabysty ótti. Qazaqstan Prezıdenti Nursultan Nazarbaevtyń qańtardaǵy AQSH-qa saparyna aıryqsha mańyz bergenimiz jón. Elbasy Vashıngtonǵa saparynda Donald Tramppen kezdesti. Donald Tramp AQSH tarapy Qazaqstandy Ortalyq Azıa óńirindegi bolashaǵy zor, strategıalyq áriptes dep esepteıtindigin, sonymen birge óńirlik beıbitshilik pen qaýipsizdiktiń sheshýshi faktory retinde baǵalaıtynyn jetkizdi. Al, Nú-Iorkke saparynda Elbasy Qazaqstannyń BUU Qaýipsizdik Keńesine tóraǵalyǵy aıasynda atalǵan keńestiń «Jappaı qyryp-joıatyn qarýdy taratpaý: sharalar men senim» otyrysyn ótkizdi. AQSH-qa resmı sapar aıasynda avıasıa jáne ǵaryshtyq zertteýler, munaı hımıasy jáne aýyl sharýashylyǵy, sondaı-aq ınfraqurylymdy damytý salasyndaǵy jobalardy júzege asyrýǵa baǵyttalǵan 7 mıllıard dollarǵa jýyq qarjy kólemindegi ınvestısıa jáne saýda-ekonomıkalyq yntymaqtastyq týraly 20-dan astam komersıalyq qujatqa qol qoıylyp, 3 úkimetaralyq kelisim jasaldy!
2018 jyldyń qańtar aıynda Qazaqstan toǵyz jyldan astam ýaqyt ishinde alǵash ret Qaýipsizdik keńesiniń Aýǵanstanǵa birinshi mısıasyn uıymdastyrdy. «Halyqaralyq beıbitshilik pen qaýipsizdikti qoldaý: qaýipsizdik pen damýdyń ózara táýeldilik úlgisi retinde Aýǵanstan men Ortalyq Azıadaǵy óńirlik áriptestikti qurý» taqyrybynda mınıstrlik deńgeıindegi pikirtalastar ótkizdi. Aıta keterligi, Lıvandaǵy Birikken Ulttar Uıymynyń Ýaqytsha kúshteri quramynda qyzmet etetin «BUU kógildir kaskasy» qataryn Qazaqstannan barǵan 120 bitimgerdiń tolyqtyrýy da elimizdiń syrtqy saıasattaǵy jetistigi deýge bolady.
2018 jyldyń 12 tamyzynda Aqtaýda 5-shi Kaspıı samıti ótip, oǵan teńiz jaǵalaýyndaǵy Qazaqstan, Ázerbaıjan, Iran, Reseı jáne Túrikmenstan elderiniń prezıdentteri qatysty. Dál osy alqaly jıyn barysynda 25 jyldan beri kúrmeýi kúrdeli problemaǵa aınalyp kelgen Kaspıı teńiziniń quqyqtyq mártebesi aıqyndaldy. Qujatta Kaspııdi beıbitshilik pen tatý kórshiliktiń ári dostyqtyń aımaǵyna aınaldyrý, teńizdi beıbit maqsatta paıdalaný, elderdiń aýmaqtyq tutastyǵyna qurmetpen qaraý, Kaspıı taraptaryna jatpaıtyn qarýly kúshterdi boldyrmaý eskerilgen. Sonymen qatar túrli rejimder arqyly akvatorıalardy aımaqtarǵa bólý boıynsha konsensýske qol jetkizildi. Terıtorıalyq sýlar 20-15 teńiz mıli enimen bekitildi. Árbir memleket óziniń teńiz túbindegi sektorynyń shekarasynda jer qoınaýyn paıdalanýda táýelsiz quqyǵyn júzege asyrady. Teńiz túbimen magıstarldy qubyrlardy, kabeldi tartý múmkindigi de eskerilgen. Bul rette ekologıalyq talaptar saqtalýy tıis.
Kaspıı konvensıasynyń qabyldanýy, sarapshylar aıtqandaı, Kaspıı teńiziniń jaǵasyndaǵy bes memlekettiń 25 jyldyq kelissózine núkte qoıdy. Osynaý tarıhı qujat - Qazaqstannyń keleshektegi býyny úshin asa aýqymdy mura bolyp qalady dep aýyz toltyryp aıtýǵa bolady. Óıtkeni, bul qujat eń aldymen Qazaqstannyń halyqaralyq shekarasyn bekemdeýge núkte qoıylýymen qundy edi.
