Ýchaskelik komısıanyń jumysy 4 qarashadan bastalady
20 qarasha kúni elimiz úshin mańyzdy naýqan – Qazaqstan Respýblıkasy Prezıdentin saılaýy ótedi. Osyǵan oraı, ár partıadan saıası uıymdar óz kandıdattaryn usyndy. Saılaýǵa belsendi túrde qatysyp, daýys berý – árbir azamattyń boryshy. Osy rette Almaty qalalyq saılaý komısıasynyń tóraǵasy Janna ASANOVAMEN habarlasyp, saıası naýqannyń barysy jaıly áńgimelesken edik.
– Janna Beısentaıqyzy, Prezıdent saılaýyna daıyndyq qalaı júrgizilýde?
– Daıyndyq bastalyp ketti. Qazirgi ýaqytta jergilikti atqarýshy organdar saılaýshylar tizimin naqtylaýda. Saılaýshylardyń daýys berýine qolaıly orta qurý úshin saılaý ýchaskelerin tıisti materıaldyq-tehnıkalyq bazamen qamtý jumystary júrgizilip jatyr.
Saılaý zańnamasynyń negizderi jáne ony saılaý úderisinde qoldaný boıynsha uıymdastyrýshylardyń kásibı biliktiligi men quzyretin arttyrý maqsatynda arnaıy oqytýlar uıymdastyrylǵan.
– Almaty qalasy boıynsha saılaý komısıalary quryldy ma?
– Qalada 609 saılaý komısıasy qurylǵan. Barlyq deńgeıdegi saılaý komıssıalary saıası partıa jáne qoǵamdyq birlestikter usynystary negizinde máslıhat arqyly saılanady. 609 saılaý komısıasynyń 1-eýi qalalyq, 8-i aýdandyq, 600-i ýchaskelik.
Qala boıynsha 600 saılaý ýchaskesi bar. Onyń 531-i turǵylyqty mekenjaımen, 69-y ýaqytsha tirkelgender úshin qurylǵan (aýrýhanalar, sanatorııler, áskerı mekemeler, t.b.)
Jalpy, saılaý komısıa músheleriniń sany – 4759. Almaty qalasynda búgingi tańda 1 mln 161 myńǵa jýyq saılaýshy tirkelgen.
– Qalada tirkelmegen turǵyndar qalaı daýys beredi? Ýaqytsha tirkelgender ýchaskesin qalaı anyqtaıdy?
– Saılaýshylardy saılaýshylar tizimine engizý – saılaýǵa qatysý úshin eń qajetti nárse. Saılaýshylardyń tizimin tıisti ákimdikter «Jeke tulǵalar» memlekettik derekter bazasynyń negizinde turǵylyqty jeri boıynsha jasaıdy. Naqty saılaý ýchaskesiniń saılaýshylar tizimine qosý úshin, turǵylyqty jeri boıynsha tirkeý faktisi negiz bolyp esepteledi. Ár saılaýshy fakt boıynsha ornalasqan ýchaske aýmaǵyna qaramastan, tirkelgen aýmaǵyndaǵy ýchaskege kelip daýys berýi tıis.
Alaıda sizge saılaýǵa deıin 30 kún qalǵanda belgili bolsa, onda sizdiń 2022 jyldyń 21 qazanynda tirkelgen jerińiz boıynsha daýys berýge barýǵa múmkindigińiz bolmaıtyn bolsa, siz ózińiz ornalasqan jerińiz boıynsha ákimdikke sizdi saılaý kúni sizdiń ornalasqan jerińiz boıynsha saılaýshylar tizimine engizý týraly jazbasha ótinishpen júginýge quqyńyz bar.
Siz saılaýshylar tizimderinde ózińizdiń bar-joǵyńyzdy @almaty_sailau_bot telegramm boty arqyly nemese https://open-almaty.kz/ru saıtynan JSN engizý arqyly anyqtaı alasyz.
Eger sizdiń turaqty tirkeýińiz bolmaǵan jaǵdaıda, memlekettik qyzmetterdi onlaın túrde alý múmkindigi sheńberinde, siz úıden shyqpaı-aq eGov arqyly turaqty tirkeýge turýyńyzǵa bolady.
– Qalaǵa syrttan, shetelden kelgen baqylaýshylar týraly aıtyp berseńiz?
– Sheteldik baqylaýshylardyń kelýi týraly aqparat saılaý kúnine jaqyndaǵanda anyqtalady. Ázirshe Almaty boıynsha ondaı aqparat joq.
– Saılaýshylar daýys berýge arnalǵan úı-jaılardan tys jerlerde daýys berýine bola ma?
– eger daýys berýshi densaýlyǵynyń jaı-kúıi boıynsha;
- naýqas otbasy múshesin kútý sebebi boıynsha;
saılaý ýchaskeleri qurylmaǵan shalǵaıdaǵy jáne qatynasý qıyn aýdandarda bolyp, daýys berý úshin kele almaıtyn bolsa, onda saılaý kúni (2022 jyldyń 20 qarashasy) jergilikti ýaqyt boıynsha saǵat on ekiden keshiktirmeı, ýchaskelik saılaý komısıasyna, ózi bolatyn jerde daýys berýdi uıymdastyrý týraly jazbasha ótinishpen júginýge quqyly. Aryz bergen soń ýchaskelik saılaý komısıasy sizdiń bolatyn jerińiz boıynsha daýys berýdi uıymdastyrýǵa tıis.
– Saılaý ýchaskesine kelgen keıbir turǵyn ózderin tizimnen taba almaı shaǵymdanyp jatady. Sebebi nede?
– Birinshiden, saılaýshynyń turaqty tirkeýiniń bolmaýy, ekinshiden, saılaýshynyń basqa saılaý ýchaskesine qatelesip kelýi, úshinshiden, saılaýshynyń basqa óńirde tirkeýde bolýy sebep bolyp jatady.
Mundaı jaǵdaı bolmaý úshin azamat daýys berýge barmas buryn aldyn ala @almaty_sailau2022 telegramm boty arqyly nemese https://open-almaty.kz/ru saıtynan saılaýshylar tiziminen ózin tekserip alý qajet. Joǵaryda aıtylǵandaı, saılaý quǵyǵyn ıelendiretin áreketterdi jasaý kerek.
Sonymen qatar, taǵy bir qosymsha jaǵdaı – azamat saılaýshylar tiziminiń tizimder ýchaskesine berilgennen keıin turaqty tirkeýge turyp nemese 18 jasqa jańa tolýy múmkin. Bul rette árıne, tizimde bolmaıdy. Alaıda, bul jerde de sheshim bar: daýys berý kúni ýchaskelik saılaý komıssıasy ol azamatty arnaıy fýnksıonal arqyly tekserip, eger sol ýchaskedegi tirkeýi dáleldense, tizimge jazbasha túrde qosady.
– Suhbatyńyzǵa rahmet!
Suhbattasqan Gúljanat SEMBAEVA.