2020-2022 jyldar aralyǵynda jaryqqa shyqqan kitaptar arasyndaǵy baıqaýdyń jeńimpazdary marapattaldy
Almaty qalasyndaǵy «Atakent» Qazaqstan iskerlik yntymaqtastyq ortalyǵynda QR mádenıet jáne sport Mınıstrliginiń qoldaýymen «Atakent-Ekspo» Halyqaralyq kórme kompanıasy men QR Ulttyq memlekettik kitap palatasy, Qazaqstannyń baspagerler, polıgrafıstter jáne kitap taratýshylar qaýymdastyǵymen birlesken «Uly Jibek Jolymen–2022» H Halyqaralyq kitap jáne polıgrafıa jármeńkesi ashyldy, dep habarlaıdy Almaty-akshamy.kz.
Qarashanyń 23-25 aralyǵynda ótetin «Uly Jibek Jolymen–2022» kórmesi – jármeńkege qatysýshy baspagerler, kitap taratýshylar jáne polıgrafıstter qyzmetiniń, Almaty qalasynyń qonaqtary men turǵyndarynyń mádenı ómirindegi aıshyqty oqıǵa sanalady.
Kórmeniń negizgi maqsattarynyń biri – Qazaqstandaǵy zamanaýı kitaptardy keńinen taratýǵa qol ushyn berý, otandyq kitap isi salasyn nyǵaıtý, baspa jumysynyń sýbektileri arasynda tájirıbemen almasý, otandyq kitap naryǵynda ulttyq óndirýshilerdiń ornyn nyǵaıtý bolyp tabylady, sonymen qatar kóptegen elderdiń baspagerlik, polıgrafıalyq jáne kitapsatýshy kompanıalardyń arasynda mádenı jáne iskerlik baılanystardy ulǵaıtý, elder men seriktes kompanıalar arasyndaǵy baılanystardyń áriqaraı damytý, polıgrafıa, kitapsatý jáne kitap óndirisine eń sońǵy tehnologıalar eńgizý jáne t.b.
Kórmede Qazaqstan, Reseı, Qyrǵyzstan, Ózbekstan elderiniń jetekshi baspalary, polıgrafıalyq kompanıalary men kitaphanalary, sondaı-aq, Iran Islam Respýblıkasynyń Almaty qalasyndaǵy Bas konsýldyǵynyń Mádenı ókildigi kitaphanalyq jáne baspa-polıgrafıalyq salalarynyń bolashaǵy men ózekti máselelerin talqylaýǵa, iskerlik jáne kásibı baılanystardy keńeıtýge jáne tájirıbe almasýǵa jınaldy.
«Uly Jibek Jolymen–2022» X Halyqaralyq kitap jáne polıgrafıalyq kórme baǵdarlamasynda kitap naryǵynyń mamandaryna – baspagerlerge, kitapsatýshylarǵa, ádebı agenttikterine, polıgrafıalyq kompanıalarǵa arnalǵan semınarlar, dóńgelek ústelder engizilgen:
- Bookfund.kz kitaptardyń aqparattyq-anyqtamalyq júıesiniń tanystyrylymy;
- «Naryqtaǵy kitap isi: búgin men bolashaq» atty elimizdiń barlyq óńirinen kelgen baspagerlerdiń kezdesýi;
- «Kitap isi naryǵynda sheteldik baspa mekemelerimen tájirıbe almasý» atty dóńgelek ústel;
- Jazýshy Gýzel Iahınamen shyǵarmashylyq kezdesý, qoltańba berý rásimi.
Sondaı-aq, qazaqstandyq belgili qalamgerler jáne jas avtorlarmen kezdesýler, jańadan shyqqan kitaptardyń tanystyrylymy, túrli konserttik qoıylymdar men jyr keshteri uıymdastyrylady. «Balalar jyly» aıasynda jetkinshekterdiń shyǵarmashylyǵyn qoldaýǵa arnalǵan ádebı oıyndar men jumbaqtar, óleń oqý jáne t.b. balalar baǵdarlamasy ázirlengen.
Sonymen qatar, kórme aıasynda 2020-2022 jyldar aralyǵynda jaryqqa shyqqan kitaptar arasyndaǵy baıqaýdyń jeńimpazdary marapattaldy. Bul baıqaý alty nomınasıa boıynsha, ıaǵnı, «Jyl kitaby», «Úzdik kórkem basylym», «Úzdik oqýlyq», «Balalar men jasóspirimderge arnalǵan úzdik kórkem jáne tanymdyq basylym», «Úzdik fotoalbom», «Úzdik polıgrafıalyq oryndaý» nomınasıasy boıynsha jeńimpazdar anyqtalady.