Kók týymyz – Táýelsiz Qazaqstannyń eń basty rámizi. Halqymyz úshin azattyqtan asyl, baıraqtan bıik qundylyq joq. Qazaqtyń tarıhy «Týyń jyǵylmasyn!» degen bir aýyz tilekke syıyp tur. Babalarymyz qashanda týyn bıik ustaǵan. Eldigi synǵa túsken sátte baıraq astyna birigip, tutastyǵyn tanytqan. Erlik pen birliktiń dástúri urpaqtan urpaqqa jalǵasyp, Táýelsizdik dáýirine ulasty. Egemen eldiń kók baıraǵy – myzǵymas memlekettigimizdiń belgisi.
Qasym-Jomart TOQAEV.
2019 JYLDYŃ BASTY OQIǴALARY
- Jastar jyly: «Jol kartasy»;
- Qazaqstandaǵy bılik tranzıti: Tuńǵysh Prezıdent Nursultan Nazarbaevtyń óz ókilettigin toqtatý jónindegi úndeýi;
- Qazaqstandaǵy bılik sabaqtastyǵynyń konstıtýsıalyq turǵydan rettelýi;
- «Halyq únine qulaq asatyn memleket» tujyrymdamasy;
- Ulttyq qoǵamdyq senim keńesiniń qurylýy.
Memleket basshysynyń Jarlyǵymen 2019 jyl – «Jastar jyly» dep jarıalanǵan bolatyn. Sondyqtan jańa jyldyń alǵashqy alqaly jıynynyń jastarmen qaýyshýǵa arnalýy da teginnen tegin emes edi.
23 qańtar kúni Nursultan Nazarbaev Jastar jylynyń saltanatty ashylý rásiminde sóz sóıledi. «Barshańyzdy Jastar jylynyń bastalýymen shyn júrekten quttyqtaımyn! Bul – memleket tarapynan óskeleń urpaqty qoldaýǵa baǵyttalǵan mańyzdy qadam. Táýelsizdik rýhymen ósip kele jatqan búgingi jas býyn – bizdiń erteńgi úmitimiz, senimdi tiregimiz.Biz babalarymyz ańsaǵan Táýelsizdikke qol jetkizip, Uly Dala tósinde álem moıyndaǵan memleket qurdyq. Esildiń jaǵasynda eńseli elordamyz – Astanany turǵyzyp, tarıhta buryn-sońdy bolmaǵan zor jetistikke qol jetkizdik. Júzege asyrylyp jatqan sharalardyń bári egemen elimizdiń bolashaǵy – sizder úshin jasalyp otyr. Barsha jastardy ózderiniń áleýetin belsendi júzege asyrýǵa, múmkindikterin barynsha paıdalanýǵa, zamanaýı bilim alyp, kúnnen-kúnge shyńdala túsýge shaqyramyn. «Rýhanı jańǵyrý» baǵdarlamasy men «Uly dalanyń jeti qyry» atty maqala dál osy maqsatqa baǵyttalǵan»,– dedi Elbasy.
2021 jylǵy 19 naýryzda Qazaqstannyń Tuńǵysh Prezıdenti – Elbasy Nursultan Nazarbaev Qazaqstan halqyna Prezıdent retindegi ókilettigin toqtatý týraly úndeýin jarıalady. Qazaqstandaǵy bılik sabaqtastyǵy konstıtýsıalyq turǵydan retteldi. Prezıdenttiń ókilettigi merziminen buryn toqtatylǵan jaǵdaıda onyń ókilettigi qalǵan merzimi aıaqtalǵanǵa deıin Senat tóraǵasyna beriledi. Sodan keıin jańa Prezıdent saılaýy bolady. Tuńǵysh Prezıdent aıtqandaı bári zań sheńberinde ótip, Prezıdenttiń mindetin atqarý Senat tóraǵasy qyzmetindegi Qasym-Jomart Toqaevqa amanattaldy.
2019 jyl ishinde qoǵamdaǵy biregeı tyń ózgerister de, eleýli jarqyn jańalyqtar da, eldi dúrliktirgen, ókinishke toly oqys ári tótenshe oqıǵalar da jadymyzǵa jattalyp qaldy.
