Almaty qalasyndaǵy Qorǵanys mınıstrliginiń Bitimgerlerdi daıarlaý ortalyǵyna Japonıanyń Qazaqstan Respýblıkasyndaǵy Tótenshe jáne Ókiletti Elshisi Iamada Djýn, qorǵanys máseleleri jónindegi elshiniń birinshi hatshysy polkovnık Savaı Tadashı men medısınalyq máseleler jónindegi keńesshi Nıshızava Soko jumys saparymen bardy dep habarlaıdy almaty-akshamy.kz QR Qorǵanys mınıstrliginiń baspasóz qyzmetine silteme jasap.
Ortalyqtyń bastyǵy polkovnık Baýyrjan Nyǵmetýllın ortalyq qyzmetiniń maqsaty men máni, onyń ishinde bitimgerlik kýrstar men qarqyndy tildik daıyndyq týraly habardar etti. Ortalyqty damytý josparynda ótkiziletin kýrstardy kóbeıtý jáne mekemeniń óńirlik deńgeıge shyǵýy da bar. Sóz arasynda 19 qarashada «BUU-nyń Azamattyq turǵyndardy qorǵaý – United Nations Protection of Civilians Course» atty BUU-nyń sertıfıkattalǵan halyqaralyq kýrsy aıaqtalǵanyn aıta keteıik. Onda Bangladesh, Brazılıa, Qazaqstan, Mavrıtanıa, Mozambık, Nıgerıa, Pákistan, Saýd Arabıasy jáne Fınlándıa Qarýly Kúshteriniń ókilderi oqydy. Sapar barysynda Qazaqstan men Japonıa qorǵanys vedomstvolary arasyndaǵy ortalyqtyń bitimgershilik áleýetin damytýdaǵy ekijaqty yntymaqtastyqty nyǵaıtý máseleleri talqylandy.
Tótenshe jáne Ókiletti Elshi Iamada Djýn kezdesýdi uıymdastyryp, qonaqjaılylyq tanytqany úshin Qorǵanys mınıstrligine óz alǵysyn bildirdi. Sondaı-aq ol Qazaqstannyń beıbitshilikti qoldaý jónindegi operasıalarǵa qatysýyn keńeıtý arqyly beıbitshilik pen qaýipsizdikti nyǵaıtýǵa qosqan úlesin atap ótti.