Jeke kásipkerlikke memlekettik qoldaý bar

Qalanyń Indýstrıaldy aımaǵynda 2,9 myń jumys orny quryldy

Almatyda Indýstrıaldy aımaqtyń nysandary boıynsha baspasóz týry ótti. Buqaralyq aqparat quraldarynyń ókilderi Teplostil JSHS qasbettik jylý panelin óndiretin zaýytty, «Hyundai Trans Kazakhstan» avtokólik quraldaryn óndiretin zaýytty, «Bıjan» et óńdeý zaýytyn, «Álmerek» medısınalyq buıymdar zaýytyn, «Ala Estate» ónerkásiptik parkin baryp kórdi.

Baspasóz týry Teplostil JSHS óndirisin baryp kórýden bastaldy. Ol jyl saıyn 240 000 sharshy metr qasbettik jylý panelin, kúsheıtilgen polıstırol kóbikten jasalatyn sándik buıym shyǵarady. Jobanyń quny 800 mln teńgeni quraıdy, kásiporynda 30 adam jumys isteıdi.

Ekinshi nysanda buqaralyq aqparat quraldarynyń ókilderi Hyundai Trans Ka­zakhstan avtokólik quralynyń óndirisimen tanysty. Kásiporyn aǵymdaǵy jyly Hyundai Bayon yqsham qalalyq krosoveriniń pılottyq partıasyn shyǵarýǵa kiristi. Qazirgi ýaqytta zaýyt shaǵyn túıin ádisimen shanaǵyn dánekerlep jáne boıap, Hyundai avtokólik quralynyń – Sonata, Elantra, Santa Fe, Palisade, Tucson, Staria, i30, Bayon, sondaı-aq Tucson, Accent sekildi 10 úlgisin shyǵarýda. Kásiporynnyń qýattylyǵy jylyna 45 myń birlik. Zaýytta 800-den astam maman jumys isteıdi.

«Astana Motors» portfelindegi №1 brend – Hyundai. Bıylǵy toǵyz aı ishinde kompanıanyń enshiles kásiporny – Almatydaǵy Hyundai Trans Kazakhstan zaýyty otandyq naryq úshin 20 680 avtokólik óndirgen. Jyl sońyna deıin Hyundai Trans Kazakhstan qazaqstandyq tutynýshylar úshin taǵy 10 myń avtokólik shyǵarady, al 2023 jyly ishki naryq úshin óndiris jospary 40 myń avtokólikti quraıdy.

Álemdik kólik naryǵynyń tarıhynda buryn-sońdy bolmaǵan eń aýyr daǵdarys oryn alyp tur. Geosaıası ahýal jartylaı ótkizgishter tapshylyǵyn jáne logıstıka problemasyn birshama shıelenistirip jiberdi. İri avtokólik konsernderi búkil álem boıynsha óndiristi azaıtyp keledi. Mysaly, Ońtústik Koreıada 2022 jyldyń segiz aıy ishinde 2021 jyldyń dál osy kezeńimen salystyrǵanda Hyundai avtokólikteri 12,7% kem satylǵan, sondaı-aq Hyundai avtokóligine kezekke turý 2-2,5 jyldy qurady.

Beknur NESİPBAEV, «Astana Motors» kompanıasynyń  bas dırektory:

– Búgingi tańda kompanıadan shyǵarylatyn avtokólik túrleri kóbeıýde. Ótken jyly Qazaqstan naryǵyna 22 500 avtokólik satylǵan bolsa, osy jyly 29 000 avtokólikti naryqqa shyǵaramyz degen oıdamyz. Bir aı buryn qytaılyq 3 úlken zaýytpen kelisimshartqa qol qoıdyq. Almatydaǵy ındýstrıaldy aımaqta jańadan taǵy bir zaýyt salynady. Ol zaýyt qazirgige qaraǵanda 3 ese úlken, 90 myń avtokólik shyǵarylatyn bolady. Ár avtokólik dánekerleý jáne boıaý ádisimen shyǵady. Qurylysy qarasha aıynda bastalyp, 2 jylda bitedi degen jospar bar. Zaýytta 2200 jańa jumys orny ashylady. 100 mlrd teńgeden astam ınvestısıa quıylady, 90 myń avtokóliktiń 60 paıyzǵa jýyǵy shetelge eksporttalady.

Sondaı-aq, BAQ ókilderi «Bıjan» EÓZ» JSHS qyzmetimen tanysty. Jyl saıyn et óńdeý zaýyty Indýstrıaldy aımaqta 5 myń tonnadan astam ónim óndiredi, shujyq ónimderi men jartylaı daıyn ónimderi ataýynyń 100-den astam túri bar. Kásiporynda 250 jumys orny qurylǵan.

