Jalǵan ınternet-dúken ashyp, turǵyndardy taqyrǵa otyrǵyzǵan Almaty turǵynyna qatysty mundaı úkimdi Petropavl qalalyq soty shyǵardy.
Petropavl qalalyq sotynyń tóraǵasy Mıhaıl Gýsevtiń aıtýynsha, jaqynda esh jerde jumys istemeıtin, buǵan deıin sottalmaǵan Almaty turǵynyna sot úkimi shyqty. Er adam Instagram áleýmettik jelisinde on shaqty adamdy aldap, olardyń aqshalaryn qaltasyna basqan.
«Áleýmettik jelide Modnyi-store atty akkaýnt quryp, ol jerde áıelderdiń sándi, suranysqa ıe kıimderin jarty baǵasyna satamyn dep jarnamalaǵan. Ádemi foto, arzan baǵa onlaın-tutynýshylardyń qyzyǵýshylyǵyn týdyrady. Eshteńeden sekem almaǵan qyz-kelinshekter sharttardy qabyl alyp, aldyn ala tólem jasaǵan. Osylaısha K. degen azamat 12 adamdy 900 myń teńgege aldaǵan», - deıdi Mıhaıl Gýsev.
Jábirlenýshilerge keltirilgen materıaldyq shyǵyndy er adamnyń týystary tolyq ótedi. Petropavl qalalyq soty Almaty turǵynyn kináli dep taýyp, 3 jylǵa bas bostandyǵynan aıyrdy. Jazany sottalýshy qylmystyq-atqarý júıesiniń ortasha qaýipsizdik deńgeıdegi mekemesinde óteıdi.
«Sońǵy kezde keń taralǵan ınternet alaıaqtyqtyń taǵy bir túri – bank qyzmetkeri bolyp habarlasý. Áńgime barysynda olar habarlasqan adamynyń barlyq jeke qupıa málimetterin bilýge jáne onyń atyna úlkem somada nesıe rásimdeýge tyrysady. Alaıaqtardyń bir ǵana maqsaty bar – aldaý arqyly aqshaǵa qol jetkizý. Olar habarlasqan kezde asa dinshil bolyp kóringisi keledi, psıhologıany jaqsy meńgergen, tez til tabysady. Sezimge áser etip, qajet bolsa qorqytady da. Sondyqtan da alaıaqtardyń quryǵyna túsip qalmaý úshin qyraǵylyq tanytý kerek. Bilmeıtin adamdarǵa jeke málimetterdi bermegen jón», - deıdi Petropavl qalalyq sotynyń tóraǵasy.