Jańa bas jospardy ázirleýdi bastaý tarıhyna «Almatybasjospar» ǴZI» JSHS bólim basshysy Janat Aıtileý toqtaldy, dep habarlaıdy Almaty-akshamy.kz.
Onyń aıtýynsha, jańa bas jospardy ázirleý tarıhy tereńde jatyr.
«Almaty qalasynyń bas josparyn túzetý» qala qurylysy jobasyn ázirleý 2014 jyly bastalyp, 2016 jyldyń jeltoqsanynda aıaqtaldy. Bas jospardy túzetýdiń jobalyq sheshimderin Memlekettik saraptamanyń saraptaý komısıasy qarady da, komısıanyń eskertýleri boıynsha ózgerister engizilip, jıyntyq qorytyndy daıyndaldy. Alaıda, ol kezde Almaty qalasyn shaǵyn seısmıkalyq aýdandarǵa bólý kartasy bolǵan joq, osyǵan baılanysty jospardy odan ári kelisý jáne bekitý jumystary toqtatyldy.
Almaty qalasy Qalalyq josparlaý jáne ýrbanıstıka basqarmasynyń tapsyrysy boıynsha 2020 jylǵy jeltoqsanda Almaty qalasyn shaǵyn seısmıkalyq aýdandarǵa bólý kartasy bekitilgendikten, qalanyń bas josparyn túzetýdi jandandyrý qolǵa alyndy.
Qalanyń bas josparyn túzetý boıynsha qala qurylysyn jobalaý tájirıbesinde buryn-sońdy bolmaǵan qoǵamdyq talqylaý ótkizildi: bes aıdyń ishinde 26 talqylaý ótkizildi, oǵan 120-dan astam adam qatysty, 510 usynys pen eskertýler kelip tústi, talqylaý qorytyndysy boıynsha 127 usynys túzetý materıaldaryna engizildi.
Qalanyń damýyn josparlaýǵa qatysty sheshimder qabyldaý kókjıegin uzartý týraly usynysqa baılanysty, atap aıtqanda, qala ákiminiń qalanyń Bas josparyn iske asyrýdyń jobalyq eseptik merzimin 2030 jyldan 2040 jylǵa aýystyrý týraly sheshimimen keshendi qala qurylysy saraptamasyn oryndaýdy toqtata turý jáne Almatynyń jańa bas josparyn 2040 jylǵa deıin ázirleý týraly sheshim qabyldandy. Bas jospardyń budan buryn oryndalǵan barlyq bólimderine ózgerister engizildi.
Bul ózgerister jańa bas jospardyń negizin quraıdy jáne qala tynys-tirshiliginiń barlyq salalaryndaǵy hal-ahýaldy jáne turǵyndardyń ótinishterin taldaýǵa negizdelgen «Almaty qalasyn 2025 jylǵa deıingi damytý baǵdarlamasy jáne 2030 jylǵa deıingi orta merzimdi perspektıvalarmen» tyǵyz baılanysty.
Bas jospardyń negizgi maqsaty Almatynyń barlyq aýdandarynda jaıly qalalyq orta qurý jáne ómir súrý sapasyn arttyrý bolyp tabylady.