Qazaq Elinde sabaqtastyq jolymen jańa Prezıdenttiń saılanýy, Astana qalasynyń Nur-Sultan bolyp qaıta atalýy, Jastar jyly, Qazaqstannyń Ózbekstandaǵy jyly sıaqty erekshe atap ótýge turarlyq oqıǵalar az bolmady. Jyl bastalysymen «Nur álem» sferasynda ótken jastar forýmynda Qazaqstan Prezıdenti Jastar jylyn resmı túrde ashyq dep jarıalady.Úkimet pen jergilikti atqarýshy organdarǵa arnaıy Jastar jylyn ótkizýdiń «Jol kartasyn» ázirleý tapsyryldy. Ol jas qazaqstandyqtardy qoljetimdi ári sapaly bilim, jumys, turǵyn úı jáne otbasyn qurý jónindegi mańyzdy qajettiliktermen qamtamasyz etýdi kózdeıtin naqty qoldaý sharalaryn qamtydy.
Qazaqstannyń Tuńǵysh Prezıdenti – Elbasy Nursultan Nazarbaev 19 naýryzda Qazaqstan halqyna Prezıdent retindegi ókilettigin toqtatý týraly úndeýin jarıalady. Sóıtip, Qazaqstandaǵy bılik sabaqtastyǵy konstıtýsıalyq turǵydan rettelgeni belgili. Elbasy atap ótkendeı, Prezıdenttiń ókilettigi merziminen buryn toqtatylǵan jaǵdaıda onyń ókilettigi qalǵan merzimi aıaqtalǵanǵa deıin Senat tóraǵasyna beriledi. Sodan keıin jańa Prezıdent saılaýy bolady. Tuńǵysh Prezıdent aıtqandaı bári zań sheńberinde ótip, Prezıdenttiń mindetin atqarý Senat tóraǵasy qyzmetindegi Qasym-Jomart Toqaevqa amanattaldy. 23 naýryzda Memleket basshysy Qazaqstan Respýblıkasynyń astanasy – Astana qalasynyń ataýyn «Nur-Sultan» dep qaıta ataý týraly Jarlyqqa qol qoıdy.
Arada kóp ýaqyt ótpeı-aq, Memleket basshysy Qasym-Jomart Toqaev Qazaqstan halqyna úndeý joldap, 2019 jyldyń 9 maýsymynda kezekten tys Prezıdent saılaýy ótetinin jarıa etti.
Kezekten tys Prezıdent saılaýyna Qasym-Jomart Toqaevpen birge Sádibek Túgel, Amangeldi Taspıhov, Danıa Espaeva, Tóleýtaı Rahymbekov, Jambyl Ahmetbekov, Ámirjan Qosanov túsken bolatyn. Halyqtyń 70,76 paıyz daýysyn alǵan Qasym-Jomart Toqaev Qazaqstan Prezıdenti bolyp saılandy. 12 maýsymda Qazaqstan Prezıdenti Qasym-Jomart Toqaevty ulyqtaý rásimi ótti.
Maýsym aıynda Qasym-Jomart Toqaev «Qazaqstan Respýblıkasy azamattarynyń borysh júktemesin azaıtý sharalary týraly» Jarlyqqa qol qoıdy. Osyǵan baılanysty boryshy bar azamattardyń kepilsiz tutynýshylyq qaryzdary boıynsha júktemesin azaıtý sharasy birqatar sanatty qamtydy. Osy naýqannyń nátıjesinde 500 myńnan astam azamattyń borysh júktemesi azaıdy.
2019 jyldyń jáne bir jańalyǵy – jeke tulǵalardyń salyq ósimpulyn keshirý sharasy. Bul úshin halyqqa negizgi qaryzdy tóleý mindetteldi. Sonda ǵana ósimpul avtomatty túrde óshiriledi. Osy shara jyl sońyna deıin jalǵasty. Salyq raqymshylyǵy aıasynda qazaqstandyqtar 10 jeltoqsandaǵy jaǵdaı boıynsha 13 mlrd teńge kólemindegi salyq bereshegin óteı alǵan.
