Almatyda kóktaıǵaqtyń aldyn alý úshin aldyn ala sharalar qabyldandy
Almaty qalasynda 13 qarasha túnnen bastap 14 qarasha tańǵa deıin jańbyr jaýyp, arty qarǵa ulasady, aýa temperatýrasy mınýs 3 gradýsqa deıin tómendeıdi dep kútilýde, dep habarlaıdy aqshamnews.kz.
Jolda keptelis bolý qaýpine baılanysty qozǵalys baǵytyn aldyn ala josparlaýdy usynamyz. Jaýyn-shashyn kezinde kóktaıǵaq bolýy múmkin, sol sebepti avtokólik júrgizýshilerinen mashınasyna qysqy shına salyp, jyldamdyqty asyrmaýdy, araqashyqtyqty qatań saqtaýdy, al jaıaý júrginshilerden qaýipsizdik sharalaryn saqtaýdy suraımyz.
Kóktaıǵaqtyń aldyn alý maqsatynda 160 qumshashqysh tehnıka kezekshilikke daıyn bolady. 490 arnaıy tehnıka jáne 1,2 myńǵa deıin jumysshy jumyldyrylady. Aýdandyq ákimdikterde jumys barysyn qadaǵalaý úshin táýlik boıy kezekshilik uıymdastyrylady.
«Qazgıdromettiń» boljaýynsha, 13 qarasha tún ortasynan tańǵa deıin aralas jaýyn-shashyn kútiledi. Túnde aýa temperatýrasy +2 gradýs, kúndiz +5…+7 gradýs shamasynda bolady. 13 qarasha tústen bastap 14 qarasha tańǵa deıin ortasha, keıde qatty jaýyn-shashyn, túnde qar jaýady dep boljanýda. 14 qarashada túnde jáne kúndiz aýa temperatýrasy mınýs 1-3 gradýsqa deıin tómendeıdi.