Nur-Sultan tórinde osymen altynshy ret ótken Álemdik jáne dástúrli dinder kóshbasshylarynyń sezine barlyq álemdik jáne dástúrli dinderdiń ókilderi, sonymen qatar bedeldi dinı lıderler, saıası qaıratkerler men halyqaralyq uıym ókilderinen quralǵan 46 elden 82 delegasıa qatysty.
16 qańtar
Amerıka Qurama Shtattarynda AQSH Prezıdenti Donald Tramp pen Qazaqstan Prezıdenti Nursultan Nazarbaevtyń kezdesýi ótti. Bul sapar Qazaqstan men AQSH arasyndaǵy tyǵyz komersıalyq jáne saýda baılanystaryn nyǵaıtyp, jańa jumys oryndaryn ashýǵa jáne eki el ekonomıkasynyń ósimin arttyrýǵa múmkindik berdi.
Elbasy bul sharalar Qazaqstannyń 2050 jylǵa qaraı álemniń ozyq damyǵan otyz jahandyq ekonomıkasynyń qataryna kirýi úshin mańyzdy bolǵanyn atap ótti. Sapar barysynda birqatar komersıalyq kelisim-sharttar men qujattarǵa, onyń ishinde «Boeing», «GE Transportation», «Eır Astana», «Qazaqstan temirjoly» jáne «Skat» kompanıalarynyń 2,5 mıllıard AQSH dollarynan astam kólemde amerıkalyq ónimder men qyzmetterdi satyp alý jónindegi jańa kelisimderine qol qoıyldy.
Bizdiń dáıekteme:
Kezdesýde Elbasy keltirgen derekterge súıensek, Amerıka Qazaqstan ekonomıkasyna salynǵan tikeleı ınvestısıalardyń kólemi boıynsha ekinshi orynda. Táýelsizdik jyldary ishinde amerıkalyq kompanıalar tarapynan Qazaqstanǵa 50 mıllıard dollardan astam ınvestısıa quıyldy. Ótken jyly eki el arasyndaǵy taýar aınalymy 2 mıllıard dollarǵa jetti.
AQSH-tyń isker toptar ókilderi Qazaqstanmen ekonomıkalyq yntymaqtastyqty keńeıtýge zor qyzyǵýshylyq tanytty.Memleket basshysynyń resmı sapary aıasynda avıasıa jáne ǵaryshtyq zertteýler, munaı hımıasy jáne aýyl sharýashylyǵy, sondaı-aq ınfraqurylymdy damytý salasyndaǵy jobalardy júzege asyrýǵa baǵyttalǵan 7 mıllıard dollarǵa jýyq qarjy kólemindegi ınvestısıa jáne saýda-ekonomıkalyq yntymaqtastyq týraly 20-dan astam komersıalyq qujatqa qol qoıyldy. Budan bólek, sapar barysynda 3 úkimetaralyq kelisim jasaldy.
18 qańtar
Nursultan Nazarbaevtyń tóraǵalyǵymen Birikken Ulttar Uıymy Qaýipsizdik Keńesiniń «Jappaı qyryp-joıatyn qarýdy taratpaý: senim sharalary» atty otyrysy ótti. Onda Memleket basshysy Keńes múshelerine arnap málimdeme jasady.
– Biz Qazaqstannyń Birikken Ulttar Uıymy Qaýipsizdik Keńesiniń turaqty emes múshesi bolyp saılanýyn jáne búgingi tóraǵalyq qyzmetimizdi álemdik qoǵamdastyqtyń elimizge jáne onyń beıbitshil saıasatyna degen senimi dep bilemiz. Bul mártebeli qyzmettegi Ortalyq Azıanyń birinshi memleketi bola otyryp, biz Dúnıejúzilik uıymnyń bul mańyzdy organyndaǵy óńir halyqtarynyń «únine» aınaldyq, – dedi Elbasy.
20 aqpan
«Qazaq tili álipbıin kırıllısadan latyn grafıkasyna kóshirý týraly» 2017 jylǵy 26 qazandaǵy №569 Jarlyqqa ózgeris engizý týraly Qazaqstan Respýblıkasy Prezıdentiniń jańa Jarlyǵy jarıalandy.
