Qazaqstanda «Lokomotıv qurastyrý zaýyty» AQ - eń iri zaýyttardyń biri
QR Indýstrıa jáne ınfraqurylymdyq damý mınıstri Beıbit Atamqulov «Lokomotıv qurastyrý zaýyty» AQ basshylyǵymen kóshpeli kezdesý ótkizdi.
Zaýyt jetekshiligi IIDM basshysyn kásiporynnyń negizgi óndiristik sehtarynyń jumysymen tanystyrdy, dep habarlady Almaty-akshamy.kz. QR Indýstrıa jáne ınfraqurylymdyq damý mınıstrliginiń taratqan habaryna silteme jasaı otyryp.
Aıta keteıik, munda tartqysh jyljymaly quramnyń jylyna 100 birligi shyǵarylady.
General Electric Transportation kompanıasynyń lısenzıasy men tehnologıasy boıynsha júk, jolaýshylar jáne manevrlik teplovozdar óndirisi 2010 jyldan bastalǵan bolatyn.
Búgingi kúni zaýytta júk (TE33AS), jolaýshylar (TEP33A) jáne manevrlik (TEM11A) teplovozdary shyǵarylady.
Otandyq ónimniń negizgi artyqshylyqtaryna keler bolsaq, qyzmet etý merzimi men jóndeý aralyq kezeńiniń uzaqtyǵy, ornatylǵan ózindik dıagnostıkalaý júıesi jáne bos júristegi dızel otynynyń az shyǵyny bolyp tabylady.
Kásiporyn iske qosylǵan sátten bastap 416 teplovoz óndirilgen. Onyń 35-i Tájikstanǵa, Ázirbaıjanǵa, Túrkimenstanǵa, Ýkraınaǵa, Qyrǵyzstan men Moldovaǵa eksportqa shyǵaryldy.
Kezdesý barysynda «Lokomotıv qurastyrý zaýyty» AQ prezıdenti Marat Tileýbaev barlyq lokomotıvterdiń tehnıkalyq sıpattamalar men qaýipsizdikke sáıkestigin tekserý men synaýdyń tolyq sıklynan ótip jatqanyn atap ótti. Óndiris oshaǵynda 570-ten astam jumys orny ashylǵan.
Jalpy, 2010 jyldan bastap 11 myńnan astam torap pen bólshek oqshaýlandyryldy. Bul quramdas bólikterdiń jergilikti qamtýdyń 74% -dan astam deńgeıine jetýge múmkindik berdi.
Beıbit Atamqulov kásiporynnyń eksporttyq áleýetin damytýǵa basa nazar aýdarý qajettiligin alǵa tartty.
Anyqtamalyq:
Kásiporyn TE33AS serıaly qýattylyǵy 3356 kvt bolatyn, tehnıkalyq jaǵynan aldyńǵy qatarly jáne únemdi, bir seksıaly magıstraldyq júk teplovozyn shyǵarady. Onyń eń joǵarǵy jyldamdyǵy saǵatyna 120 shaqyrym.
TEP33A serıaly bir seksıaly magıstraldy jolaýshylar teplovozynyń qýaty 3356 kvt. Ol tehnıkalyq jaǵynan aldyńǵy qatarly jáne únemdi teplovoz. Eń joǵarǵy jyldamdyǵy saǵatyna 160 shaqyrym.