26 jeltoqsanda Parlament Senatynyń 21 baptan turatyn «Pedagog mártebesi týraly» Zańdy qabyldaýy da ustazdar ómirindegi eleýli oqıǵalardyń biri. Qujat tórt baǵytty qamtydy. Birinshiden, ustazdardyń quqyqtaryn keńeıtý jáne ózine tán emes jumystardan bosatý, olardyń júktemesin azaıtý. Ekinshiden, muǵalimniń qyzmetine qoıylatyn talaptardy kúsheıtý. Úshinshiden, materıaldyq emes yntalandyrý tetikteri, sondaı-aq tórtinshiden, materıaldyq yntalandyrý qadamdary.
Qazaqstan tarıhyndaǵy ekinshi Prezıdenttiń Qazaqstan halqyna alǵashqy Joldaýy – «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» dep ataldy. «Halyq únine qulaq asatyn memleket» tujyrymdamasyn iske asyrýdy kózdegen Qasym-Jomart Toqaev Prezıdenttik qyzmetinde halyqpen tıimdi keri baılanys ornatýdy, qoǵamdyq kelisimdi nyǵaıtýdy, shıkizatqa baılanǵan mentalıtetten bas tartyp, ekonomıkany ártaraptandyrýdy kózdeıtinin málimdedi.
30 qańtar
Elbasy oblystardyń jáne Nur-Sultan, Almaty, Shymkent qalalarynyń ákimderimen keńes ótkizdi.Qazaqstan Prezıdenti halyqtyń turmys sapasy men ál-aýqatyn arttyrý memlekettiń negizgi mindeti sanalatynyn aıtty.
27 aqpan
«Nur Otan» partıasynyń kezekti XVIII sezi ótti. Partıanyń «Baqýatty qoǵam: onjyldyqtyń 10 maqsaty» atty 2030 jylǵa deıingi jańa baǵdarlamasy qabyldandy.
14 naýryz
Memleket basshysy jumys saparymen Birikken Arab Ámirlikterine baryp, Abý-Dabıdiń taq murageri, Birikken Arab Ámirlikteriniń Qarýly Kúshteri Joǵarǵy Bas qolbasshysynyń orynbasary sheıh Muhammed ben Zaıd Ál Nahaıanmen kezdesti. Kezdesý barysynda taraptar halyqaralyq kún tártibindegi ózekti problemalardy, týrızm, sıfrlandyrý, ǵarysh, kólik, logıstıka jáne aýyl sharýashylyǵy salalaryndaǵy yqpaldastyqty talqylady.
19 naýryz
Memleket basshysy Nursultan Nazarbaev Qazaqstan halqyna úndeýin jarıalap, prezıdent retinde ókilettigin toqtatty.
Elbasy óz sózinde Qazaqstandaǵy bılik sabaqtastyǵy konstıtýsıalyq turǵyda retteletinin, Prezıdenttiń ókilettigi merziminen buryn toqtatylǵan jaǵdaıda onyń ókilettigi qalǵan merzimi aıaqtalǵanǵa deıin Senat tóraǵasyna beriletinin qadap aıtty. «Qazir Parlament Senatynyń tóraǵasy Qasym-Jomart Kemeluly Toqaev. Ony sizder jaqsy bilesizder. Ol Máskeý memlekettik halyqaralyq qatynastar ınstıtýtynyń túlegi, ǵylym doktory. Aǵylshyn jáne qytaı tilderin erkin meńgergen. Basshylyq laýazymdarda qyzmet etip, mol tájirıbe jınady...Ol – adal ári jaýapkershiligi joǵary azamat. Elimizdiń ishki jáne syrtqy saıasatyn jan-jaqty sezinedi. Ol barlyq baǵdarlamalardy ázirleýge jáne qabyldaýǵa atsalysty.Qasym-Jomart Kemeluly Qazaqstandy basqarýǵa naǵyz laıyqty azamat dep senemin»,– dedi Tuńǵysh Prezıdent.
