2025 jylǵy 31 naýryzda QR Prezıdenti janyndaǵy Ortalyq komýnıkasıalar qyzmeti bazasynda QR Ǵylym jáne joǵary bilim mınıstriniń keńesshisi Rýslan Emelbaev pen QR ǴJBM Joǵary bilim berýdi damytý ulttyq ortalyǵynyń «Mamandyǵym – Bolashaǵym» baǵdarlamasy keńsesiniń basshysy Oljas Sákenovtiń qatysýymen baspasóz konferensıasy ótti. Baspasóz konferensıasynyń taqyryby «Mamandyǵym – Bolashaǵym» jobasyna, kásiptik baǵdar berýdi damytýǵa jáne eldegi bilikti kadrlardy daıarlaýǵa arnaldy.
Baspasóz konferensıasy barysynda «Mamandyǵym – Bolashaǵym» baǵdarlamasynyń keńse basshysy Oljas Sákenov óz sózinde Memleket basshysynyń tapsyrmasyna sáıkes jáne «Halyq tabysyn arttyrýdyń 2029 jylǵa deıingi baǵdarlamasy» keshendi jospary aıasynda 2022 jyldan bastap Qazaqstanda óńirlik eńbek naryǵynyń ózekti suranystaryn eskere otyryp, kadrlar daıarlaý júıesin qaıta formattaýǵa baǵyttalǵan «Mamandyǵym – Bolashaǵym» jobasy sátti júzege asyrylyp kele jatqanyn atap ótti.
Jobanyń negizgi maqsattarynyń biri – bilim berý jáne eńbek resýrstary salasyndaǵy óńirlik aıyrmashylyqtardy teńestirý, sondaı-aq eńbek ónimdiligi men halyq tabysyn arttyrý. Qazaqstan ekonomıkasy úshin bilikti kadrlardy daıarlaýǵa baǵyttalǵan «Mamandyǵym – Bolashaǵym» jobasy aıasynda mektep oqýshylary men stýdentterge zamanaýı eńbek naryǵynyń talaptaryna saı kásiptik baǵdar berýge arnalǵan ınovasıalyq sheshimderdi engizý jalǵasýda.
«Mamandyǵym – Bolashaǵym» jastardy ekonomıkanyń bolashaqtaǵy syn-qaterlerine daıyndaýǵa, olardy suranysqa ıe mamandyqtarǵa baǵyttaýǵa jáne óńirlik erekshelikterdi eskere otyryp, olardyń áleýetin damytýǵa baǵyttalǵan. Jobada erekshe nazar EduNavigator platformasyna aýdarylǵan, ol – mektep oqýshylary men kásibı keńesshilerge arnalǵan kásiptik baǵdarlaý quraly. Bul platforma oqýshylarǵa ózderiniń kásibı qalaýlary týraly túsinik qalyptastyrýǵa, mansaptyq joldaryn boljaýǵa jáne jeke beıimdilikteri men qyzyǵýshylyqtaryn eskere otyryp, sáıkes mamandyqtardy tańdaýǵa kómektesedi», – dedi Oljas Sákenov.
Joba jetekshisiniń aıtýynsha, qazirgi tańda 100 000-nan astam mektep oqýshysy EduNavigator platformasynda testileýden ótti.
Joba Almaty, Astana, Mańǵystaý, Qaraǵandy jáne jańa kásipterdiń salalyq atlastary engizilgen basqa óńirlerdi qosa alǵanda, eldiń negizgi oblystaryn qamtıdy, sondaı-aq eńbek resýrstarynyń óńirlik kartalary ázirlenýde, olardyń negizinde 91 qazaqstandyq JOO-da 902 bilim berý baǵdarlamasy qalyptastyryldy.
Baspasóz konferensıasynda QR Ǵylym jáne joǵary bilim mınıstriniń keńesshisi Rýslan Emelbaev «Study in Kazakhstan» kórmesi jáne QR Ǵylym jáne joǵary bilim mınıstrligi júrgizip otyrǵan mektep oqýshylaryna kásiptik baǵdar berý jumystary týraly aıtty.
Mınıstrliktiń bastamasymen jáne jergilikti atqarýshy organdardyń qoldaýymen el óńirlerinde «Study in Kazakhstan» aýqymdy kórmesi ótkiziledi. Bul kórme mektep oqýshylaryna kásiptik baǵdar berýge baǵyttalǵan, olarǵa otandyq oqý oryndarynda qoljetimdi keń aýqymdy bilim berý baǵdarlamalary men mansaptyq múmkindiktermen tanysýǵa, sondaı-aq bolashaq mamandyǵyn tańdaýǵa kómektesetin jetekshi mamandar men ýnıversıtet ókilderinen keńes alýǵa múmkindik beredi.
«Study in Kazakhstan» kórmesi bıyl 29 qańtarda Qaraǵandy qalasynda bastalyp, 12 aqpanǵa deıin Astana, Almaty, Taraz, Shymkent, Túrkistan, Qyzylorda qalalarynda jalǵasty. Kórmege 32 myńnan astam mektep oqýshysy, ata-analar jáne kásiptik baǵdar berý mamandary qatysty. İs-shara barysynda Arızona ýnıversıteti, Jasandy ıntellekt mektebi (Seoul Tech), Koventrı ýnıversıteti sıaqty 20-dan astam sheteldik joǵary oqý ornynyń fılıaldary, sondaı-aq Qazaqstannyń jetekshi ýnıversıtetteri tanystyryldy.
Sondaı-aq Rýslan Emelbaev:
«Qazirgi ýaqytta el boıynsha naýryzdaǵy UBT ótip jatyr, alda negizgi UBT bar, jáne talapkerlerge óz bolashaq mamandyǵyn tańdaý qajet. «Study in Kazakhstan» jármeńkesi – kásiptik baǵdar úshin taptyrmas alań. Sonymen qatar kórmede balalar Memleket basshysynyń tapsyrmasymen ashylǵan sheteldik oqý oryndarynyń fılıal ókilderine tikeleı suraq qoıa alady. Bul – jastarymyz úshin elden shyqpaı-aq sheteldik dıplom alýǵa tamasha múmkindik», – dedi.
Osy jyldyń 3 sáýirinen bastap kórme óz jumysyn eldiń batys óńirlerinde jalǵastyrady, onyń ishinde Aqtóbe, Atyraý, Aqtaý jáne Jańaózen qalalarynda jańa kórmeler men is-sharalar ótedi. Bul is-sharalar maqsatty bilim berý granttary jáne jastarǵa kásiptik baǵdar berý týraly aqparat usynýǵa baǵyttalǵan. Olar halqy tyǵyz ornalasqan jáne batys óńirlerdegi jastarǵa eldiń jetekshi oqý oryndarynda sapaly bilim alýǵa múmkindik beredi.