Qazaqstannyń BUU-ǵa músheliginiń 30 jyldyǵyna oraı estelik poshta markasy shyǵaryldy
Qazaqstan Respýblıkasynyń aýmaǵynda «Qazaqstan Respýblıkasynyń Birikken Ulttar Uıymyna múshe bolýynyń 30 jyldyǵyna» oraı «Estelik jáne mereıtoılyq kúnder» serıasynyń arnaıy poshtalyq markasy aınalymǵa engizildi, dep habarlaıdy Almaty-akshamy.kz.
Markany «Qazposhta» AQ BUU-nyń Qazaqstandaǵy Ókildigi men Qazaqstan Respýblıkasynyń Syrtqy ister mınıstrligi birlesip shyǵarǵan.
«Bizdiń kompanıa Qazaqstannyń BUU-ǵa músheliginiń 30 jyldyǵy sıaqty aıtýly oqıǵanyń qurmetine estelik poshta markasyn aınalymǵa shyǵarǵanyna qýanyshty. Osy marka elimizdiń álemdik qaýymdastyqtaǵy róliniń tamasha dáleli bolady dep oılaımyn. Bıyl «Estelik jáne mereıtoılyq kúnder» serıasy aıasynda "Qazposhta" Qazaqstannyń IýNESKO, AÓSSHK sıaqty halyqaralyq uıymdarǵa músheliginiń 30 jyldyǵyna jáne Qazaqstannyń Materıaldyq emes murany saqtaý týraly konvensıaǵa qosylýynyń 10 jyldyǵyna arnalǵan markalar shyǵardy. Sonymen qatar elimizde poshta aınalymynda BUU-nyń 50 jáne 60 jyldyǵyna oraı shyǵarylǵan markalar qoldanylady», - dedi «Qazposhta» AQ basqarma tóraǵasy Ásel Janasova.
Ólshemi 26 h 29,6 mm poshta markasy 10 000 dana taralymmen shyǵaryldy. Marka paraǵy 8 markadan turady. Paraq ólshemi 135 x 70 mm. Poshta markasynyń nomınaly – 700 teńge. Markalar últrakúlgin boıaýmen jáne lakpen qorǵalǵan. Sýretshisi – Elnara Baınazarova.
BUU-nyń Qazaqstandaǵy basshysy Mıkaela Frıberg-Storı: «Marka keskindemesiniń negizi retinde dombyranyń tańdalýy kezdeısoq emes, óıtkeni qazaqtyń dástúrli dombyra kúıi IýNESKO Materıaldyq emes mádenı muranyń reprezentatıvti tizimine engizilgen. Biz Qazaqstannyń osy otyz jyl ishinde turaqty damý jónindegi is-áreketin quptaımyz. Estelik poshta markasynyń shyǵarylymy Qazaqstannyń syrtqy saıasaty tarıhyndaǵy mańyzdy beles jáne turaqty damý maqsattaryna beıimdigi týraly qoǵam habardarlyǵyn arttyrýdyń belgisi bolyp tabylady», - dep atap ótti.
Birikken Ulttar Uıymy damýdyń bolashaq josparlary men Úkimettiń turaqty damýǵa degen qarqyndy umtylysy týraly kózqarasty damytý úshin Qazaqstanǵa arnalǵan qoldaýyn tereńdetýde. BUU-nyń Qazaqstandaǵy júıesi qundylyqtarǵa, adam quqyqtaryna negizdelgen senimdi seriktes bolyp qala beredi. Uıym jumysy memleket pen qoǵamdaǵy seriktesterge basqarýdyń eń qajetti keńesterin, tehnıkalyq kómek pen ǵalamdyq jelilerge qol jetkizýge baǵyttalǵan.