20 naýryz
Parlament palatalarynyń birlesken otyrysynda Qazaqstan Respýblıkasy Prezıdentiniń Qazaqstan halqyna ant berý rásimi ótti. «Qazaqstan halqyna adal qyzmet etýge, Qazaqstan Respýblıkasynyń Konstıtýsıasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblıkasy Prezıdentiniń ózime júktelgen mártebeli mindetin adal atqarýǵa saltanatty túrde ant etemin, – dedi Qasym-Jomart Toqaev.
Memleket basshysy rásimge qatysýshylar aldynda sóılegen sózinde joǵary ári jaýapty qyzmetti atqara otyryp, Elbasynyń strategıalyq baǵytyn jalǵastyra beretinin aıtty.Rásim barysynda Qazaqstan Respýblıkasynyń Tuńǵysh Prezıdenti – Elbasyǵa «Halyq qaharmany» ataǵy berilip, «Altyn juldyz» aıryqsha belgisi tabys etildi.
23 naýryz
Qazaqstan Prezıdenti Qasym-Jomart Toqaev «Áziret Sultan» memlekettik tarıhı-mádenı qoryq-mýzeıiniń arheologıalyq jáne arhıtektýralyq eskertkishterimen tanysyp, Qoja Ahmet Iassaýı kesenesin aralap kórdi.
Memleket basshysyna mádenı nysandardyń qaıta jóndeý jumystary jáne qoryq-mýzeıdiń aýmaǵyn abattandyrý barysy jóninde baıandaldy.
Sonymen qatar, Qazaqstan Prezıdentine oblys ákimdiginiń, basqarmalar men departamentterdiń ákimshilik ǵımarattaryn, sondaı-aq Kongres holdy, Medıa ortalyǵyn, «Uly dala eli» ortalyǵyn, oqýshylar saraıyn, týrızm kolejin, «Astana» alańyn, áýendi sýburqaqty, halyqqa qyzmet kórsetý ortalyǵyn jáne basqa da áleýmettik-mádenı maqsattaǵy nysandardy salý barysy týraly esep berildi.
3-4 sáýir
Qazaqstan Respýblıkasynyń Prezıdenti Q.K.Toqaev Reseı Federasıasy Prezıdenti V.V.Pýtınniń shaqyrýymen Reseı Federasıasyna saparmen bardy. Qos eldiń Prezıdentteri málimdeme jasady. «Qazaqstan Respýblıkasy men Reseı Federasıasy ózara senim, strategıalyq seriktestik jáne jan-jaqty yntymaqtastyq negizinde teń quqyly jáne egemen memleketter retinde odaqtastyq qatynastardy jáne ıntegrasıalyq ózara yqpaldastyqty damyta otyryp, bul rette memlekettik egemendik pen táýelsizdikti ózara qurmetteý, teń quqylyq jáne ishki isterge aralaspaý, kúsh nemese kúsh qaýpin qoldanbaý, memleketterdiń aýmaqtyq tutastyǵy, shekaranyń myzǵymastyǵy, daý-janjaldardy beıbit jolmen sheshý, halyqaralyq mindettemelerdi adal oryndaý, adam quqyqtary men negizgi bostandyqtardy qorǵaý qaǵıdattaryn basshylyqqa alady...»,– delingen onda.
9 sáýir
Memleket basshysy Qasym-Jomart Toqaev el Konstıtýsıasyna sáıkes Qazaqstan Respýblıkasy Prezıdentiniń kezekten tys saılaýyn 2019 jyldyń 9 maýsymynda ótkizý týraly sheshim qabyldaǵany jóninde Qazaqstan halqyna úndeý jarıalady.
