Almatyda jan-jaqty josparlaýdyń jańa jobalarynda 200 shaqyrym velojoldar men jaıaý júrginshiler aımaqtaryn qurý qarastyrylǵan
Almaty ákimdigi qalanyń 2040 jylǵa deıingi Bas josparyna sáıkes ázirlengen jan- jaqty josparlaýdyń jańa jobalaryn qabyldady, dep habarlaıdy almaty-akshamy.kz
Jan-jaqty josparlaýdyń jańa jobalaryn ázirleýshilerdiń basshylyqqa alǵan qaǵıdattardyń biri-qalalyq qozǵalysqa qatysýshylardyń árbir toby úshin jeke ınfraqurylym, atap aıtqanda trotýarlar, velojoldar, avtomobıl joldary, qoǵamdyq kólikke arnalǵan bólingen jolaqtar qurylýy tıis.
Máselen, tarıhı ortalyqta jańa jobalar boıynsha jaıaý júrginshiler aýmaǵy qalpyna keltiriledi, al qalǵan aýdandarda jaıaý júrginshiler baılanysy júıesi jolǵa qoıylady – 2030 jylǵa qaraı Almatyda qosymsha 200 shaqyrym jaıaý júrginshiler aımaqtary men velojoldar qurylatyn bolady.
Jalpy, jańa jobada tabıǵı keshender – Medeý shatqaly, Baým toǵaıy, Saıran kóli, Boraldaı toǵandary, İle-Alataý tabıǵı parkiniń aýmaǵy jáne t.b. arasynda jasyl dálizder qurý kózdelgen.
Úlken jáne Kishi Almaty, Esentaı ózenderiniń jaǵalaýlaryn abattandyrý jáne kógaldandyrý jumystary aıaqtalady, ÚAK boıynda demalys aımaǵy jáne basqa da jasyl dálizder qurylady. Orman-saıabaq aımaǵy Kókqaınar kentiniń shyǵysynda, Shańyraq 1 jáne 2 shaǵynaýdandary arasyndaǵy saıly aımaqta, jańa jelilik saıabaq – «Batys» polıortalyǵy paıda bolýy tıis. Qulja traktisi men Buqtyrma kóshesiniń qıylysynda (Áýejaıǵa barar jolda)aýmaǵy 120 ga tabıǵı aýmaqty kól jáne eki ózen jaǵalaýymen qosa abattandyrý jalǵasady.
Budan basqa, Almatynyń keshendi kólik syzbasyn (KKS) ázirleý aıasynda velosıped kóligi ınfraqurylymyn damytýdyń naqty baǵdarlamasy qalyptastyrylýda. Velo-ınfraqurylymdy keńeıtý boıynsha jobalardy iske asyrýdy bastaý aǵymdaǵy jylǵa josparlanǵan. 2024 jyly shamamen 20 shaqyrym kóshe úshin jobalardy ázirleý jáne iske asyrý josparlanýda.
Velojolaqtardyń uzaqtyǵy jáne jobalardy iske asyrý merzimderi jobalaý-smetalyq qujattamany (JSQ) ázirlegen soń jáne naqty jobaǵa saraptamanyń oń qorytyndysyn alǵannan keıin aıqyndalatyn bolady.
Eske salsaq, Bas josparda megapolısti damytýdyń monoortalyq modelinen polıoralyq modelge kóshý qaǵıdaty bar. Osylaısha, 2030 jylǵa deıin 5 polıortalyqtar qurylatyn bolady-olar arnaıy aımaqtar, qoǵamdyq jáne iskerlik belsendilik ortalyqtary: «Shyǵys qaqpasy», «Tarıhı ortalyq», «Soltústik», «Ońtústik-batys», «Batys».