31 naýryz kúni Maqan Esbolatov atyndaǵy QR İİM Almaty akademıasynda elge belgili sport sańlaqtarynyń qatysýymen «dóńgelek ústel» ótti. Jıynda Ulttyq Quryltaıdyń IV otyrysyndaǵy aıtylǵan negizgi máseleler basty taqyryp retinde talqylandy.
Memleket basshysynyń qatysýymen ótken Ulttyq Quryltaıdyń tórtinshi otyrysynda Qazaqstandy damytýdyń negizgi baǵyttary talqylanyp, jańa bastamalar ortaǵa salynǵany málim. Keshegi «dóńgelek ústel» barysynda qatysýshylar Ulttyq Quryltaıda aıtylǵan bilim berý men tárbıege qatysty mazmundardy ashalaı taldady.
Talqy jıynyna Qazaqstan halqy Assambleıasynyń Aqsaqaldar keńesiniń ókilderi, Qazaqstan Respýblıkasynyń eńbek sińirgen sport sheberi Qanat Islam, Olımpıadynyń qola júldegeri, úsh dúrkin álem chempıony Nazym Qyzaıbaı, álem chempıony Alýa Balqybekova arnaıy shaqyryldy. Dańqty sportshylar akademıa kýrsanttarymen kezdesip, óz oılarymen bólisti, ári suraqtaryna jaýap berdi.
– Ulttyq Quryltaıdyń kezekti otyrysynda Memleket basshysy óskeleń urpaqqa bilim berý jáne tárbıe máselesine de erekshe toqtaldy. Bilim berý men tárbıe bir-birinen ajyrmas uǵymdar ekenin eskersek, bilim sapasyn arttyrýmen qatar tárbıe máselesine de basa nazar aýdarymyz kerek. Jas urpaqtyń boıyna ulttyq qundylyqtardy sińirip, olardy jaýapkershilik pen eńbeksúıgishtikke baýlý óte mańyzdy. Bul maqsatta «Adal azamat» jáne «Bir tutas tárbıe» baǵdarlamasy júzege asyrylyp jatqanyn jaqsy bilesizder. Osy baǵdarlamalar aıasynda otbasylyq tárbıemen qatar jastardyń qoǵamdyq belsendiligin arttyrý qolǵa alynyp jatyr, – dedi QR İİM Almaty akademıasy bastyǵynyń orynbasary Murat Jaqypbekov.
Al Qazaqstan halqy Assambleıasynyń Aqsaqaldar keńesiniń múshesi Abdýhalıl Dolkýntaı el birligi eń mańyzdy másele ekenin atap ótti.
– Prezıdent bolashaq jastardyń qolynda ekenin aıtty. Sondyqtan jastarymyzdy durys tárbıelep, elimizdiń órkenıetti, qýatty memleket bolýyna árqaısysymyzdyń atsalysýymyz mańyzdy. Qazaqstanda 100-den astam ult ókilderi ómir súrip jatyr. Biz tatý- tátti bolsaq, damyǵan memleketterdiń qataryna emin- erkin qosylamyz. «Jumyla kótergen júk jeńil», – dedi ol.
Qazaqstan Respýblıkasynyń eńbek sińirgen sport sheberi Qanat Islam kýrsanttarǵa ómir men jumystaǵy tártiptiń mańyzyna basa toqtaldy. Sondaı-aq, akademıa kýrsttarynyń bolashaq qyzmeti abyroıly ári jaýapkershiligi joǵary ekenin atap ótti. Al álem chempıony Alýa Balqybekova ár adam óz mamandyǵynyń sheberi bolsa, úlken jetistikke jetetinin túsindirdi. Olımpıadynyń qola júldegeri, úsh dúrkin álem chempıony Nazym Qyzaıbaı sporttyń adam ómirindegi mańyzdylyǵyna toqtaldy.
– Bárińizdi sportpen aınalysýǵa shaqyramyn. Elimizdiń ósip, damýyna óz úlesimizdi qosaıyq. Elim deıtin, jerim deıtin kózderinde ot, sózderinde jalyny bar azamattarymyz kóp bolsyn, – dedi Nazym Qyzaıbaı.