«Otandyq ónimdi qoldaý birinshi kezektegi másele. Zaýytta 250-den astam adam jumys isteıdi. 1998 jyly naryqqa shyqqan zaýytta alǵash ret 8 qyzmetker eńbek etti. Indýstrıaldy aımaqtaǵy zaýyt 2020 jyly iske qosyldy. 80 túrli et ónimderin shyǵarady. Qazaqstan naryǵyn ózimizdiń ónimmen qamtamasyz etý – basty maqsatymyz», – deıdi «Bıjan» EÓZ» JSHS bas dırektory Hadısha Nurtaıqyzy.

«Álmerek» JSHS bir ret qana qoldanylatyn medısınalyq maqsattaǵy buıymdar óndiretin zaýyt – eksportqa baǵyttalǵan kásiporyn. Otandyq óndirýshi ónimdi satýdy Qazaqstannyń barlyq óńirlerine ǵana emes, sonymen qatar, EýroAzıalyq ekonomıkalyq odaq elderiniń naryǵyna shyǵýdy josparlap otyr. Búginde kásiporyn jylyna 28 mln birlik ónim shyǵarady, 50 jumys orny quryldy.

Baryp kórýdiń taǵy bir nysany «Ala Es­tate» ónerkásiptik parki boldy, onda búgingi kúni otandyq daıyndaýshylardyń bólmearalyq esikteriniń óndiristeri («LePorte M» JSHS jáne «Absolút Flor» JSHS) jáne «Qulpinay» JSHS kondıterlik kompanıasy ornalastyrylǵan. Aýdany 4,3 myń sharshy metrdi quraıtyn ónerkásiptik park shaǵyn jáne orta bıznes sýbektilerine 1 sharshy metri úshin 1200 teńge mólsherinde jeńildetilgen, bekitilgen jalǵa alý mólsherlemesi boıynsha daıyn ınfraqurylymymen daıyn óndiristik úı-jaılar beredi. Joba 140 jańa jumys ornyn qurýǵa múmkindik berdi. Búginde Almaty Indýstrıaldy aımaǵynda jeke ınvestısıasy 119,8 mlrd teńgeni quraıtyn 20 joba iske asyryldy, 647,5 mlrd teńgege ónim óndirildi, 20,7 mlrd teńge salyq aýdarymdary tólendi, 2913 jumys orny quryldy.

2022 jyly 65 jumys orny quryla otyryp, somasy 4,6 mlrd teńgeni quraıtyn «Kaz-Dıa-Test» JSHS zaýyty iske qosyldy. Jyldyń sońyna deıin 211 jumys ornyn qura otyryp, jalpy somasy 6,8 mlrd teńgeni quraıtyn 5 kásiporyndy («VALTHERM», «City Stone», «TEPLOSTIL», «Stroy Produc­tion», «ElektroBar») iske qosý josparlanyp otyr. Budan basqa, 2022 jyly jeke ınvestısıanyń jalpy somasy 1,5 mlrd teńgeni quraıtyn, jalpy alańy 15 300 sharshy metr bolatyn 4 shaǵyn ónerkásiptik parkti iske qosý josparlanyp otyr.

«AQSHAMNYŃ» ANYQTAMASY:

Almaty Indýstrıaldy aımaǵy jeke kásipkerlikke memlekettik qoldaý kórsetý maqsatynda quryldy jáne Almaty qalasynda ónerkásiptiń basym salalaryn (mashına jasaý, tamaq, jeńil, farmasevtıka, hımıa ónerkásibi, logıstıka, qurylys materıaldarynyń óndirisi) damytý úshin kózdelgen. Bul rette ónerkásip kásiporyndaryn qalanyń turǵyn aýdanynan basqa jaqqa qaıta ornalastyrýǵa, tehnologıalyq, ınovasıalyq ónimder shyǵarýǵa, ımportty aýystyrýǵa baǵyttalǵan ınvestısıalyq jobalarǵa basymdyq beriledi. Ónerkásiptik aımaq aýmaǵynda barlyq qajetti ınfraqurylym – gazben qamtamasyz etý, sýmen qamtamasyz etý, elektr energıasy, káriz qubyry, nóser kárizi, ınternet, kábildik telefonıa, jol jelisi bar, «Indýstrıaldy» jeke temirjol stansıasynyń qurylysy júrgizilýde.