Renovasıalaý baǵdarlamasy qalaı júrgiziledi jáne tozyǵy jetken qansha úıdiń súrilgenin Almaty qalasy Jetisý aýdanynyń ákimi Gúlnar Kókebaeva ÓKQ brıfıńinde aıtyp berdi, dep habarlaıdy almaty-akshamy.kz
Aıta ketý kerek, qalanyń turǵyn úı qoryn jańartý baǵdarlamasy Almaty qalasynyń 2040 jylǵa deıingi bas jospary aıasynda júzege asyrylýda. Jetisý aýdanynda barlyǵy 161 eski úı bar, onyń 18-i búginde súrilgen. Olardyń ornyna jańa úıler salyndy.
«Sizder Raıymbek dańǵylynda eski eki qabatty úılerdiń ornynda múldem jańa 12 qabatty úıler salynǵanyn baıqaǵan bolarsyzdar. Sondaı-aq, Botkın kóshesinde 9 qabatty úıler salyndy. Birinshi kezekte turǵan barlyq turǵyndar qonystandy. Qazir úshinshi kezek boıynsha buzý jumystary júrgizilýde. Sonymen qatar, Dýlyǵa, Azov jáne Súıinbaı kóshelerindegi jáne ishinara Grıboedov kóshesi boıynsha tozyǵy jetken úılerdiń turǵyndarynyń ótinishi boıynsha olar jańa úılerge kóshirildi. Turǵyndardyń bir bóligi Túrksib jáne Alataý aýdandaryna kóshirildi», - dep atap ótti G.Kókebaeva.
Jetisý aýdanynda barlyǵy 138 buzylmaǵan eski úı qalyp otyr. Jaqyn arada, jańartý baǵdarlamasy aıasynda onyń 28-in buzý josparlanýda. Súrilgen ǵımarattardyń ornyna 40 úı salý josparlanýda.