5 naýryz
Memleket basshysy Qazaqstan Respýblıkasynyń Parlamenti palatalarynyń birlesken otyrysyna qatysty
Elbasy birlesken otyrys barysynda halyqqa arnalǵan «Prezıdenttiń bes áleýmettik bastamasy» atty úndeýin jarıalady. Onda árbir otbasyna baspana alýdyń jańa múmkindikterin berý, jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý, joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý, shaǵyn nesıe kólemin kóbeıtý, sondaı-aq eldi gazben qamtamasyz etý isin jalǵastyrý jónindegi bastamalar qamtylǵan.
28 sáýir
«Bes áleýmettik bastama – qoǵamnyń áleýmettik birliginiń tuǵyry» . Qazaqstan halqy Assambleıasynyń XXVİ sesıasynyń kún tártibindegi negizgi másele osylaı ataldy. «Biz syrtqy jaǵdaılarǵa qaramastan, bes jańa jobany júzege asyrýdy bastadyq»,– dedi Nursultan Nazarbaev. Memleket basshysy «Bes áleýmettik bastamany» iske asyrýdyń negizgi úsh faktoryna toqtalyp, elimizdiń áleýmettik saıasatynyń basty erekshelikterin atap ótti.
23 mamyr
Nur-Sultanda V halyqaralyq «KADEX-2018» qarý-jaraq jáne áskerı-tehnıkalyq múlik kórmesiniń ashylý rásimi boldy.
Memleket basshysy rásimge qatysýshylarǵa arnalǵan sózinde «KADEX-2018» kórmesi aıasynda «Qazaqstandaǵy ǵarysh kúnderi» atty halyqaralyq forýmnyń ótýi bıylǵy sharanyń basty ereksheligi ekenin atap ótti.
Qazaqstan Prezıdenti «KADEX-2018» kórmesiniń qarý-jaraq pen aqparattyq qaýipsizdikti qamtamasyz etý salasyndaǵy álemdik mańyzy bar jıynǵa aınalǵanyn aıtty.
– Kórmege álemniń 28 elinen 318 kompanıa qatysyp otyr. Kórme qonaqtary qorǵanys ónerkásibi kesheni jáne ǵarysh salasyndaǵy sońǵy jetistiktermen tanysa alady. Bul joly elektrondyq júıe men baılanys jáne qarý-jaraqty basqarý júıesin damytýǵa aıryqsha mán berildi, – dedi Nursultan Nazarbaev.
6 maýsym
Qazaqstan Prezıdenti Qytaı Halyq Respýblıkasyna memlekettik saparmen baryp, QHR Tóraǵasy Sı Szınpınmen keńeıtilgen quramda kezdesý ótkizdi.
– Osy ýaqyt ishinde biz jalpy somasy 67 mıllıard dollar kólemindegi eki jaqty 127 qujatqa qol qoıdyq. Bizge osy dıalogty jalǵastyrý qajet. Byltyr ózara saýda kólemi 11 mıllıard dollarǵa jýyqtady. Bul jerdegi ósim 30 paıyzdan astam. Eki jaqty qatynastarymyzdy ilgeriletý úshin bizdiń budan da zor áleýetimiz bar, – dedi Nursultan Nazarbaev.
10 maýsym
Shanhaı yntymaqtastyq uıymyna múshe memleketter basshylary keńesiniń keńeıtilgen quramdaǵy otyrysy boldy.
Oǵan qatysýshylar jańa jaǵdaıǵa baılanysty keleshekte atqarylatyn ózara is-qımyl máselelerin talqylap, halyqaralyq jáne óńirlik kún tártibindegi ózekti máseleler jóninde pikir almasty. Úndistan men Pákistan samıt jumysyna tolyq quqyly múshe retinde birinshi ret qatysty.
29 maýsym
Memleket basshysy Elorda kúni qarsańynda dástúrli túrde qalanyń «jasyl beldeýin» tikushaqpen aralap kórdi. Damý barysymen tanysty, onyń qazirgi jaǵdaıy men «jasyl beldeýdi» ári qaraı damytý máseleleri jóninde keńes ótkizdi. El astanasynyń jasyl aımaǵyna aǵash otyrǵyzyp, tabıǵatqa 150 qyrǵaýyl ushyrý sharasyna qatysty. Elbasy «jasyl beldeý» elordany shańdy daýyl men qarly borannan qorǵaý úshin tabıǵı tosqaýyl retinde jasalǵanyn eske saldy. Qazaqstan Prezıdenti 20 jyl ishinde Astana tóńireginde tabıǵat pen qala kelbeti úndestik tapqan biregeı ekojúıe qalyptasqanyn atap ótti.
