Búgin Astana Media Week bastalady
Astana Media Week úsh kún boıy – 26-28 qazan aralyǵynda ótedi. Onyń barysynda 150 otandyq jáne halyqaralyq spıkerlerdiń qatysýymen 30-dan astam is-shara ótedi.
Jyldyń basty taqyryby: «Jańa dáýir – jańa medıa». Taqyryp jobanyń úsh qundylyǵyn ashýy tıis: jańa dáýirdegi senim, jańa ýaqyttaǵy kásibılik jáne BAQ-tyń úzdiksiz damýy.
Medıaaptalyq «Kontent-market» kórmesinen bastalady, oǵan respýblıkalyq jáne óńirlik telearnalar qatysady, sondaı-aq 50-den astam prodakshn-kompanıa usynylady. Jańa telebaǵdarlamalardy, realıtı-shoýlardy, múltfılmderdi, kórkem jáne derekti fılmderdi tanystyrý úshin ashyq pıchıng uıymdastyrylady. Onda prodakshn-stýdıalar ınvestorlar men satyp alýshylardy tabý maqsatynda ózderiniń eksklúzıvti beınekontentin tanystyrady. Al jabyq taqyryptyq pıchıngterdi "QAZAQSTAN "RTRK" AQ jáne "Habar Agenttigi" AQ ótkizetin bolady.
Meta — medıaaptalyqtyń jeke taqyryby retinde qarastyrylady. Metaǵalam bul sıfrlyq shyndyq, mıllıondaǵan adam jelide kezdesip, mıllıondaǵan vırtýaldy keńistikte ózara árekettesetin 3D vırtýaldy álem. Metanyń damýy BAQ-qa qalaı áser etedi? Qazirgi tańda medıa úshin qandaı artyqshylyǵy bar? Bul suraqtarǵa negizgi plenarlyq otyrysta elimizdiń belgili saıası qaıratkerleri men is-sharanyń hedlaınerleri retinde shaqyrylǵan META jáne TikTok komandalary jaýap beredi. Plenarlyq sesıaǵa QR Aqparat jáne qoǵamdyq damý mınıstri Darhan Qydyráli, QR Ǵylym jáne joǵary bilim mınıstri Saıasat Nurbek jáne arnaıy shaqyrylǵan qonaq retinde Qyrǵyz Respýblıkasynyń Mádenıet, aqparat, sport jáne jastar saıasaty mınıstri Altynbek Maqsutovtyń qatysýy josparlanǵan.
Ortalyq Azıa óńiri qazir belsendi saıası jáne ekonomıkalyq reformalar kezeńin bastan keshirýde. Oń ózgeristermen birge halyqtyń sapaly jáne obektıvti aqparatqa degen suranysy artyp keledi. Bul aqparattyq qoǵamdastyqtyń aldynda turǵan jalpy synaq. Birinshi kúni AMW qatysýshylary paneldik sesıa aıasynda Ázirbaıjan, Ózbekstan jáne Qyrǵyzstan sıaqty Ortalyq Azıa buqaralyq aqparat quraldarynyń ókilderimen ortaq syn-qaterlerge ortaq jaýaptardy qalaı tabýǵa bolatynyn talqylaıdy.
Áleýmettik jelilerde medıaónimderdi jasaıtyndardy da aıtpaı ketý múmkin emes. Bul - jańa medıa ókilderi, yqpaldy blogerler. Pikirtalas alańynda blogosalanyń evolúsıasy, ınternet-resýrstardy monetızasıalaý máseleleri de talqylanatyn bolady.
Sonymen qatar, 26 qazanda Astana Media Week aıasynda Nickelodeon telearnasy men Turanews.kz jańa aqparat portalynyń tusaýkeseri ótedi.
Forýmnyń ekinshi kúni «Qazaqstandaǵy jarnama medıanaryǵy: qazirgi jaǵdaıy» taqyrybyndaǵy pikirtalas alańynan bastalady, onda Ortalyq Azıa jarnama qaýymdastyǵynyń sarapshylary men iri TV-seılz-haýstardyń ókilderi 2022 jyldyń birinshi jartyjyldyǵynyń nátıjeleri boıynsha jarnamalyq medıanaryqtyń aǵymdaǵy jaǵdaıy týraly áńgimeleıdi.
Sondaı-aq ekinshi kúnniń birinshi jartysynda «Serıal ındýstrıasynyń jańa kezeńi» paneldik seksıasynda otandyq prodakshn-stýdıalardyń ókilderi, "Habar Agenttigi" AQ, «QAZAQSTAN «RTRK» AQ, «31 arna» respýblıkalyq arnasy jáne basqa da medıasarapshylar 2023 jylǵa arnalǵan jańa serıaldardyń ıdeıalary men taqyryptaryn usynatyn bolady.
Jeke seksıalarda jýrnalıserdi daıarlaý máseleleri talqylanady. Bul - óte ózekti másele, sebebi jýrnalıserdiń kásibı quzyrettiliginiń transformasıasy "BAQ týraly" zańnyń jańarýyna baılanysty pisip-jetilip otyr. Sonymen qatar, «Jýrnalıs mártebesi» taqyrybynda dóńgelek ústel otyrysy ótedi. Oǵan Senat pen Májilis depýtattary, sondaı-aq QR Aqparat jáne qoǵamdyq damý mınıstrliginiń, quqyq qorǵaý uıymdarynyń ókilderi qatysady.
27 qazanda Qazaqstannyń barlyq qalalarynan medıasalanyń ókilderi óńirlik BAQ forýmynda jınalyp, sala trendterin, problemalyq máselelerin jáne olardyń damý joldaryn talqylaıdy.
Sonymen qatar, medıaaptalyqtyń ekinshi kúninde 15 jyldyq mereıtoıyn atap ótetin Bas redaktorlar klýbynyń forýmy ótedi. Forýmda BAQ menedjmenti salasyndaǵy bilimdi arttyrý jáne saladaǵy kadrlyq áleýetti damytý máseleleri talqylanady.
Úshinshi kúni Qazaqstannyń baspasóz hatshylary úshin bólek sesıa jumysy qarastyrylǵan. Bul sesıa jýrnalısermen qarym-qatynas jasaý, daǵdarys jaǵdaıynda jumys isteý jáne BAQ etıkasy taqyryptaryna arnalǵan semınarlar serıasy formatynda ótedi. Barlyq oqý ýorkshoptarynyń sońynda úzdik baspasóz hatshysy marapattalyp, «Aqparat salasynyń úzdigi» tósbelgisin tabystaý rásimi ótedi.
Astana Media Week dástúrli túrde baspasóz, radıo, ınternet-jýrnalıstıka salasyndaǵy úzdik jetistikteri úshin «Úrker» syılyǵyn tapsyrýdyń saltanatty rásimimen aıaqtalady.