Turǵyndarǵa qyzmet kórsetý sapasyn jaqsartý jáne jaılylyǵyn arttyrý úshin qoǵamdyq kólik parki únemi jańartylyp otyrady, dep habarlaıdy Almaty-akshamy.kz.
Sondaı-aq qala ákimi E.Dosaev Medeý aýdany turǵyndarymen kezdesýinde turǵyndarǵa qyzmet kórsetetin 22 marshrýttaǵy jyljymaly quramdardyń jańartylatynyn jetkizdi.
«Sizderdiń aýdandaryńyz jol qozǵalysy qarqyndy, halyq tyǵyz ornalasqan aýdandardyń biri bolyp tabylady. Qala ákimdigi qoǵamdyq qaýipsizdikti qamtamasyz etý úshin keshendi jumystar júrgizýde. I-shi toqsanda Medeý aýdanynda 57 «Sergek» aparattyq-baǵdarlamalyq kesheni (290 kamera) ornatyldy. Aýdanda beınemonıtorıng júıeleri jelisiniń jobasyn keńeıtý sheńberinde III-shi toqsanda 750 jańa beınekamera ornatý jumystary bastalady», -dedi qala ákimi.