Qalanyń bas sanıtary epıdemıologıalyq jaǵdaıdyń turaqtana bastaǵan kezinde turǵyndardyń vaksınalanýy mańyzdy ekenin atap ótti.
Bul týraly Óńirlik komýnıkasıalar qyzmetiniń alańynda Almaty qalasy Sanıtarlyq-epıdemıologıalyq baqylaý departamentiniń basshysy, qalanyń memlekettik bas sanıtarlyq dárigeri Jandarbek Bekshın málimdedi, dep habarlaıdy Almaty-akshamy.kz.
Jandarbek Bekshın indettiń áli seıilmegenin, ótken táýlikte megapolıste KVI juqtyrýdyń 112 jańa jaǵdaıy tirkelgenin aıtty.
Bas sanıtar epıdemıologıalyq jaǵdaıdyń turaqtana bastaǵan kezinde turǵyndardyń vaksınalanýy mańyzdy ekenin atap ótti. Sondaı-aq sanıtarlyq sharalardy saqtaý qajettigin eske saldy.
«Almaty 12 maýsymnan bastap «jasyl» aımaqta tur. Aıdyń basynan beri koronavırýs aýrýy 2 ese azaıdy. Sońǵy táýlikte KVI-diń 112 jaǵdaıy tirkeldi, al táýliktik ósim 0,1%-ǵa tómendedi», - dedi Jandarbek Bekshın.
Almaty qalasynda epıdemıa bastalǵaly KVI-diń 71 820 jaǵdaıy, al osy jyldyń basynda 53 myńnan astam jaǵdaı tirkelgenin aıtty.
«Halyqtyń 100 myńyna shaqqanda aýrý deńgeıiniń tómendeý dınamıkasy turaqty, sońǵy 7 kúnde 64,7-den 39,8-ge deıin azaıdy, reprodýktıvti san 0,79 deńgeıinde turaqtandy, bul «jasyl aımaq» parametrlerine saı», - dep túsindirdi Almaty qalasynyń bas sanıtarlyq dárigeri.
Jandarbek Bekshın 19 maýsymnan bastap kúshine enetin Almaty qalasynyń memlekettik bas sanıtarlyq dárigeriniń jańa qaýlysynyń daıyn ekenin aıtty. Jańa qujatqa sáıkes, bıznes úshin birqatar jeńildikter belgilengen.