Almaty ákimdigi bekitken egjeı-tegjeıli josparlaýdyń jańa jobalary núkteli qurylysqa tyıym salady. Jańa ETJ qalanyń 2040 jylǵa deıingi Bas josparyna sáıkes ázirlendi, onda megapolısti damytýdyń monosentrıstik modelinen polısentrıstikke kóshý qaǵıdasy jatyr.
Qalalyq josparlaý jáne ýrbanıstıka basqarmasy jańa ETJ-da qazaqstandyq qala qurylysy tájirıbesinde alǵash ret aqylǵa qonymdy tyǵyzdyqtaǵy toqsandyq qurylys jáne barlyq kósheniń qyzyl syzyǵy qoldanylatynyn atap ótti. Bul retsiz jáne núkteli qurylysqa tyıym salyp, qaıta jańartýda da, jańa qurylys kezinde de kóshe-jol jelisin retke keltiredi.
Bul rette, árbir ETJ-da halyqtyń tyǵyzdyǵy, sonymen qatar, komýnaldyq, kóliktik, energetıkalyq jáne áleýmettik ınfraqurylym eskerilgen.
Esterińizge sala keteıik, Bas jospar boıynsha Almatynyń qurylys tyǵyzdyǵy iri qalalarǵa normatıvter boıynsha qoıylǵan talaptan tómen. Buǵan qosa, Almaty qalasynyń ákimdigi taý bókterinde qurylys salýǵa tyıym salý jáne qurylystyń seısmıkalyq qaýipsizdigin qamtamasyz etý boıynsha josparly jumys júrgizip otyr.
Sonymen, taý betkeıiniń tiktigi 15 gradýstan asatyn jerlerde az qabatty kóppáterli ǵımarattar salýǵa da tyıym salynady. Bul norma taý bókterindegi qurylystyń damýyna jol bermeıdi.
Abaı dańǵylynyń ońtústiginde, Ál-Farabı dańǵylynyń soltústiginde, Áshimov kóshesiniń shyǵysynda, SHAAJ batysyndaǵy úıler 9 qabattan aspaýy kerek.
Osy jáne basqa qala qurylysy shekteýleri qurylys tyǵyzdyǵyn tómendetedi jáne qaýipsizdikti arttyrady.
Jalpy, ETJ turaqty jáne fýnksıonaldy qalalyq keńistik qurýǵa baǵyttalǵan. Olar qala qurylysyn aımaqtarǵa bólýdiń, qyzyl syzyqtardyń, halyqqa áleýmettik, mádenı jáne komýnaldyq qyzmet kórsetý nysandaryn ornalastyrý úshin aýmaqtardy rezervteýdiń, kóshe-jol jelisin uıymdastyrýdyń, ınjenerlik komýnıkasıalardy júrgizýdiń, aýmaqtardy abattandyrý men kógaldandyrýdyń negizgi baǵyttaryn belgileıdi.