Bıylǵy sýarý maýsymy bastalǵaly jergilikti sharýalar 44 mln tekshe metr sý aldy. Búgingi tańda óńirdegi 15 myń gektar egis alqaby sýaryldy.
Kúnniń ystyǵyna baılanysty Jambyl oblysynda sýarý kezeńi 25 kúnge erte bastaldy. Al jaýyn-shashyn bolmaǵandyqtan, sýarmaly sýǵa degen suranys aldyńǵy jyldarmen salystyrǵanda eki ese artty.
Qazirgi ýaqytta Jambyl oblysynyń «Qazsýshar» fılıaly tıisti kelisimsharttar jasalǵan sharýalardy sýarmaly sýmen qamtamasyz etip jatyr. Sharýa qojalyqtarymen jasalǵan kelisimderdiń sharttary tolyq oryndalyp jatyr. Al dıqandar kelip jatqan sýdyń kólemine dán rıza.
«Sharýashylyqpen aınalysyp jatyrmyn. Sýmen másele joq. Eginimizdi sýaryp jatyrmyz. Pıaz ektim, jaqsy ósip keledi. Tamshylatyp sýarý júıesi tıimdi, sýdy, dárini únemdeýge kómektesedi. Endi gektaryna 70-80 tonna ónim jınaımyz dep eseptep otyrmyz», - dedi eginshi Aqylbek Báıtikov.
«13 gektar arpa ektim. Qazir bir ret sýaryp qoıdyq. Sý mol kelip jatyr. Tek kelisimshartqa otyryp, aqshasyn tóleý qajet. Qazaqta «sýdyń da suraýy bar» degen sóz bar. Bizdiń jer ylǵaldy jaqsy ustaıdy. Bir márte sýarsaq, sol bizge jetkilikti. Onyń ózinen jaqsy ónim alamyz. Jońyshqany da bir ret sýarǵannan keıin, eki ret oryp alamyz. Gektaryna 150-170 oram shóp alamyz. Bul ózimiz baǵatyn malǵa jetedi»,- dedi Qyzylsharyq aýylynyń turǵyny, sharýa qojalyǵynyń ıesi Ábdibek Shymyrbaev.
«Qazir barlyq kúsh Jambyl oblysynyń sharýalaryn sýarmaly sýmen qamtamasyz etýge baǵyttalǵan. Ol úshin Kırov sý qoımasynan sý jiberý kólemin ulǵaıtý boıynsha qyrǵyz áriptesterimizben kelissóz júrgizildi», - dedi Jambyl oblysynyń «Qazsýshar» fılıalynyń dırektory Qaırat Amanov.