Sportshylar nashar óner kórsetken jaǵdaıda suraýy bolady.
Qol astyndaǵy sportshylar júldeli oryn ıelenip, medal almasa, ulttyq qurama jattyqtyrýshylary jalaqysynyń jartysyn keri qaıtarady, dep habarlaıdy Almaty-akshamy.kz Inbusiness.kz silteme jasap.
Búdjettiń atqarylýyn baqylaý jónindegi esep komıteti sporttyq qyzmet týraly sharttarda kózdelgen nátıjege qol jetkizbegeni úshin ulttyq quramanyń jattyqtyrýshylaryna sanksıa salynatynyn jarıalady. Endi sportshylar nashar óner kórsetken jaǵdaıda suraýy bolady.
Komıtettiń aqparaty boıynsha, 2021 jylǵy jeltoqsanda esep komıteti Tokıoda ótetin 2020 Olımpıada oıyndaryna daıyndyqqa bólingen qarajatty paıdalaný boıynsha aýdıt júrgizgen.
Memlekettik aýdıt barysynda jattyqtyrýshylarǵa qatysty sanksıa salynbaǵandyqtan, sporttyq qyzmet týraly sharttarda kózdelgen nátıjeler kórsetkishterine qol jetkizbegeni úshin olarǵa qatysty eshqandaı shara qoldanylmaǵany belgili boldy.
Sondyqtan Ulttyq Olımpıada komıtetine sporttyq qyzmet týraly sharttarda kózdelgen nátıjege qol jetkizbegeni úshin jattyqtyrýshylarǵa qatysty sanksıalar salý tapsyryldy.
Esep komıtetiniń tapsyrmasyna sáıkes, "Sportty damytý dıreksıasy" RKP jattyqtyrýshylarmen (bas), sportshylarmen jasalatyn sporttyq qyzmet týraly úlgilik sharttar bekitildi. Bas jattyqtyrýshylarmen bekitilgen sharttyń talabynda tıisti kórsetkish oryndalmasa nemese tıisti deńgeıde bolmasa tólenetin somanyń 50%-dan aspaıtyn bóligi beriledi.