Bilim konkýrsyna 80 elden 2200-ge jýyq úmitker qatysqan.
Bıyl Qazaqstanda 801 qandas joǵarǵy oqý ornyna grantqa qabyldanǵan, dep habarlaıdy Almaty-akshamy.kz Ǵylym jáne joǵarǵy bilim mınıstrliginiń baspasóz qyzmetine silteme jasap.
Qazaqstan Respýblıkasynyń azamaty emes ulty qazaq adamdar úshin qabyldaý kvotasynyń mólsheri 2012 jylǵy 28 aqpandaǵy №264 Qazaqstan úkimetiniń qaýlysy bekitilgen.
"Qaýly dıaspora ókilderine belgilengen kvota sheginde bilim grantyn berý konkýrsyna qatysýǵa múmkindik berdi", - deıdi mınıstrliktiń baspasóz qyzmeti.
Mınıstrliktiń aıtýynsha, Qazaqstannyń joǵary oqý oryndaryna grantqa túsýge jalpy 80 elden ótinim túsip, bilim konkýrsyna 2200-ge jýyq úmitker qatysqan. Bul kórsetkish jyl saıyn artyp keledi.
"Máselen, belgilengen kvota aıasynda 2020 jyly 910, 2021 jyly 784, 2022 jyly 654, 2023 jyly 801 adam qabyldandy. Oqýǵa kelgenderdiń basym kópshiligi Ózbekstan, Mońǵolıa, QHR-dan kelgen", - deıdi vedomstvo.
Sheteldikter úshin halyqaralyq qatynastar boıynsha bilim alýǵa 365 grant berilgen.
"Sheteldik azamattardyń, onyń ishinde Qazaqstan Respýblıkasynyń azamaty emes ulty qazaq qandastarǵa 490 grant berildi. Rezervte 100 grant bar", - deıdi Ǵylym jáne joǵary bilim mınıstrliginiń baspasóz jetekshisi Erjan Baıtanaev.
Sondaı-aq magıstratýraǵa 13 253, doktorantýraǵa 1 890 grant bólindi.
"Qazaqstanda tórtinshi jyl qatarynan Qazaqstan azamaty bolyp sanalmaıtyn ulty qazaq adamdarǵa arnalǵan stıpendıalyq baǵdarlamaǵa úmitkerlerdi irikteý júrip jatyr. Bul baǵdarlama boıynsha da úmitkerler sany artyp keledi. Bıyldyń ózinde 6 024 ótinim tústi", - deıdi Baıtanaev.
Mınıstrliktiń baspasóz málimetine sáıkes, stıpendıalyq baǵdarlama júzege asqannan beri 10 myńnan astam úmitker ótinim bergen. Bul baǵdarlama boıynsha 139 stıpendıat qazaqstandyq joǵary oqý ornyn támamdap, 538 stýdent qazirgi kúni oqýyn jalǵastyryp jatyr.