Almaty ákimi Erbolat Dosaevtyń tapsyrmasy boıynsha Túrksib aýdany («Jas Qanat» sh/a.) Qonaev atyndaǵy óndiristik kooperatıvte (ÓK) ornalasqan komýnaldyq turǵyn úı qorynan jalǵa beriletin páterlerge kezekte turǵandardy ornalastyrý bastaldy, dep habarlaıdy Almaty-akshamy.kz.
Úı kezeń-kezeńimen beriledi. Birinshi kezeń osy jyldyń 25 tamyzynda, jańa oqý jyly qarsańynda bastaldy. Máselen, búgin Almaty ákimdiginiń ókilderi jańa páterlerdiń kiltin bergen 109 otbasy qonys toıyn toılaıdy. Endigi páterlerdiń kilti kelesi aptanyń sońynda, sodan keıin bıyl qyrkúıeginde beriledi.
Almaty qalasy Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly atap ótkendeı, osy aýdanda kópbalaly otbasylarǵa jáne halyqtyń áleýmettik osal toptaryna barlyǵy 401 jaldamaly páter berý josparlanǵan.
«Osy aýdanda aýmaqty abattandyrý jalǵasyp jatyr. Almaty ákimdigi turǵyn úı kesheninde damyǵan ınfraqurylymdy qurýǵa den qoıady. Munda sport jáne balalar alańdary jabdyqtalǵan, mektep bar, jańa balabaqsha salynýda, turǵyndardyń demalysy men bos ýaqytyn paıdaly ótkizýge arnalǵan oryndar salynady», - dedi Ǵalymjan Ábdishúkiruly.
Qazirgi tańda Almaty qalasynyń turǵyn úıine kezekte 41 myńnan astam azamat tur.
Aıta keteıik, Qonaev atyndaǵy ÓK-de úılerdiń qurylysy 2021 jyly «Nurly jer» turǵyn úı-kommýnaldyq damýynyń 2020-2025 jyldarǵa arnalǵan memlekettik baǵdarlamasy aıasynda bastalǵan.