Ótken jyldyń qarasha, jeltoqsan aılarynda Keńes Odaǵynyń Batyry, gvardıa polkovnıgi Baýyrjan Momyshuly atyndaǵy 5571 áskerı bólimine elimizdiń túkpir-túkpirinen jas sarbazdar tústi. Olar eki aıǵa jýyq oqý pýnktinde áskerı istiń negizi boıynsha bilim aldy.
Ásker qataryna shaqyrylǵan jas sarbazdar jan-jaqty daıyndyqtan ótken soń, jaýyngerlik qyzmetke resmı túrde qabyldandy. Áskerı bólim komandıri, polkovnık Baqdáýlet Ospanbekov is-sharany ashyq dep jarıalaǵan soń, orkestrdiń súıemeldeýimen Memlekettik Gımn shyrqalyp, elimizdiń kók baıraǵy kóterildi. Memlekettik Týdy kóterý quqyǵy jaýyngerlik qyzmettiń úzdik sarbazy qatardaǵy jaýynger Sultanbek Serikulyna berildi.
Ádettegideı sapqa jınalǵan jeke quramnyń aldynda brıgada komandıri, polkovnık Baqdáýlet Ospanbekov jaýyngerlik qyzmettiń mańyzy men olarǵa artatyn jaýapkershiligi týraly aıtyp ótti. Sondaı-aq zańdylyq pen áskerı jarǵy talaptaryn qatań saqtaýdy, halyqqa qaltqysyz qyzmet etýdi tapsyrdy.
Áskerı bólim ardageri, otstavkadaǵy polkovnık Aleksandr Zelınskıı búgingi saltanatpen quttyqtyp, jaýyngerlerge qyzmetterine sáttilik tiledi. Zeınetke shyqsa da, áskerı bólimniń ómirimen áli de bite qaınasyp júrgen zeınetker tárbıeshi-ofıserdiń aqyl-keńesi men izgi tilegi jas jaýyngerlerdi qanattandyra tústi. Sonymen qatar, áskerı bólimniń qyzmetine tikeleı qatysty, ózara birlesip qyzmet atqaratyn Almaty qalasynyń İshki ister departamentinen de qyzmetker keldi. Medeý aýdandyq polısıa basqarmasynyń aǵa ınspektory polısıa aǵa leıtenanty Nursultan Nurjanov quttyqtaý sóz sóılep, jas sarbazdardyń qoǵamdyq tártipti saqtaýdaǵy jaýyngerlik qyzmetterin adal atqaratyndaryna zor senim bildiretinin aıtty.
Eki aılyq daıyndyqtan ótip, alǵashqy jaýyngerlik qyzmetke shyqqaly turǵan jaýyngerdiń birin sózge tarttyq.
«Búgin meniń ómirimdegi óte qýanyshty ári jaýapty kún. Biz alǵash ret jaýyngerlik qyzmetke shyqqaly turmyz. Jas sarbazdar osy kúnge deıin teorıalyq jáne tájirıbelik turǵydan alǵan bilimderin is júzinde kórsetýleri kerek. «Jaýyngerlik januıadaı uıysqan, Ulttyq ulan – eli men halqyna qorǵan!» degen uranmen ońtústik astanamyz – Almaty qalasynyń aýdandaryndaǵy qoǵamdyq tártipti qadaǵalaý maqsatynda qyzmetke shyqpaqpyz. Batyr atamyz Baýyrjan Momyshulynyń «Tártipsiz el bolmas, tártipke baǵynǵan qul bolmas» degen sózderine súıener bolsaq, bizge eń aldymen keregi – temirdeı tártip, qyrandaı qyraǵylyq jáne jalyndaǵan jaýyngerlik rýh dep oılaımyn. Osy aıtylǵan úsh qasıetti saqtaı otyryp, qyzmet atqarar bolsaq, qala tynyshtyǵy turaqty bolady dep senimmen aıtar edim», – dep aǵynan jaryldy bólimniń jedel maqsattaǵy 2-rotanyń qatardaǵy sarbazy Dinmuhamed Jalǵas.
Ol – áskerge Qazaqstannyń batys óńirinen kelgen ulan.
Barlyq sarbazdyń da kókeıinde osy maqsat, tilek turdy dep senemiz.