Jambyl oblysyna jumys sapary barysynda Premer-Mınıstr Álıhan Smaıylov jergilikti eginshilermen kezdesti, dep habarlaıdy Úkimettiń baspasóz qyzmeti.
Premer-Mınıstr Seńkibaı sý arnasy qurylysynyń barysyn tekserip, vegetasıalyq kezeńde sýdy paıdalaný tıimdiligin arttyrý sharalarymen tanysty. Álıhan Smaıylovtyń óńirlik aýyl sharýashylyǵy qurylymdarynyń basshylarymen kezdesýi barysynda sýbsıdıalaý, aýyl sharýashylyǵy tehnıkasy men mıneraldy tyńaıtqyshtar satyp alý, sýarmaly sýmen qamtamasyz etý jáne basqa da birqatar másele kóterildi. Atap aıtqanda, qurǵaqshylyq saldarynan bolǵan egin shyǵynyn óteý týraly másele kóterildi.
Premer-Mınıstr qazir óńirlik aýqymdaǵy tótenshe jaǵdaı jarıalaý jáne Úkimet rezervinen qarajat bólý esebinen fermerlerdiń shyǵyndaryn óteý máselesi pysyqtalyp jatqanyn atap ótti.
«Jospar boıynsha qyrkúıek aıynyń sońyna deıin barlyǵy eseptelip, tıisti qarajat bólinetin bolady. Sondaı-aq respýblıkalyq búdjetten sýbsıdıalarǵa qarjy bólý jáne olardy keshiktirmeı tóleý máselesin jyldamdatyp jatyrmyz. Bul jumys Memleket basshysynyń baqylaýynda», - dedi Álıhan Smaıylov.
Taǵy bir másele «Jasórken» gıdrobeketin qalpyna keltirýge qatysty boldy. Ol sýdy ádiletti bólip, esepke alýǵa múmkindik beredi. Premer-Mınıstr ol úshin Úkimet rezervinen 450 mln teńge qarajat bólý týraly tıisti mınıstrlikke jáne ákimdikke tapsyrma berilgenin habarlady.
«Bul jumysty bıyl bastaý kerek», - dedi ol.
Taǵy bir suraqqa jaýap bere otyryp, Álıhan Smaıylov qazir uńǵymalardy qazýǵa ketken shyǵyndardy óteý úlesin 50%-dan 80%-ǵa deıin ulǵaıtý múmkindigin qarastyryp jatqanyn atap ótti.
Óńirde sýarmaly jer kólemi – 181,8 myń gektar. 2025 jylǵa qaraı ınfraqurylym nysandaryn jóndeý jáne 14 jańa sý qoımasyn salý esebinen taǵy 54,9 myń gektardy aınalymǵa engizý josparlanyp otyr.
Sýdy tıimdi paıdalaný maqsatynda qazirdiń ózinde 54,3 myń gektar jerge sý únemdeý tehnologıalary engizildi. Jyl sońyna deıin bul kórsetkishti 57 myń gektarǵa jetkizý josparlanǵan. Oblys ákimi Nurjan Nurjigitov jerasty sýlaryn tıimdi paıdalaný, uńǵymalardy burǵylaý jáne basqa da sý únemdeý sharalaryn júzege asyrý basty nazarda ekenin aıtty.
Dıqandardy ylǵal únemdeıtin tehnologıalardy qoldanýǵa yntalandyrý úshin ınvestısıalyq sýbsıdıalar túrinde memlekettik qoldaý kórsetiledi. Ol zamanaýı sýarý júıelerin satyp alýǵa jumsalǵan shyǵyndardyń 50%-yn óteýdi, sondaı-aq barlyq qajetti ınfraqurylymdy júrgizýdi kózdeıdi. Birneshe jyl ishinde 385 sharýa qojalyǵy 5 mlrd teńgege kóleminde qoldaý kórsetildi.
Sonymen qatar jalpy kólemi 53,9 myń ga aýmaqta mańyzy bar sýarý kanaldaryn, drenajdyq júıelerdi jáne basqa da qurylystardy qaıta jańǵyrtý jáne salý boıynsha jobalardy pysyqtaý jumystary júrgizilip jatyr. Atap aıtqanda, uzyndyǵy 21,8 shaqyrym bolatyn Seńkibaı kanaly 4 myń ga sýarmaly jerdi sýmen qamtamasyz etedi.
Sondaı-aq Premer-Mınıstrge «Aýyl amanaty» jobasynyń iske asyrylý barysy týraly aqparat berildi.
Memleket basshysynyń qoldaýymen ázirlengen joba 2019 jyly Jambyl oblysynda iske qosylyp, óziniń ekonomıkalyq jáne áleýmettik tıimdiligin dáleldedi. Jalpy, 2019-2023 jyldar aralyǵynda oblys boıynsha ony júzege asyrýǵa 42,3 mlrd teńge bólindi. Sonyń nátıjesinde 50 aýyldyq okrýgten 11 myńǵa jýyq adam óz kásibin ashty.