Almaty qalasynyń aýmaǵy sońǵy on jylda eki esege, al qala turǵyndarynyń sany úshten birge artty. Búgin «Jańa Almaty» keshendi damý josparyn júzege asyrý qarqynyn talqylaý boıynsha dóńgelek ústelde megapolıstiń shalǵaı aýdandary qalaı damyp jatqanyn talqylady dep habarlaıdy almaty-akshamy.kz.
Dóńgelek ústel jumysyna qala basqarmalarynyń jáne Almaty oblysynyń jerleri qosylǵan soń aýmaqtary qurylǵan nemese keńeıtilgen aýdandar ákimdikteriniń basshylary qatysty.
Naýryzbaı aýdanynyń ákimi Sanjar Toǵaı aýdandy damytýdyń basym mindetteri úzdiksiz sýmen, elektr energıasymen jáne gazben qamtamasyz etý bolyp tabylatynyn habarlady.
Búginde Naýryzbaı aýdany 30% ortalyqtandyrylǵan sýmen qamtamasyz etilgen. Taǵy 20% 36 uńǵymadan sý alady. Halyqtyń qalǵan 50%-y Qaraǵaıly, Quramys, Taýsamaly, Taýjoly, Tastybulaq, Aqjar, Qarǵaly shaǵyn aýdandaryn qamtıtyn Qarǵaly jáne Aqsaı ózenderinen ashyq sý tartýdan sýdy paıdalanady.
Sý máselesi týraly aıta kele, S. Toǵaı «Jańa Almatyny» damytýdyń Keshendi jospary aıasynda ortalyqtandyrylǵan sýmen jáne sý burýmen úzdiksiz qamtamasyz etý úshin 131,6 km sý qubyry jáne 74,5 km káriz qubyry salynǵanyn habarlady. 2022-2023 jyldary taǵy 74,5 km sý qubyry men 35,7 km káriz qubyrlaryn salýdy aıaqtaý josparlanýda.
«Aýdanda Qarǵaly ózeninde jańa sý daıyndaý stansıasynyń qurylysy bastaldy, kelesi jyly jumysty aıaqtaýdy josparlap otyrmyz. Búginde «Qarǵaly» tazartý stansıasy táýligine 4 myń tekshe metr sý óndiredi. Jobany iske asyrǵannan keıin óndiristik qýat táýligine 15 myń tekshe metrge deıin ulǵaıtylady. Ekinshi «Aqsaı» tazartý stansıasy táýligine 22 myń tekshe metr sý óndiredi», - dedi S. Toǵaı.
Tastybulaq, Quramys, Qarǵaly, Taýjoly jáne Jaılaý shaǵyn aýdandarynda ınjenerlik jelilerdi tartý jumystary tolyq kólemde aıaqtaldy.
Jaǵdaıdy jaqsartý jáne aýdan turǵyndaryn komýnaldyq qyzmettermen qamtamasyz etý úshin uzyndyǵy 34 km kárizdik kolektordyń tehnıkalyq-ekonomıkalyq negizdemesin ázirleý jónindegi sheshim mańyzdy boldy, Kolektor qoldanystaǵy úı qurylystarynan jáne qosylǵan aýmaqtarda, sondaı-aq Alataý aýdanynyń aýmaǵynan qosymsha salynyp jatqan sarqyndy sýlardy qabyldaýǵa múmkindik beredi.
Aýdan ákimi S. Toǵaı 778 km gaz jelileriniń tartylǵanyn, turǵyndardyń gazben 98% qamtylǵanyn aıtty.
«Ótken jyly ákimdiktiń qoldaýymen kópbalaly jáne az qamtylǵan otbasylar turatyn 46 úı gaz júıesine qosylǵan bolatyn. Bul tájirıbe 2021 jyly da jalǵasyn tapty, tek mesenattar esebinen muqtaj 20 otbasynyń úıleri gazdandyryldy», - dedi S. Toǵaı.
Qalanyń ónerkásiptik áleýetin damytý bızneske tıisti ınjenerlik ınfraqurylymy bar jer ýchaskeleri beriletin ındýstrıalyq aımaqty damytýmen tyǵyz baılanysty.