Almatyda dárigerler sırek kezdesetin patologıasy bar jańa týǵan sábıge sátti ota jasady
Almatydaǵy Balalar shuǵyl medısınalyq kómek kórsetý ortalyǵynda medısına tarıhyna eneti oqıǵa tirkeldi. Qazaqstandyq dárigerler álemde sırek kezdesetin – nebári 30 ret qana tirkelgen patologıa boıynsha sábıge sátti ota jasady, dep habarlaıdy aqshamnews.kz.
Jańa týǵan náreste ómirge kelgen sátten bastap ózdiginen tynys ala almaǵan. Bet pen moıyn tusynda kólemi 4h4 sm bolatyn óskin tynys joldaryn jaýyp, onyń ómirine tikeleı qaýip tóndirgen. Dárigerlerdiń aıtýynsha, balanyń jaǵdaıy bastapqyda óte aýyr bolǵan. Ol ár deminde ómir úshin arpalysty.
Náreste aýrýhanaǵa arnaıy ınkýbatormen jetkizilip, birden jasandy tynys alý apparatyna qosyldy. Alǵashynda óskin lımfangıoma bolýy múmkin degen boljam aıtyldy. Alaıda keıingi zertteýler onyń ómirlik mańyzy bar júıke men qan tamyrlaryna áser etkenin kórsetti.
Ortalyqtyń dárigerleri birneshe konsılıým ótkizip, árbir qadamdy muqıat josparlap, ota jasaý týraly sheshim qabyldady. Eki saǵatqa sozylǵan kúrdeli operasıa sátti ótip, náreste alǵash ret ózdiginen erkin tynys aldy.
Otadan keıingi gıstologıalyq zertteý nátıjesi dárigerlerdi tańǵaldyrdy: isik dep oılaǵan tin – mı tini bolyp shyqty. Bul – geterotopıalyq mı tini dep atalatyn, embrıon damý kezinde mı jasýshalarynyń bas súıek syrtynda ornalasýynan týyndaıtyn asa sırek anomalıa. Dúnıejúzilik tájirıbede mundaı jaǵdaılar tek 30 ret qana tirkelgen.
– Bul medısınalyq turǵyda ǵana emes, adamı turǵyda da úlken jetistik, – deıdi ortalyq dırektory Álibek Smaǵulov. – Sábıdiń ómiri ǵana emes, densaýlyǵy da saqtalyp qaldy.
Búginde sábı ózdiginen dem alyp, emýdi úırenip, úıine shyǵarylǵan. Dárigerler onyń tolyq saýyǵatynyna senimdi.
Aıta keteıik, 2024 jyly ortalyqta damý aqaýy bar 49 jańa týǵan nárestege ota jasalǵan. Al bıylǵy jyldyń basynan beri 24 sábı perzenthanadan jedel kómekpen jetkizilip, der kezinde medısınalyq kómek alǵan.
Eske sala keteıik, buǵan deıin medısına salasynda sırek kezdesetin bes mamandyq jaıly jarıalaǵan edik.