Aıyppul mólsheri 16 mln teńge shamasynda bolmaq.
Jyl basynan beri osyndaı áreketi úshin qylmystyq jaýapkershilikke tartylǵan 28 adamnyń 8-i bas bostandyǵynan aıyryldy, dep habarlaıdy Almaty-akshamy.kz
Olardyń arasynda kámelet jasyna tolmaǵan balalar, tipti 1-synyp oqýshysy da bar.
Bıyl 111 adam memlekettik mekeme men kásiporyndarǵa jarylǵysh zat qoıyldy dep qońyraý shalyp, hat jibergen. Al polıseıler jalǵan aqparat úshin qylmystyq jaýapkershilik qarastyrylǵanyn eskertedi.
Jalǵan aqparat taratýshylardyń arasynda kámelet jasyna tolmaǵan balalar, tipti 1-synyp oqýshysy da bar.
Mamandardyń aıtýynsha, jarylǵysh zat týraly habarlama kóbinde erikken, ishi pysqan, mas adamdardan túsedi. Olar mundaı qadamǵa kek alý, buzaqylyq, mekemeniń jumysyna kedergi keltirý, mekteptegi sabaqty boldyrmaý jáne quqyq qorǵaý organdarynyń jumysyn tekserý úshin barady eken.
«Sońǵy 3 aıda «bomba qoıyldy» degen aqparattan soń Almaty, Aqtóbe, Pavlodar oblysyndaǵy mektepterde sabaq ýaqytsha toqtatyldy. Bir jaǵdaıda jalǵan habarlamany kámelet jasyna tolmaǵan bala bergen. Onyń ata-anasyna 10 aılyq eseptik kórsetkish mólsherinde ákimshilik aıyppul salyndy. Osyǵan deıin bolǵan barlyq jaǵdaıda jarylǵysh zattar týraly aqparat rastalǵan emes. Bizdiń esepteýimizshe, osyndaı jalǵan shaqyrtý boıynsha bir ret shyqqanda 200-300 myń teńgege deıin jumsalady. Al iri kásiporyndardyń jumysy toqtap qalǵanda, ár saǵat saıyn mıllıondaǵan teńge zıan keledi», - dedi İİM Ekstremızmge qarsy is-qımyl departamenti basqarma bastyǵynyń orynbasary Almas Talqanbaev.
Bul rette ol jalǵan aqparat úshin 16 mıllıon teńgege deıin aıyppul salynatynyn eskertip otyr. Sondaı-aq mundaı qylmystyq iske barǵandardy 5 jylǵa bas bostandyǵynan aıyrý jazasy da qarastyrylǵan.