Bes kún boıy jylýsyz qalǵan úıde 5 aılyq bala da bar
«Qaqaǵan qara sýyqta qatyp qaldyq». Bes kún boıy jylýsyz qalǵan úıde 5 aılyq bala da bar. Almaty oblysyna qarasty Ótegen batyr kentinde jylý jaıy qashan birjaqty bolady? Bul týraly Almaty.tv aıtyldy, dep habarlaıdy Almaty-akshamy.kz.
«Býy burqyrap, ábden ylǵaldanǵan dáliz kóktem shyqsa kógeredi», – dep alańdaıdy jurt. Al oǵan deıin jylý júıesi jarylmasa ıgi. Óıtkeni, qashan aýystyrylǵany belgisiz qubyr qazirdiń ózi birtindep isten shyǵa bastaǵan.
«Kópbalaly anamyn, eń kishkentaıym 5 aılyq. Qazir muzdaı jerde otyrmyz. Dala aıaz, úıdiń ishi sýyq. Balalar aýyryp jatyr», – dedi Ótegen batyr aýylynyń turǵyny Nurgúl Isa.
138 páteri bar jataqhana tıpindegi úıge jylý ózgelerden 1 aıǵa keshiktirilip berilgen. Oǵan da tozyǵy jetken jylý júıesi kináli. Kiná kimde desek, aınalyp kelip aıtylatyny – osy qubyrdyń jaıy. Al ony aýystyrmaǵan – turǵyndardyń ózi,–deıdi jaýapty maman.
«Atalǵan úıdiń jylýyn qalypqa keltirý – sol ondaǵan adamnyń mindetine kiredi. Biz jylýdy jiberdik, ony talapqa saı ornatý – jekemenshiktegi ár adamnyń óz jumysy. Eger turǵyndar úıindegi qubyrdy aýystyryp berse, ony ortalyqtandyrylǵan júıege qosý qıyn is emes. Bul jerde azamattardyń aýyzbirshiligi kerek», – dedi «Jylý júıeleri» JSHS dırektory Vasılıı Batyr.
Qazir mundaǵy 12 páterdiń terezesine qyraý turyp, muz qatqan. Jylytý qubyry isten shyqqan da dál osy úıler. «Jylynamyn degender sol jylý júıesin jónge keltirýi kerek»,–dep maman aqyl aıtyp ketti. Al ol úshin áýeli bir baspanada turǵanmen, bul onshaqty páterdiń jaıyna bas aýyrta qoımaıtyn kórshilerdi kóndirý kerek.
«Jertóledegi qubyrlardan ylǵı sý tamshylap turady. Tıisti aqshany tólep jatyrmyz, biraq áli úıdiń esh sharýasy sheshilgen joq. Myna sýyqta qashanǵy otyra beremiz?» – dedi Ótegen batyr aýylynyń turǵyny Evgenıa Razýmova.
Aýdannyń jylý júıelerine jaýapty maman dál osy úıdegi apatty jaǵdaı tutas eldimekenge keri áser etýi múmkin deıdi. Óıtkeni, aqaýy bar qubyr ortalyq jylý júıesine qosylǵan. Eger ol jarylsa, basqa turǵyndarǵa da qaýip tónedi.