Konstıtýsıalyq is júrgizýdi júzege asyrý tártibi egjeı-tegjeıli reglamenttelgen.
Qańtar aıynan bastap Qazaqstanda Konstıtýsıalyq sot iske qosylady. Bul týraly QR Ádilet vıse-mınıstri Alma Muqanova málim etti, dep habarlaıdy Almaty-akshamy.kz.
Konstıtýsıalyq Sot – bul memlekettiń konstıtýsıalyq negizderin jáne adamnyń konstıtýsıalyq quqyqtaryn qorǵaýǵa arnalǵan álemdik model. Qazaqstanda osyndaı ınstıtýtty qurý elimizdiń quqyq qorǵaý júıesin jańǵyrtý úshin jańa múmkindikter ashady. Bul týraly Ortalyq komýnıkasıalar qyzmetinde ótken brıfıń barysynda QR Ádilet vıse-mınıstri Alma Muqanova málim etti.
«Konstıtýsıalyq Sottyń qyzmeti úshin zańnamalyq, quqyqtyq negizdi qamtamasyz etý, oǵan Konstıtýsıamen júktelgen ókilettikterdi iske asyrý maqsatynda «Qazaqstan Respýblıkasynyń Konstıtýsıalyq Soty týraly» Konstıtýsıalyq zań qabyldandy. Konstıtýsıalyq zań Konstıtýsıalyq Sottyń jáne onyń sýdıalarynyń mártebesin, olardyń ókilettikterin, kepildikteri men qamtamasyz etilýin tolyq ashady. Sondaı-aq konstıtýsıalyq is júrgizýdi júzege asyrý tártibi egjeı-tegjeıli reglamenttelgen. Konstıtýsıalyq Sot elimizdiń barlyq aýmaǵynda Konstıtýsıanyń ústemdigin qamtamasyz etetin organ bolyp tabylatynyn jáne bıliktiń sot tarmaǵyna jatpaıtynyn atap ótkim keledi, óıtkeni bul másele Konstıtýsıada naqty sheshilgen. Bul Konstıtýsıalyq Sot sot sheshimderin qaıta qaramaıdy nemese kúshin joımaıdy degendi bildiredi. 2023 jyldyń 1 qańtarynan bastap Konstıtýsıalyq Sot óz qyzmetin bastaıdy», - dedi spıker.
Onyń aıtýynsha, reformanyń basty jańalyǵy – azamattarǵa Konstıtýsıalyq Sotqa tikeleı júginý quqyǵyn berý bolyp tabylady. Buryn mundaı múmkindik qarastyrylmaǵan bolatyn. Endi Konstıtýsıalyq Sot azamattardyń ótinishteri boıynsha olardyń quqyqtary men bostandyqtaryn tikeleı qozǵaıtyn normatıvtik quqyqtyq aktilerdi Konstıtýsıaǵa sáıkestigin qaraıtyn bolady. Azamattarmen qatar, Bas Prokýror men Adam quqyqtary jónindegi ýákil Konstıtýsıalyq sotqa júginýge quqyly. Osy erejelerdiń barlyǵy Konstıtýsıalyq zańda tıisti retteýdi tapty.