QR Premer-Mınıstri Álıhan Smaıylovtyń tóraǵalyǵymen ótken keńeste salalyq tujyrymdamalardyń jobalary men Astana mańyndaǵy eldi mekenderdi áleýmettik-ekonomıkalyq damytýdyń keshendi jospary qaraldy, dep habarlaıdy Almaty-akshamy.kz.
Ulttyq ekonomıka mınıstri Álibek Qýantyrov Astana mańyndaǵy eldi mekenderdi áleýmettik-ekonomıkalyq damytýdyń keshendi josparynda 2025 jylǵa deıin mektepter, balabaqshalar, avtojoldar, gaz, jylý, elektrmen, sýmen jabdyqtaý jáne sý burý jelilerin salý, ónerkásipti damytý, sondaı-aq azamattardy sportpen jáne medısınalyq qyzmettermen qamtýdy arttyrý jáne t. b. kózdelgenin habarlady.
Premer-Mınıstr usynylǵan Keshendi jospardyń jobasyn respýblıkalyq búdjet komısıasy maquldaǵanyn eskere otyryp, ony qoldaıtynyn aıtty.
Sondaı-aq keńeste ulttyq ekonomıka mınıstri Qazaqstan Respýblıkasynyń aýyldyq aýmaqtaryn damytýdyń 2023-2027 jyldarǵa arnalǵan tujyrymdamasynyń jobasymen tanystyrdy. Onyń aıtýynsha, aýyldyq aýmaqtarda áleýmettik jáne ınjenerlik ınfraqurylymdy (mektepter, aýrýhanalar, ınternet, sý qoımalary jáne t. b.) jańǵyrtý, kásipkerlik arqyly aýyl turǵyndarynyń tabysyn arttyrý, jeke qosalqy sharýashylyqtar men kooperasıalardy damytý jáne t. b. sharalar iske asyrylady.
Tujyrymdama aýyldyq aýmaqtardy damytý tásilderiniń tıimdiligin arttyrý, ómir súrý sapasyn jaqsartý jáne aýyldyq jerlerde jaıly ómir súrýge qolaıly orta qurý úshin Memleket basshysynyń tıisti jarlyǵy men Saılaýaldy baǵdarlamasyn iske asyrý úshin ázirlenedi.
Sondaı-aq keńeste respýblıkanyń otyn-energetıka keshenin 2026 jylǵa deıin jáne elektr energetıkasy salasyn 2032 jylǵa deıin damytý tujyrymdamalarynyń jobalary qaraldy.
Premer-Mınıstr usynystar men eskertýlerdi eskere otyryp, olardy pysyqtaýdy tapsyrdy.