«Kezekten tys saılaý týraly sheshim qabyldaý – óte mańyzdy ári qajetti qadam. Biz Elbasymyzdyń arqasynda táýelsiz, qýatty memleket qurdyq. Qazaqstan halyqaralyq júıede ózine laıyqty ornyn aldy. Bizdi yqpaldy jáne beldi memleket retinde búkil álem moıyndaıdy. Qazirgi tańda tarıhı kezeńdi bastan ótkerip otyrmyz. Joǵary bılik zańdy jáne beıbit jolmen aýysty. Búkil álem qoǵamdastyǵy osy oqıǵany túsinistikpen jáne qurmetpen qabyldady... Biz Elbasynyń sara jolymen júremiz. Halqymyz – birtutas. Táýelsizdigimizdiń eń joǵary qundylyǵy retinde memleketimizdiń irgesi myǵym. Aldaǵy Prezıdent saılaýy osyǵan dálel bolýy kerek. İshki jáne syrtqy saıasattaǵy sabaqtastyq pen turaqtylyqty saqtap, Elbasy usynǵan áleýmettik baǵdarlamalardy oıdaǵydaı sátti ári tıimdi iske asyrýymyz kerek. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul – meniń berik ustanymym!»– dedi Prezıdent.
15 sáýir
Prezıdent Qasym-Jomart Toqaev Ózbekstandaǵy Qazaqstan jylynyń ashylý rásimine qatysty. «Bizdi tilimizdiń birligi, dinimiz, ortaq tarıhymyz ben birtutas taǵdyrymyz biriktiredi. Halyqtarymyz – Ortalyq Azıadaǵy ejelgi ári uly órkenıettiń murageri. Biz dástúrimizdi, babalarymyzdyń qundylyqtary men mádenı-tarıhı muralaryn saqtap qaldyq. Sonymen qatar, kóptegen qıyn synaqtardy bastan ótkerdik», – degen Memleket basshysy Uly Abaıdyń qazaqtarǵa baýyrlas ózbek halqynyń eńbekqorlyǵyn, qaıyrymdy isteri men qarapaıymdylyǵyn úlgi etip, úırenýge shaqyrǵanyn aıtyp, Ózbekstan basshylyǵyna qazaq mádenıetin qoldaǵany úshin rızashylyǵyn bildirdi.
23 sáýir
Nursultan Nazarbaevtyń tóraǵalyǵymen Nur Otan partıasynyń kezekten tys HİH sezi ótti. Kún tártibine sáıkes Qazaqstan Respýblıkasynyń Prezıdenti saılaýyna Nur Otan partıasynyń atynan úmitker usyný jónindegi másele qaraldy. Nursultan Nazarbaev Qasym-Jomart Toqaevty elimizdegi joǵary laýazymǵa laıyqty úmitker ekenin aıtyp, onyń Otan aldyndaǵy sińirgen eńbegi men jetken jetistikterine toqtaldy. «Qasym-Jomart Toqaev menimen birge táýelsizdiktiń alǵashqy jyldarynan bastap qyzmettiń túrli salasynda jumys istedi. Ol – uzaq jyldar Syrtqy ister mınıstrligine jetekshilik etip, Qazaqstannyń syrtqy saıasatyn birge qalyptastyrýǵa atsalysqandardyń biri. Onyń dıplomatıalyq dárejesi shetelde joǵary baǵalanady. Qasym-Jomart Toqaevtyń BUU Bas hatshysynyń orynbasary bolǵanyn jáne tájirıbeli memleket saıasatkeri ekenin jaqsy bilesizder», – dedi Qazaqstannyń Tuńǵysh Prezıdenti.
30 mamyr
Abaı Qunanbaıulynyń 175 jyldyq mereıtoıyn merekeleý týraly Prezıdent Jarlyǵy (Nur-Sultan, Aqorda, 2019 jylǵy 30 mamyr, № 55) jarıalandy. Jarlyqqa sáıkes, 2020 jyly qazaq halqynyń uly aqyny, aǵartýshysy Abaı Qunanbaıulynyń 175 jyldyq mereıtoıyn joǵary uıymdastyrýshylyq jáne mazmundyq deńgeıde merekeleýdi qamtamasyz etý maqsatynda memlekettik komısıa qurylyp, 2019 jylǵy 1 qazanǵa deıin Abaı Qunanbaıulynyń 175 jyldyq mereıtoıyn daıyndaý jáne ótkizý jónindegi jalpyrespýblıkalyq jospar bekitilýi tıis. Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıin keshendi jańǵyrtý jóninde qajetti sharalar qolǵa alynady.