– Qala ishindegi «jasyl beldeýdiń» aýmaǵy shamamen 15 myń gektardy qamtıdy. Elordanyń úlgisimen búkil Qazaqstanda aǵash otyrǵyzý qarqynyn arttyrǵan jón, – dedi Nursultan Nazarbaev.
29 maýsym
Memleket basshysy WBC, WBA (Super), IBO tujyrymdary boıynsha kásipqoılar arasyndaǵy bokstan álem chempıony Gennadıı Golovkınmen kezdesti.
Nursultan Nazarbaev Gennadıı Golovkınniń Qazaqstan sportyn tanytýdaǵy jáne elimizdiń halyqaralyq ımıjin arttyrýdaǵy zor rólin atap ótti.
– Sen óz salmaǵyńda eshkimge des bermediń, birde-bir jeńilisi joq saǵan eń úzdik nokaýter boksshy degen ataq berildi. Bul – zor jetistik ári bizdiń sportymyz ben búkil Qazaqstandy nasıhattaýdyń jarqyn mysaly. Biz seniń erik-jigerińdi joǵary baǵalaımyz,– degen Memleket basshysy Gennadıı Golovkındi «Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev» ordenimen marapattady.
5 shilde
«Astana» halyqaralyq qarjy ortalyǵynyń saltanatty ashylý rásimi bolyp ótti. «Qazaqstan – ǵasyrlar toǵysynda keń dalada ásem astana turǵyzǵan álemdegi jalǵyz memleket. «Astana» halyqaralyq qarjy ortalyǵy – táýelsiz Qazaqstan tarıhynyń jańa kezeńiniń bastaýy», – dedi Nursultan Nazarbaev.
Qarjy ortalyǵynyń qurylýy halyqaralyq bıznes qoǵamdastyǵynyń bizdiń elge degen seniminiń jáne tabysty damý jolymyzǵa bergen joǵary baǵasynyń belgisi sanalady.
6 shilde
El astanasynyń 20 jyldyǵyna arnalǵan saltanatty qabyldaý is-sharasy ótti.Qazaqstannyń qazirgi elordasy kóne Bozoq qalashyǵynan bastaý alady. 20 jyl ishinde halqy 4 ese ósip, bir mıllıonǵa jetken jańa astana jahandyq ıntegrasıanyń, qaýipsizdik pen bitimgershiliktiń ortalyǵyna aınaldy. Osy 20 jyl ishinde Elordaǵa 22 monarh, 180 prezıdent, 109 úkimet basshylary jáne 114 halyqaralyq uıym basshylary kelgen eken.
24 tamyz
Halyqaralyq Araldy qutqarý qorynyń quryltaıshy memleketteri basshylarynyń shaǵyn jáne keńeıtilgen quramdaǵy otyrystary ótti.
– Araldy qutqarý qory halyqaralyq deńgeıde belsendi jumys júrgizýde. Sonyń arqasynda Aral óńirine álemdik qoǵamdastyq pen halyqaralyq qarjy ınstıtýttary tarapynan aıtarlyqtaı kómek kórsetilip keledi. Bizdiń birlese jumys istegenimizdiń arqasynda bul qor Birikken Ulttar Uıymynyń Bas Assambleıasy janyndaǵy baqylaýshy mártebesine ıe boldy, – dedi Nursultan Nazarbaev. Elbasy atap ótkendeı, «Syrdarıa ózeniniń arnasyn retteý jáne Aral teńiziniń soltústik bóligin saqtaý» aýqymdy jobasyn júzege asyrý nátıjesinde, Syrdarıa ózeniniń tómengi salasyndaǵy ekologıalyq jaǵdaı eleýli túrde jaqsarǵan. Soltústik Aral qalpyna kelip, onda sýdyń deńgeıi 2010 jyldan beri turaqty túrde 42 metrlik kórsetkishti ustap tur. Sýdyń tuzdylyǵy tómendep, teńizdiń qorektik bazasy, ósimdikter men janýarlar dúnıesi qalpyna kelýde. Aral teńiziniń qazaqstandyq bóligindegi mıkroklımat pen áleýmettik jaǵdaı jaqsardy. Balyq óńdeıtin birqatar kásiporyn ashylyp, olardyń ónimi shetelge eksporttalýda.
