Almaty ádemi, jaıly jáne qaýipsiz qala bolýy tıis.
Jańa qurylys erejeleri áleýmettik ınfraqurylymmen keshendi qamtýdy qarastyrdy. Bul týraly Óńirlik komýnıkasıalar qyzmetinde ótken brıfıń barysynda QR Qurylys salasy odaǵynyń basqarma tóraǵasy Eraly Saýranbaev málimdedi, dep habarlaıdy Almaty-akshamy.kz.
Almaty ÓKQ alańynda sóz sóılegen Eraly Saýranbaev jańa qurylys erejelerine sáıkes turǵyn jáne turǵyn emes ǵımarattar qalanyń magıstraldyq kósheleriniń qyzyl syzyqtarynan keminde 6 metr, jergilikti mańyzy bar joldardan keminde 3 metr ornalasatyn bolady. Bul sheshim jalpy qaýipsizdik pen alańdardy kógaldandyrýǵa múmkindik beredi.
«Qurylystyń sharttary áleýmettik ınfraqurylymmen keshendi qamtýdy kózdeıdi. Jobalaý kezinde balabaqshalar, mektepter, emhanalar, ýchaskelik polısıa pýnktteri qaralatyn bolady. Áleýmettik nysandar qoljetimdi bolýy tıis», — dedi Eraly Saýranbaev.
Ári qaraı ol sáýlet talaptary jaıly aıtty. Mysaly, jańa erejelerde qala aýmaǵyndaǵy ǵımarattar men qurylystardyń qasbetteri qala sapasynyń estetıkalyq sıpatyn kórsetýi tıis dedi.
«Qasbettegi terezeler men vıtrınalardyń bolýy, olardyń ólshemderi, syrtqy kórinisi men túsi ǵımarattyń tehnıkalyq qujatyna sáıkes bolýy kerek. Kirý toptary qurylymnyń senimdiligi men qaýipsizdigin qamtamasyz ete otyryp, jobalaý qujatynyń talaptaryna sáıkes bolýy tıis», — dep habarlady Eraly Saýranbaev.
QR Qurylys salasy odaǵy basqarmasynyń tóraǵasy qurylystyń jańa erejeleri qala turǵyndary, ákimdik pen qurylys salýshylar arasynda ortaq kelisimge kelýge múmkindik beretinin aıtty.
«Almaty ádemi, jaıly jáne qaýipsiz qala bolýy tıis», — dedi Eraly Saýranbaev.