Úkimet otyrysynda Energetıka mınıstri Almasadam Sátqalıev ant berdi, dep habarlaıdy Almaty-akshamy.kz QazAqparatqa silteme jasap.
«Qazaqstan halqy men Prezıdenti aldynda óz Otanym – Qazaqstannyń ekonomıkalyq jáne rýhanı damý isine barlyq kúsh-jigerim men bilimimdi jumsaýǵa, memlekettiń Konstıtýsıasy men zańdaryn qatań saqtaýǵa, ózimniń barlyq is áreketimde zańdylyq pen ádilettilik, azamattyq, ultaralyq jáne konfesıaaralyq tatýlyq prınsıpterin ustanýǵa, Qazaqstan halqyna adal qyzmet etýge, óz elimniń memlekettiligi men dúnıejúzilik qoǵamdastyqtaǵy bedelin nyǵaıta berýge saltanatty túrde ant etemin», - dedi mınıstr.
Aıta keteıik, 4 sáýir kúni Almasadam Sátqalıev Energetıka mınıstri laýazymyna taǵaıyndalǵan bolatyn. Ol 2021 jyldyń naýryz aıynan «Samuryq-Qazyna» ulttyq ál-aýqat qory» AQ basqarma tóraǵasy qyzmetin atqaryp kelgen edi.