Instargam-da janarmaı kartalaryn satý týraly habarlandyrýlar kóp.
Olardyń birin belgilengen baǵamen satyp alǵannan keıin, janarmaı quıý stansıasynda aqsha tólemeýge bolady eken. Bul shyndyqqa janaspaıdy, dep habarlaıdy Almaty-akshamy.kz
Stopfake.kz aqparaty boıynsha, qoldanysta joq janarmaı kartalary alǵash ret 2021 jyly Reseıde satyla bastaǵan. Alaıaqtar kartalardy arnaıy ázirlengen saıt arqyly satqan, al sengish kólik júrgizýshileri aqshany olardyń shotyna aýdaryp otyrǵan.
Qazaqstanda sqema sál basqasha. Avtokólik júrgizýshilerine Helios, Qazaq Oil jáne «Gazprom» kompanıalarynyń janarmaı kartalary usynylady. Ol Qostanaıda tirkelgen kompanıanyń atynan Telegram arqyly satylady. Alaıda, ashyq derekterge súıensek, atalǵan fırma órt sóndirgishterdi toltyrýmen aınalysady jáne janarmaı saýdasyna eshqandaı qatysy joq.
Sonymen qatar, 2Gis qyzmetinde janarmaı kartalaryn alý úshin kompanıanyń keńsesine habarlasyp, ol jerden eshkimdi tappaǵan adamdardyń pikirleri jazylǵan.
Aıta keteıik, Helios, Qazaq Oil jáne «Gazprom» resmı portaldarynda janarmaı kartalaryn deldaldar arqyly satý týraly eshteńe aıtylmaǵan. Qazaq Oil kartalardy kompanıamen shart jasasqannan keıin resmı satý ortalyqtarynda 500 teńgege satyp alýdy usynady.
Helios kompanıasynyń saıtynda janarmaı kartalary týraly aqparat múldem joq. Onyń ornyna klıentterge arnaıy bonýstyq kartalardy rásimdeý usynylady.
«Gazprom» kompanıasynda korporatıvtik klıentterge arnalǵan janarmaı kartalary bar. Ony kompanıamen resmı kelisimshart jasasqannan keıin ǵana satyp alýǵa bolady.
Qoryta aıtqanda, janarmaı kartalaryn satý jarnamasy – alaıaqtardyń isi. Kompanıalardyń janarmaı kartalary resmı bólimderde satylady jáne olardy resmı kelisimshart jasalǵannan keıin ǵana satyp alýǵa bolady. Qaznette kartalary satylyp jatqan kompanıa múldem basqa qyzmetpen aınalysady jáne onyń kartalardy satýǵa eshqandaı qatysy joq.