Almaty qalasy sanıtarlyq-epıdemıologıalyq baqylaý departamentiniń basshysy Jandarbek Bekshın 20-39 jas aralyǵyndaǵy adamdardyń koronavırýs ınfeksıasyn tez juqtyratynyn, vaksınalaný belsendiligi tómen jáne karantındik rejımdi jıi buzatyny jaıynda aıtty, dep habarlaıdy almaty-akshamy.kz
Jandarbek Bekshın atap ótkendeı, epıdemıologıalyq zertteýlerdiń nátıjeleri boıynsha juqtyrý 20-39 jas aralyǵyndaǵy azamattarda 31,2%, 40-59 jastaǵylarda 24%, 60 jastan asqan qart adamdarda 23% qurady.
«Jalpy, sońǵy aptada ınfeksıa juqtyratyn negizgi oryndar burynǵysha saýda obektileri - 34%, otbasylyq baılanys - 19,5%, qoǵamdyq kólikter - 17,8%», - dedi Almaty qalasynyń bas sanıtarlyq dárigeri.
Jandarbek Bekshın koronavırýstyń «tórtinshi» tolqyny aıaqtalmaǵanyn, biraq tómendeı bastaǵanyn, sondyqtan vaksına saldyrý qarqynyn arttyrý qajet ekenin eske saldy.
«Azamattar derttiń qanshalyqty qaýipti ekenin túsinýleri tıis. Ásirese, 60 jastan asqan adamdar qaýip tobynda, óıtkeni, ólim kóbinese halyqtyń osy sanatynda bolady. Jasyna qaraı kóptegen adamdarda sozylmaly aýrýlar, dert juqqan kezde olar órshı túsedi. Sondyqtan remısıa kezeńinde vaksınalaný qajet. Tek vaksınalaný ǵana koronavırýsty jeńetin bolady», - dedi Jandarbek Bekshın.
Bas sanıtarlyq dárigerdiń aıtýynsha, COVID-19 vırýsynyń «úndilik» nusqasy tez juǵady ári patogendiligi áli de óte joǵary, sonyń saldarynan «sımptomdy» naýqastardyń deńgeıi 95%-dy, «ýhandyq» - 50% jáne «brıtandyq» - 81% quraıdy.
Jandarbek Bekshın halyqty vaksınalaýdy kúsheıtýge jáne qoǵamdyq oryndar men kólikterde maska rejımin saqtaýǵa shaqyrdy. Almaty qalasynyń bas sanıtarlyq dárigeri qala turǵyndarynan adamdar kóp jınalatyn nysandarǵa, túngi klýbtarǵa, meıramhanalarǵa, kafelerge barmaýǵa jáne úıdegi buqaralyq is-sharalardy shekteýge shaqyrdy.