29 tamyz
Nur-Sultanda «Beıbitshilik qabyrǵasy» monýmentiniń ashylý rásimi ótti. Memleket basshysy 29 tamyz Qazaqstannyń jańa tarıhyndaǵy aıryqsha kún sanalatynyn aıtty. 1949 jyly dál osy kúni Semeı polıgonynda ıadrolyq qarý alǵash ret synalǵan bolatyn. Qyryq jyl boıǵy 450-den astam jarylystyń saldarynan mıllıondaǵan adam zardap shekti. Prezıdenttiń Jarlyǵymen 1991 jylǵy 29 tamyzda Semeı polıgony jabyldy. «Búgin, Iadrolyq synaqtarǵa qarsy halyqaralyq is-qımyl kúni, biz elordamyzda jańa mańyzdy nysandy – «Beıbitshilik qabyrǵasy» monýmentin ashyp otyrmyz. Bul monýmenttiń boı kóterýi – tarıh sabaqtarynan tálim alyp, ony umytpaýǵa jáne elimizdegi beıbitshilik pen yntymaqty baǵalaýǵa úndeıdi. «Beıbitshilik qabyrǵasy» – beıbit ómirdiń qundylyǵyn dáripteýdi jáne ótken tarıhymyzdyń qasiretti kezeńderin qaıtalamaýdy zamandastarymyzdyń esine salyp turatyn nysan bolmaq. «Beıbitshilikti saqtańdar!» deımiz. Bul – jer betindegi árbir adamnyń boıynda bolýǵa tıis eń basty qundylyq», – dedi Elbasy.
11 qyrkúıek
Qazaqstan Prezıdenti Túrkistan qalasyn damytý jóninde keńes ótkizdi. Jıyn barysynda Memleket basshysyna Túrkistan qalasyn damytýdyń jospary men perspektıvalary jóninde málimdelip, oblys ortalyǵyn Shymkent qalasynan Túrkistan qalasyna kóshirýge qatysty tapsyrmalardyń oryndalýy týraly baıandaldy.
10 qazan
Qazaqstan Prezıdenti Álemdik jáne dástúrli dinder kóshbasshylarynyń VI seziniń plenarlyq otyrysyna qatysyp, sóz sóıledi. «Bizdiń elordamyz bıyl óziniń jıyrma jyldyǵyn atap ótýde. Álemdik jáne dástúrli dinder kóshbasshylarynyń sezi elordamyzdyń boıtumaryna aınaldy deýge bolady. Sebebi, biz Astanany barlyq mádenıetter úshin ashyq ári bolashaqtyń eýrazıalyq qalasy retinde saldyq», – dedi Qazaqstan Prezıdenti.
20 qazan
Nursultan Nazarbaev Reseı Federasıasynyń Prezıdenti Vladımır Pýtınmen jáne Ózbekstan Respýblıkasynyń Prezıdenti Shavkat Mırzıóevpen kezdesti. Memleketter basshylary beıresmı kezdesý barysynda elder arasyndaǵy, sonyń ishinde saýda-ekonomıkalyq jáne mádenı-gýmanıtarlyq salalardaǵy yntymaqtastyqtyń ózekti máselelerin talqylady.
6 qarasha
«Astana Hab» İT-startaptar halyqaralyq tehnologıalyq parkiniń resmı ashylý rásimi boldy.
Qazaqstan Prezıdenti elimiz ben qoǵamymyzdy odan ári damytý isinde sıfrlandyrý úderisiniń máni zor ekenin, «Astana Hab» İT-startaptar halyqaralyq tehnologıalyq parki qazirgi ınovasıalyq ekojúıeniń ózegine aınalýǵa tıis ekenin aıtty.
21 qarasha
Memleket basshysynyń «Uly dalanyń jeti qyry» atty baǵdarlamalyq maqalasy jaryq kórdi. Ol Elbasynyń buǵan deıin jarıalanǵan «Bolashaqqa baǵdar: rýhanı jańǵyrý» atty baǵdarlamalyq maqalasymen úndes, úıles biregeı joba bolyp tabylady.«Rýhanı jańǵyrý» jalpyulttyq baǵdarlamasynyń jańa komponentteri ata-babalarymyzdyń kóp ǵasyrlyq murasynyń sıfrlyq órkenıet jaǵdaıynda túsinikti ári suranysqa ıe bolýyn qamtamasyz ete otyryp, ony jańǵyrtýǵa múmkindik beredi.
