Sarapshy Almatydaǵy jasyl qordy damytý jóninde oıymen bólisedi
2023 jyly Almatyda 320 myń jasyl jelek otyrǵyzylady, onyń 22 myńy kóktemde egiledi. Endi kúzgi kezeń jalǵasyp, jyl sońyna deıin barlyǵy 298 myń aǵash egiledi, qazir 63 myńǵa jýyq aǵash otyrǵyzyldy, dep habarlaıdy almaty-akshamy.kz
Almaty qalasynyń Almaly aýdany boıynsha jasyl komısıa basshysy Omar Nurhaıdarovtyń aıtýynsha, aǵashtar jaıqalyp ósýi úshin tıisti kútim men sý qajet, áıtpese is-sharalar oń nátıje bermeıdi. Sondyqtan búginde egiletin orynǵa avtomatty sýarý júıesi ornatylǵan. Buǵan qosa, 2023 jyly qabyldanǵan jasyl jelekterdi kútip-ustaý jáne qorǵaý qaǵıdasyna sáıkes, jetkizýshiler 3 jylǵa deıingi aǵashtardy kútip-baptaýǵa mindetti.
«Kógaldandyrýshylar jasyl qordy damytý úshin baryn salyp jatyr. Maýsymnan qazanǵa deıin qýraǵan jáne apatty jaǵdaıdaǵy aǵashtardy kesý jumystary jaqsy uıymdastyryldy. Bıyl biz óte kóp mólsherde qýraǵan aǵashtardy kestik. Qazir qalanyń barlyq aýdanynda aǵashtardy kúzgi otyrǵyzý júrip jatyr», - dedi Omar Nurhaıdarov.
Ol kúzgi otyrǵyzýǵa shaǵan aǵashyna artyqshylyq beriletinin aıtty, óıtkeni ol salystyrmaly túrde kúı talǵamaıdy, sırek aýyrady.
«Baıqasańyz, emen, kashtan men qaraǵash zıankesterden zardap shegedi. Shaǵan aǵashynda ázirge, mundaı zıankes joq, bul aǵashtar tamyrlanyp, jaqsy ósedi. Mamyǵy kóp bolǵandyqtan, kóptegen turǵyn terek egýge qarsy, biraq bıyl biz mamyq bermeıtin atalyq terek otyrǵyzamyz. Olar qala klımatyna tez beıimdelip, jaıqalyp ósip, aýany tazartýda súzginiń qyzmetin atqarady», - dep sózin túıindedi sarapshy.