Sý resýrstary jáne ırrıgasıa mınıstrligi sý salasyn damytýǵa 12 mln dollardan astam grant tartty
Sý resýrstary jáne ırrıgasıa mınıstrligi qurylǵannan beri sý salasyn damytýǵa 12 mln dollardan astam grant tartty.
- Mysaly, Fransıanyń damý agenttigi Balqash kólin saqtap qalýǵa arnalǵan master-jospardy daıyndaýǵa 1,35 mln eýro kóleminde grant bóldi. Al «Qazaqmys» korporasıasy Balqash kóliniń ekojúıesin qorǵaý úshin 5 mln dollar bóledi.
- Japonıa Úkimetimen bógetterdi keshendi basqarý arqyly Qazaqstandaǵy sý tasqynyna qarsy kúres sharalaryn jaqsartý úshin shamamen 2 mln AQSH dollaryn berý týraly kelisim bar.
Islam damý banki «Qazsýshar» RMK-ny tehnıkalyq jabdyqtaýǵa, Qazaq sý sharýashylyǵy ǵylymı-zertteý ınstıtýtynyń sý jáne ózen baseınderiniń máselelerin zertteý men baǵalaýyna, sondaı-aq Sý resýrstarynyń Aqparattyq-taldaý ortalyǵy úshin erte áreket etý júıelerin engizýdi baǵalaýǵa 3,5 mln dollar bóledi.
«Grant qarajaty sý sharýashylyǵynyń túrli salalarynda iri jobalardy ázirleýge jumsalady. Sonymen qatar sheteldik seriktester men halyqaralyq qarjy uıymdary da sapaly taldaý men saraptamany jıi usynady. Granttardan bólek, ınvestısıa tartý boıynsha belsendi jumys júrgizilip jatyr. Búginde birqatar iri qazaqstandyq jáne halyqaralyq kompanıamen kelisimder bar», – dedi Sý resýrstary jáne ırrıgasıa vıse-mınıstri Erbolat Ibraıhanov.