TJ mınıstri buıryǵymen sýǵa batqan balany qutqarǵany úshin Álıhan Jaqsylyq marapattaldy.
Tótenshe jaǵdaılar mınıstri general-maıor Shyńǵys Árinovtyń buıryǵymen 2024 jylǵy 27 qazanda Almatyda bolǵan balanyń ómirin sýdan qutqarý kezinde kórsetken batyldyǵy men janqıarlyǵy úshin Qyzylorda qalasynyń týmasy Álıhan Sákenuly Jaqsylyq «Sýǵa batqandardy qutqarǵany úshin» medalimen marapattaldy.
Marapatty TJM basshysynyń atynan Almaty qalasy TJD bastyǵy Nurlan Atyǵaev tabystady, dep habarlaıdy aqshamnews.kz.
Shuǵyl is-áreketińizdiń arqasynda qaıǵyly jaǵdaıdyń aldy alynyp, balanyń ómirin qutqarǵanyńyz úshin alǵysymyzdy bildiremiz, - dedi TJD basshysy.
25 jastaǵy qutqarýshynyń aıtýynsha, 27 qazanda Qyzylorda qalasynan jalǵa alatyn páter izdep kelgen Álıhan saǵat 14:00 shamasynda Esentaı ózeni Maqataev kóshesiniń qıylysyndaǵy jaǵalaýynda kele jatqanda balalardyń kómekke shaqyrǵanyn estigen.
Bala Esentaı ózeniniń kaskadynda turyp, sýǵa qulap, ony qatty aǵyn alyp ketken eken. Qas-qaǵym sátte ómirine qaýip tóngenine qaramastan, Á.Jaqsylyq dereý temir qorshaýdan sekirip, sýǵa batyp bara jatqan balany qutqarýǵa kiristi. Sýdyń úlken aǵynynan álsiregen balany jer betine kóterip alyp shyqty.