31 mamyr
Qazaqstan Prezıdenti Qasym-Jomart Toqaev Eýropalyq keńes tóraǵasy Donald Týskpen kelissóz júrgizdi. Taraptar ártúrli saladaǵy Qazaqstan men Eýropalyq odaq yntymaqtastyǵynyń perspektıvalaryn talqylady. «ALJIR» memorıaldy-mýzeı keshenine bardy. Olar qasiret qaqpasynyń aldynda bas ıip, saıası qýǵyn-súrgin qurbandarynyń rýhyna taǵzym etti.
31 mamyr - saıası qýǵyn-súrgin qurbandaryn eske alý kúni retinde elimizde 1997 jyldan beri atalyp keledi.
9 maýsym
Elimizde Qazaqstan Respýblıkasynyń Prezıdentin saılaý ótti. Memleket basshysy №115 saılaý ýchaskesine baryp, daýys berdi. Jýrnalıser aldynda sóılegen sózinde Qasym-Jomart Toqaev Prezıdent saılaýynyń tarıhı kún ekenin atap ótti. Ol bılik tarapynan saılaýdyń ashyq ári demokratıaly ótýi úshin barlyq jaǵdaı jasalǵanyn aıtty. Saılaý úderisin 1000-nan astam halyqaralyq mısıalardyń ókilderi, sondaı-aq, 40-tan astam elden kelgen 350-ge jýyq jýrnalıs baqylady.
15 maýsym
Qazaqstan Prezıdenti Azıadaǵy ózara is-qımyl jáne senim sharalary jónindegi keńestiń V samıtine qatysty.
Búginde Azıadaǵy ózara is-qımyl jáne senim sharalary jónindegi keńes – Azıa óńirindegi 35 memleketti jáne jer sharyndaǵy halyqtyń jartysyna jýyǵyn biriktirip otyrǵan tıimdi kópqyrly qurylym.
25 maýsym
Qazaqstan Respýblıkasynyń Prezıdenti bolyp saılanýyna oraı Memleket basshysy Qasym-Jomart Toqaevtyń atyna AQSH Prezıdenti Donald Tramptan quttyqtaý jedelhaty kelip tústi.
«Osy jyldardyń ishinde ekijaqty qarym-qatynastarymyzda úlken jetistikterge qol jetkizdik, yntymaqtastyq rýhymyzdyń ári qaraı da jalǵasa beretinine kámil senemin. Amerıkalyq bıznestiń Qazaqstanmen ekonomıkalyq yntymaqtastyqty keńeıtý baǵytynda jańa múmkindikter alǵany qýantady», – dep jazdy Donald Tramp.
Aq úı basshysy, AQSH-tyń Qazaqstanmen keńeıtilgen strategıalyq áriptestikti ilgeriletý jolyndaǵy birlesken jumystardy jalǵastyra berýge nıetti ekenin atap ótti.
«Men ortaq qaýip-qaterlerge qarsy is-qımyl jasaý úshin, bizdiń tereń strategıalyq áriptestigimizdi ilgeriletý isinde Sizben yntymaqtastyqqa úmittenemin. AQSH Qazaqstanmen myǵym áriptestikti baǵalaıdy. Ortalyq Azıa men jahandyq deńgeıdegi ortaq múdde aıasynda Sizben jáne Qazaqstan halqymen birlesken jumystardy jalǵastyra bermekpiz. Jumysyńyzǵa mol tabys tileımin», – delingen AQSH Prezıdentiniń quttyqtaýynda.
24 tamyz
«Ulytaý 2019» halyqaralyq týrısik forýmy ótti. Qasym-Jomart Toqaev forýmda sóılegen sózinde qazaq halqy úshin Ulytaýdyń tarıhı máni men kıeliligin, sondaı-aq, bul qasıetti mekenniń etnografıalyq, zıarattyq jáne ekologıalyq týrızmdi damytý úshin zor áleýeti bar ekenin atap ótti.
