Banknottarda beder týdyratyn arnaıy mór bar.
Ulttyq bank ókili banknottyń túsi anyq jáne kontrastyly bolýy tıis, sý tańbasy men nomınaldyń sıfrlyq beınesin kórý úshin banknotty jaryqqa baǵyttap kórý qajet ekenin aıtty, dep habarlaıdy Almaty-akshamy.kz
Onyń aıtýynsha,jalǵan aqsha jasaýshylar 2000, 5000 jáne 10 000 teńgelik nomınaldardy kóp jasaıdy.
«2022 jyldyń İ jartyjyldyǵynda Qazaqstan Ulttyq banki men ekinshi deńgeıli bankter 408 150 teńgeniń qoldan jasalǵan 139 aqsha belgisin (136 banknot pen 3 moneta) anyqtady. Bul 2021 jyldyń osy kezeńimen salystyrǵanda 41 paıyzǵa az kórsetkish (340 jalǵan aqsha belgisi). Jalǵan banknottardyń kóp bóligi Almatyda - 68 dana (jalpy kólemniń 51 paıyzy), Nur-Sultan qalasynda - 16 dana jáne Shyǵys Qazaqstan oblysynda 29 dana anyqtaldy», - delingen habarlamada.
Qazaqstan Ulttyq bankiniń ókili túpnusqa banknottardy qoldan jasalǵan aqshadan ajyratýǵa kómektesetin qarapaıym qaǵıdalardyń bar ekenin eske saldy. Banknottarda beder týdyratyn arnaıy mór bar.
«Sol sıaqty barlyq banknottarda kórý qabileti nashar adamdarǵa arnalǵan, qolmen ustaǵanda jaqsy bilinetin dóńes tárizdi joǵary bederli element túrindegi belgiler bar. Banknottyń túsi anyq jáne kontrastyly bolýǵa tıis, sý tańbasy men nomınaldyń sıfrlyq beınesin kórý úshin banknotty jaryqqa baǵyttap kórý qajet», - dep tolyqtyrdy.
Banknot betindegi jazýlary bar tutas jip tárizdes, jaryqta anyq kórinetin jazýlar bar úzik syzyq túrindegi tutas magnıttik jáne súńgýir jipke de nazar aýdarǵan jón.
«Nomınaly 1 000, 2 000, 5 000, 10 000 jáne 20 000 teńgelik banknottarda túrli-tústi boıaýmen salynǵan sýret túrindegi beıneler bar. Banknottyń kólbeý buryshy ózgergen kezde beınelerdiń túsi jasyldan altyn túske deıin ózgeredi», - dedi Ulttyq bank ókili.
