Pavlodar oblysynda jalǵan aqparat bergen jasóspirimniń ata-anasy jaýapqa tartyldy, dep habarlaıdy aqshamnews.kz
«102» arnasyna qobaljyǵan daýyspen habarlasqan qyz birneshe mınýt buryn 13 jastaǵy baýyry qońyraý shalyp, «belgisiz adamdar ony qara jıppen alyp ketip, uryp-soǵyp jatyr» dep aıtqan. Osydan keıin onyń telefony óship qalǵan.
Jasóspirimniń týystary onyń jattyǵýǵa barýy kerek ekenin aıtqan. Quqyq qorǵaý organdary jaǵdaıdyń kúrdeliligin túsinip, dereý Atameken kentine bardy. Tez arada izdestirý sharalary uıymdastyrylyp, týystarymen, kórshilerimen jáne kent turǵyndarymen suhbat júrgizildi.
Biraz ýaqyttan keıin kámeletke tolmaǵan bala úıge aýla arqyly kirip kelgende, polısıa men ata-analardy ań-tań qaldyrdy. Jasóspirimniń aıtýynsha, ol ishiniń pysyp, ata-anasy men ápkesin aldaý úshin ózin «urlady» degen jalǵan aqparat oılap tapqan.
Oqıǵaǵa baılanysty jasóspirimniń ata-anasyna 30 AEK kóleminde aıyppul salyndy. Polısıa departamentiniń ókili:
– Bul oqıǵa men jaza jasóspirim men onyń otbasy úshin mańyzdy sabaq bolady dep úmittenemiz. Mundaı jalǵan qońyraýlar tek qorqynysh týdyryp qana qoımaı, qyzmetterdiń jumysyn qıyndatyp, shynaıy kómek qajet etetin adamdarǵa kedergi keltirýi múmkin, – dep atap ótti.
Quqyq qorǵaý organdary azamattardy jalǵan qońyraý shalyp, qyzmetterdi aldaýdan saqtanýǵa shaqyrdy. Mundaı ázilder jedel járdem resýrstaryna qaýip tóndirip, qoǵamdyq tártipti saqtaýǵa keri áserin tıgizedi. Zań buzýshylyqtarǵa eshkimniń kóz jumýyna jol berilmeıdi, sebebi «zań jáne tártip» qaǵıdasy azamattardyń qaýipsizdigi úshin basty negiz bolyp tabylady.