– Tarıhy tereń Ulytaýdyń qadir-qasıetin baǵalaı bilý – barshamyzǵa ortaq paryz. Elimizdiń osyndaı baǵa jetpes baı murasyn ózge jurtqa tanytýdyń jańasha joldaryn oılastyrýymyz kerek... Ulytaý – halyqaralyq deńgeıdegi etnografıalyq týrızmniń ortalyǵy bolýy kerek. Ulytaý týrısik mekenge, demalys aımaǵyna ári uly babalarǵa taǵzym etý ortalyǵyna aınalýy tıis. Bul óńirge qazaq tarıhynyń sımvoly bolatyn eskertkish-ansambl ornatý qajet. Ulytaýdyń tarıhy men taǵylymyn jastar tárbıesi men otanshyldyq rýhty damytýǵa paıdalaný kerek, – dedi Memleket basshysy.
4 qyrkúıek
Memleket basshysy Qasym-Jomart Toqaev Azıa qalamgerleriniń İ forýmyna qatysty. Bul forým álemniń 300 aqyn-jazýshysynyń basyn qosty.
– Búginde tól ádebıetimizdiń kókjıegi keńeıip, álem ádebıetiniń damý kóshine qosyldy. Qazaq qalamgerleriniń týyndylary arqyly dúnıe júzi jurtshylyǵy ulttyq rýhanıatymyzdy tanyp bilýde. Qazaqstandyq 30 jazýshy men 31 aqynnyń shyǵarmalary Birikken Ulttar Uıymynyń 6 tiline aýdarylyp, jaryqqa shyqqaly otyr. Osy týyndylar 5 qurlyqtaǵy 90-nan astam elge, ıaǵnı eki jarym mıllıard oqyrmanǵa taraıdy, – dedi Qasym-Jomart Toqaev.
6 qyrkúıek
Memleket basshysynyń Jarlyǵymen qurylǵan Ulttyq qoǵamdyq senim keńesiniń alǵashqy otyrysy bolyp ótti. «Ulttyq keńes músheleri, belgili qoǵam qaıratkerleri elimizdi jańǵyrtý isine eleýli úles qosady dep senemin. Bul – óte mańyzdy mindet» dedi bul týraly Prezıdent Qasym-Jomart Toqaev. Halyq pen bıliktiń dıalog alańyna aınalǵan keńes quramy 42 adamnan jasaqtaldy.
24 qyrkúıek
Qazaqstan Prezıdenti Qasym-Jomart Toqaev BUU Bas Assambleıasynyń 74-shi sesıasy Jalpy debattarynyń ashylýyna qatysty. Jalpy debattarda Memleket basshysy Qasym-Jomart Toqaevtyń sóz sóıleýi Nú-Iork saparynyń basty oqıǵasy boldy.
Qazaqstan Prezıdenti halyqaralyq bedeldi minberde BUU búkil adamzattyń múddesin qorǵaıtyn ámbebap ári biregeı uıym ekenin málimdedi. Memleket basshysy óz baıandamasynda Azıadaǵy ózara yqpaldastyq jáne senim sharalary jónindegi keńesti qaýipsizdik pen damý boıynsha tolyqqandy aımaqtyq uıym retinde qaıta qurýdy usyndy. Onyń aıtýynsha, Qazaqstan bul usynysty 2020 jyly atalǵan uıymǵa tóraǵalyq etý kezinde júzege asyrýdy qolǵa almaq.
JYL TÚIİNİ
Memleket basshysy Qasym-Jomart Toqaevtyń Qazaqstan halqyn Jańa 2020 jylmen quttyqtaýynan (2019 jylǵy 31 jeltoqsan) :
«...Tarıhymyzdyń tórinde eki jyldyń toǵysqan sátinde aıtylatyn aq tilektiń orny bólek. Árbir azamat, árbir shańyraq Jańa jyldan jaqsylyq kútedi. Bul – tabıǵı dúnıe. Bizdiń búgingi basty baǵytymyz –Jańǵyrý joly.
Barshaǵa qýanysh syılaıtyn Jańa jyl meıramy osy maqsatpen úndesedi.
Ótip bara jatqan 2019 jyl elimiz úshin asa mańyzdy oqıǵalarǵa toly boldy.
