11 maýsym kúni «The Queens’ Festival» shahmattan jahandyq áıelder onlaın festıvali bastalady
Onyń aıasynda shahmattan qurlyqtyq jáne jahandyq áıelder onlaın-týrnırleri men úıretýge arnalǵan is-sharalar serıasy ótedi, dep habarlaıdy Almaty-akshamy.kz. Qazaqstan shahmat federasıasynyń kazchess.kz. baspasóz qyzmetine silteme jasap.
Áıelder shahmat komısıasy men FIDE is-sharalar komısıasymen birlesip, Azıa shahmat federasıasy, Afrıka shahmat konfederasıasy, Eýropalyq shahmat odaǵy jáne Amerıka shahmat konfederasıasynyń qoldaýymen uıymdastyrylǵan biregeı, jan-jaqty is-shara, shahmat ómiriniń barlyq aspektilerine áıelderdi qatystyrý jáne álemde áıelderdiń myqty shahmat qoǵamdastyǵyn damytýdy kózdeıdi. Netflix arnasynda shyqqan «Patshaıymnyń gambıti» (Queen's Gambit) serıalynyń tanymaldyǵy men jetistigine negizdelgen bul shara dúnıe júzindegi áıel shahmatshylardy, shahmat oıynyń uıymdastyrýshylardy, tóreshilerdi, yqpal etýshilerdi, kóshbasshylardy jáne túrli deńgeılerdegi shahmatshylardy biriktirip, kótermeleıdi. Azıa, Amerıka, Afrıka jáne Eýropa shahmatshylary «Queens Finals» jeke jáne komandalyq fınalǵa ótý múmkindigi úshin aldymen onlaın blıs kvalıfıkasıalyq týrnırde baq synaıdy. Barlyq qatysqysy keletinder Qazaqstan shahmat federasıasynyń office@kazchess.kz elektrondy poshtasyna 2021 jyldyń 5 maýsymyna deıin ótinim tastaı alady. Qatysý jarnasy – 10 dollar. Festıvál aıasynda FIDE basqarýshy dırektory Dana Reıznıese-Ozala men qazaqstandyq grosmeıster Dınara Sádýaqasova jáne basqa da arnaıy qonaqtardyń qatysýymen semınarlar men túrli is-sharalar ótedi.