Erteń Bas múftıdiń bastamasymen elimizdiń barlyq meshitterinde Quran hatym túsirilip, duǵa jasalady.
Jambyl oblysynyń Baızaq aýdanynda oq-dáriler qoımasyndaǵy órt pen jarylystardyń saldarynan adamdardyń qazaǵa ushyraýy – elimizdiń basyna túsken aýyr synaq, barsha qazaq eliniń qabyrǵasyn qaıystyrǵanyn jazdy muftyat.kz, dep habarlaıdy Almaty-akshamy.kz.
29 tamyz, jeksenbi kúni, tańǵy saǵat 10:00-de elimizdiń barlyq meshitterinde Jambyl oblysynyń Baızaq aýdanynda oq-dáriler qoımasyndaǵy órt pen jarylystardyń saldarynan adamdardyń qazaǵa ushyraýyna baılanysty olardyń rýhyna baǵyshtalyp Quran Hatym duǵasy oqylady.
Almaty qalasynyń bas ımamy Tólebı qajy Ospan qaıǵyly jaǵdaıǵa baılanysty Almaty qalasy ımamdary jáne jamaǵaty atynan kóńil aıttty.
«Apattan qaza bolǵan azamattardyń januıasyna, jaqyndaryna kórkem sabyr men amandyq tileımiz. Alla Taǵala zardap shekken jandardyń tez saýyǵyp ketýin násip etkeı. Bul tutas qazaq eline ortaq qaıǵy.
Erteń Bas múftıdiń bastamasymen elimizdiń barlyq meshitterinde Quran hatym túsirilip, duǵa jasalmaq. Biz de duǵadamyz. Jaratqan Iem elimizdi túrli apattardan saqtasyn!
Ibrahım paıǵambar (ǵ.s.): «Ýa, Rabbym! Bul jerdi qaýipsiz, beıbit shahar qylǵaısyń!», - dep Mekke shaharyna jasaǵan batasyndaı qut meken qazaq eli meńgilik jeruıyq bolǵaı! Alla Taǵala elimizge amandyq, jerimizge tynyshtyq bersin. Áýmın», - dep jazdy Almaty qalasynyń bas ımamy Almaty ortalyq meshitiniń áleýmettik paraqshasynda.
Eske salsaq, adam ólimine ákep soqtyrǵan qaıǵyly oqıǵaǵa baılanysty QR Prezıdenti Qasym-Jomart Toqaev 29 tamyzdy Jalpyulttyq aza tutý kúni dep jarıalady.