JYL TÚIİNİ
Elimizde 2018 jyly ornyqty damýǵa jol ashatyn memlekettik baǵdarlamalar men tyń bastamalar júzege asyryla bastady. El ekonomıkasyn jańǵyrtýǵa baǵyttalǵan sıfrlandyrý prosesi qarqyndy júrgizildi. Halyqtyń ál-aýqatyn jaqsartýdy kózdeıtin «Bes áleýmettik bastama» elimizdiń damýyna oń serpin berdi. Elbasynyń bul jylǵy qazan aıyndaǵy Joldaýy azamattarymyzdyń turmys sapasyn arttyrý máselesine arnaldy. Jahandyq básekege qabilettilikti qamtamasyz etetin ekonomıkalyq ósimniń ózgeshe modelin qurýǵa baǵdar jasaldy.
2018 jyly ekonomıkany júıeli ındýstrıalandyrý óńdeý ónerkásibiniń úlesin aıtarlyqtaı arttyrýǵa septigin tıgizdi. Kólik-logıstıka ınfraqurylymyna tartylǵan ınvestısıanyń arqasynda Qazaqstan qurlyqtyq mańyzy bar tranzıttik habqa aınaldy. Egemen Qazaqstannyń basty jetistikteriniń biri – halqymyzdyń sany 18 mıllıonnan asyp, turǵyndardyń ortasha ómir súrý uzaqtyǵy 72,5 jasqa jetti.
Qazaqstan Prezıdenti 2018 jyldy qorytyndylaı kele elimizdiń syrtqy saıasatta da, jańǵyrý baǵdarlamalaryn iske asyrý aıasynda da qol jetkizgen basty jetistikterine toqtaldy.
2018-shi jyl egemen elimiz úshin berekeli ári merekeli jyl boldy. Jyl basynda Tórtinshi ónerkásiptik revolúsıa jaǵdaıyndaǵy damýdyń jańa múmkindikteri aıqyndaldy. Kúlli túrki jurty qasterleıtin Túrkistan qalasy qaıta túlep, oblys ortalyǵy mártebesin aldy.Shyraıly Shymkenttiń halqy bir mıllıonnan asyp, respýblıkalyq mańyzy bar qala atandy. Halyqaralyq saıasatta jáne ekonomıkada mańyzy zor sharalar júzege asyryldy.Qazaqstan Birikken Ulttar Uıymy Qaýipsizdik keńesindegi eki jyldyq qyzmetin abyroımen aıaqtady. Aqtaýda Kaspıı teńiziniń quqyqtyq mártebesin bekitken tarıhı qujat qabyldandy. Jahan jurtyna «Astana» halyqaralyq qarjy ortalyǵy tanystyrylyp, tyń bastamalar qolǵa alyndy. Ortalyq Azıa memleketteriniń bes prezıdenti bizdiń elordada bas qosyp, tatý kórshilik qatynastar jandandy.Táýelsiz Qazaqstannyń nyshany sanalatyn tól teńgemizdiń 25 jyldyǵy da abyroıly beles edi. Uly daladaǵy ejelgi kóshpendiler órkenıetiniń jahandyq mańyzy qaıta jańǵyrdy. Osy aıtýly merekeler men aýqymdy sharalar eldigimizdi tanytyp, birligimizdi bekemdeı tústi.
Sondaı-aq, «Astana» halyqaralyq qarjy ortalyǵyn, «Astana hab» İT-startaptardyń halyqaralyq tehnoparkin jáne «Jasyl» tehnologıalar men ınvestısıalyq jobalardyń halyqaralyq ortalyǵyn iske qosý jónindegi jumystar da nátıjeli boldy. Etnosaralyq jáne konfesıaaralyq damýdyń qazaqstandyq modeli búginde halyqaralyq brendke aınaldy.
Qazaqstan Prezıdenti elimizdegi keıingi bastamalardyń bári turǵyndarymyzdyń turmys sapasyn jaqsartýǵa, qoǵamdyq qaýipsizdikti joǵary deńgeıde qamtamasyz etýge jáne ál-aýqatymyzdy arttyrýǵa baǵyttalǵanyn atap ótti.
– Áleýmettik salany keshendi jańǵyrtý – bizdiń mańyzdy baǵytymyz. Táýelsizdik jyldary mıllıonǵa jýyq azamatymyz baspanaly boldy. Biz jýyrdaǵy 5 jyl ishinde 70 mıllıon sharshy metrden astam turǵyn úı salamyz. Bul shamamen taǵy eki mıllıonǵa jýyq qazaqstandyq baspanaly bolady degen sóz, – dedi Elbasy.