Qazaqstan tarıhı damýdyń jańa kezeńine qadam basty.Tuńǵysh Prezıdent, memleketimizdiń negizin qalaǵan uly tulǵa, Elbasy Nursultan Ábishuly Nazarbaevtyń strategıalyq joly saqtaldy. Halqymyz Prezıdent saılaýynda maǵan zor senim artty. Osy oraıda, qoldaý kórsetken azamattarǵa jáne búkil halyqqa shynaıy rızashylyǵymdy bildiremin. Búginde álemdegi turaqsyzdyqqa qaramastan ekonomıkamyz ornyqty damyp keledi. Halyqtyń turmys sapasyn jaqsartý úshin naqty sharalardy júzege asyrdyq.
Búdjet salasy qyzmetkerleriniń jalaqysyn, zeınetaqyny, járdemaqyny jáne stýdentterdiń stıpendıasyn kóbeıtetin boldyq. Áleýmettik jaǵdaıy tómen adamdarǵa qoldaý kórsetý úshin biz buryn-sońdy bolmaǵan biregeı sheshim qabyldadyq. Sonyń arqasynda 500 myńnan astam boryshkerdiń qaryzy aıtarlyqtaı azaıdy. Shaǵyn jáne orta bıznesti qoldaý úshin teńdessiz sharalar qabyldadyq. Jańa jumys oryndary ashylatyn boldy. Men usynǵan «Halyq únine qulaq asatyn memleket» tujyrymdamasy qoǵamymyzdyń damýyna jańa serpin berýi qajet. Halyq pen bılik arasyndaǵy dıalogty kúsheıtý úshin mańyzdy reformalardy usyndyq.Bul bastamalar yntymaǵymyzdy arttyrýǵa baǵyttalǵan. Tatýlyq – ata-babalar ósıet etken qasıetti uǵym. Sondyqtan, tatýlyq pen birlikti kózdiń qarashyǵyndaı saqtaýymyz kerek. Biz bilimi ozyq, oıy ushqyr jastarǵa jaǵdaı jasap, jol ashamyz. Osyǵan oraı, «Prezıdenttik kadr rezervi» jasaqtaldy. Bıyl Arys qalasyndaǵy tótenshe oqıǵa kezinde halqymyz myzǵymas birliktiń úlgisin kórsetti. Men halqymyzdy maqtan tutamyn. Biz kez kelgen synnan súrinbeı ótip, zor tabysqa birge jetemiz dep senemin. Kelesi jyly Konstıtýsıamyzdyń 25 jyldyǵyn atap ótemiz.Uly dalamyzdyń dańqty tarıhyn jan-jaqty dáripteýge erekshe kóńil bólip kelemiz. Abaıdyń, Ál-Farabıdiń mereıtoılaryna daıyndyq jumystaryn bastadyq.Altyn Ordanyń 750 jyldyǵyn memleket deńgeıinde atap ótetin boldyq. Sondaı-aq, Qazaqstan halqy Assambleıasynyń qurylǵanyna shırek ǵasyr tolady. Tıisti is-sharalardyń barlyǵyn ysyrapshyldyqqa jol bermeı, mazmundy oı týdyratyn deńgeıde ótkizemiz. Memleket tarapynan qolǵa alynyp jatqan tyń bastamalardyń bári el ıgiligi úshin jasalyp otyr.
Oń ózgerister jańa 2020 jylda laıyqty jalǵasyn tabady. Degenmen, syn-qaterler az emes. Sondyqtan, biz elimiz úshin, halqymyz úshin adal qyzmet etýimiz kerek. Halyqtan bıik, halyqtan joǵary turǵan eshkim de, eshteńe de joq. Qazaqstan damyǵan, órkenıetti elderdiń qataryna qosylýy qajet. Biz úshin budan basqa týra jol joq. Biz 2020 jyldy Eriktiler jyly dep jarıaladyq. Bul ıgi isterdiń bastaýy bolady. Mundaı sharalar qoǵamdaǵy turaqtylyq pen tatýlyqty nyǵaıtý úshin kerek...».