QR Prezıdenti janyndaǵy Ulttyq ǵylym akademıasy elimizde alǵash ret Jas zertteýshiler forýmyn ótkizdi.
Bul forým – ǵylymǵa, zertteý men ınovasıalyq qyzmetke qyzyǵýshylyq tanytqan mektep oqýshylaryn biriktiretin biregeı alań. İs-sharanyń maqsaty – oqýshylar arasynda ǵylymı oılaýdy damytý, shyǵarmashylyq bastamalardy qoldaý jáne ǵylymı bilimdi keńinen nasıhattaý.
İs-sharaǵa Oqý-aǵartý mınıstri Beısembaev Ǵanı Bektaıuly, Ulttyq ǵylym akademıasynyń akademıkteri, ákimshilikterdegi bilim basqarmalarynyń basshylary, jetekshi jas ǵalymdar, sondaı-aq elimizdiń ár óńirinen 400-den astam respýblıkalyq jáne halyqaralyq konkýrstardyń jeńimpazdary men júldegerleri atanǵan daryndy mektep oqýshylary jáne olardyń ǵylymı jetekshileri qatysty.
Forým oqýshylardyń ǵylymı-zertteý jobalary men ázirlemelerin tanystyrýǵa arnalǵan ashyq alańǵa aınaldy. Munda olardyń daıyndyq deńgeıi baǵalanyp, jetekshi ǵalymdar men sarapshylar tarapynan kásibı pikirler usynyldy. Sonymen qatar, STEM bilimin damytý, halyqaralyq tájirıbeni orta bilim júıesine engizý jáne Qazaqstandaǵy mektep ǵylymynyń bolashaǵy sıaqty ózekti máseleler keńinen talqylandy.
Forým baǵdarlamasynda «Mektep oqýshylarynyń ǵylymı jáne ınovasıalyq jobalary men ázirlemeleriniń kórmesi», «Zıatker» atty ıntellektýaldyq komandalyq saıys, «Akademık Q.I. Sátbaev, arheologıa jáne Qazaqstan ǵylymy tarıhy mýzeılerine ekskýrsıa», «Otandyq jáne sheteldegi jetekshi jas ǵalymdar men akademıkterdiń baıandamalary men master klasstar», «Jas zertteýshilerdiń baıandamalary men óz jobalaryn tanystyrýy», «Jas zertteýshiler forýmy aıasyndaǵy baıqaýlar jeńimpazdaryn marapattaý rásimi», «Qoja – jańa saıahat» fılminiń kórsetilimi qamtylǵan.
Forým nátıjesi boıynsha QR Prezıdentiniń janyndaǵy QR Ulttyq ǵylym akademıasynda Jas zertteýshiler akademıasy qurylý qarastyryldy.
«Qazaqta «Asyl tastan, aqyl jastan» degen ataly sóz bar. Iaǵnı, bizdiń ǵylymyzdyń bolashaǵy jastardyń qolynda. Olaı bolsa qabiletti jas talanttardy taýyp, olardy zaman talabyna saı tárbıelep, bilim deńgeıin shyńdaý bizdiń qasıetti mindetimiz bolmaq», – dedi QR Prezıdentiniń janyndaǵy QR Ulttyq ǵylym akademıasynynyń prezıdenti A.Kúrishbaev.
O.Joldybaı