Qazaqstannyń Tótenshe jaǵdaılar mınıstri, general-maıor Shyńǵys Árinov Almatyǵa jumys sapary barysynda «Qazseldenqorǵaý» memlekettik mekemesiniń Almaty fılıalynda boldy, dep habarlaıdy aqshamnews.kz
Mınıstr mekemeniń qyzmetimen tanysyp, birqatar nysandardy, sonyń ishinde ortalyq dıspecherlik pýnktti, avtomobılder men arnaıy tehnıkalardyń jaǵdaıyn tekserdi. Sapar aıasynda Shyńǵys Árinov «Qazseldenqorǵaý» qyzmetkerlerimen birge kóshkin jaǵdaıyna monıtorıń júrgizip, aerovızýaldy barlaý uıymdastyrdy. Bul shara barysynda qar kóshkinderiniń aldyn alý úshin ornatylǵan jańa jabdyqqa erekshe nazar aýdaryldy.
Mınıstrge «DaisyBell» mobıldi qar kóshkinine qarsy júıesi tanystyrylyp, synaqtan ótti. Bul qondyrǵy tikushaqqa kabel arqyly bekitilgen metal konýs bolyp tabylady. Onyń jumys prınsıpi – konýstaǵy azot-sýtegi qospasyn qashyqtan jarý arqyly qar kóshkininiń tıimdi túsýin qamtamasyz etý. Atalǵan júıe Eýropa elderinde, sonyń ishinde Reseıde keńinen qoldanylyp keledi jáne jergilikti klımattyq jaǵdaılarda onyń tıimdiligin baǵalaý úshin Qazaqstanda synaqtan ótýde.
«Qazavıaqutqarý» AQ tikushaǵy arqyly júrgizilgen barlaý kezinde «DaisyBell» júıesi Úlken jáne Kishi Almaty ózenderiniń kóshkin qaýpi bar aımaqtarynda qar kóshkinderin aldyn alý sharalarynda qoldanyldy. Shyńǵys Árinov jańa tehnologıalardy qar kóshkininiń aldyn alý jumystarynda belsendi qoldaný qajettigin atap ótip, tıisti tapsyrmalar berdi.
Qazaqstanda qar kóshkini – adamdardyń ómirine qaýip tóndiretin eń qaýipti tabıǵı qubylystardyń biri. Elimizde kóshkin qaýpi bar 619 ýchaske bar, onyń 165-i Almaty qalasynda ornalasqan. Jyl saıyn «Qazseldenqorǵaý» shamamen 150 profılaktıkalyq qar kóshkinin túsirýdi júzege asyrady. 2024-2025 jyldardaǵy qysqy maýsymda 15 profılaktıkalyq túsirý júrgizilip, jalpy kólemi 6665 m³ qar shyǵarylǵan.
«Qazgıdromet» RMK málimeti boıynsha, 2025 jyldyń qańtar jáne aqpan aılarynda taýly aımaqtarda joǵary temperatýra men mol jaýyn-shashyn bolýy múmkin, bul qar kóshkinderiniń qaýpin arttyrady. Osy jaǵdaıdy eskere otyryp, kóshkinderdiń aldyn alý jumystary jalǵasýda.