Almatyda kreatıvti ekonomıkany damytýǵa erekshe kóńil bólinedi.
2021 jylǵy 30 jeltoqsanda Almaty qalasy ákimdiginiń Kreatıvti ındýstrıa basqarmasynyń qoldaýymen «Ruh Entertainment» kompanıasy men Almaty qalalyq máslıhatynyń depýtaty Qaırat Qudaıbergen PUBG mobile mobıldi oıyn páni boıynsha «Ar Namys» atty Qazaqstandaǵy jańa kıbersporttyq uıymnyń tusaýkeserin ótkizdi, dep habarlaıdy Almaty-akshamy.kz
Mobıldi qurylǵylardaǵy bul oıyn - álemdegi eń tanymal oıyndardyń biri.
İs-shara barysynda Eýropa jáne álem chempıonattarynda elimizdiń atynan shyǵatyn tanymal kıbersportshylardan turatyn komandanyń birinshi quramy tanystyryldy. Komandanyń barlyq qatysýshylarymen kásibı kelisim-sharttarǵa qol qoıyldy jáne olarǵa eń zamanaýı gadjetter berildi. 2018 jyldan bastap kıbersport Qazaqstanda resmı sport túri retinde tanylǵany belgili.
«Bizdiń úlken maqsattarymyz bar. Halyqaralyq týrnırlerde eń joǵary oryndarǵa ıe bolý úshin bar kúshimizdi salamyz. Bizdiń komandamyz úzdik oıynshylardan turady», - dedi jańa komandanyń negizin qalaýshylardyń biri Qaırat Qudaıbergen.
«Kıbersport búkil álemde qarqyndy damyp keledi. Bizdiń mindetimiz-halyqaralyq týrnırlerde jaqsy nátıje kórsetip júrgen jastarymyzdy qoldaý jáne álemdik kıbersport kartasynan óz ornyn alý. Osy maqsatta biz kıbersportty perspektıvaly ındýstrıalardyń biri retinde Almatynyń kreatıvti ekonomıkasyn damytý strategıasyna engizdik. Kıbersportqa júıeli qoldaý kórsetý jáne túrli týrnırlerdi uıymdastyrý josparda bar. Bul da Almatyny jastardyń kreatıvti qalasy retinde dáripteıdi», - dedi Almaty qalasy ákiminiń kreatıvti ekonomıka jónindegi keńesshisi Ernar Qurmashev.
Aıta keterligi, «Almaty-2050» damý Strategıasyna sáıkes, qala ekonomıkasynda kreatıvti ekonomıkany damytý baǵytynda qurylymdyq manevrdi júzege asyrý josparlanǵan. Megapolıs standartty emes oılaý qabileti bar kreatıvti, talantty jáne biregeı adamdarǵa únemi qoldaý kórsetetini, al zamanaýı sıfrlyq quraldardyń bolýy qala ekonomıkasynyń ósý serpinin arttyratyny atap ótildi.