Almatyda qala kóriktendirý men kógaldandyrý jumystaryna bólinetin qarajat 2024 jylǵy 121,6 mlrd teńgeden 2025 jyly 170,5 mlrd teńgege deıin 40%-ǵa kóbeıedi. Bul týraly Ortalyq komýnıkasıalar qyzmetinde ótken brıfıńte Almaty qalasynyń ákimi Erbolat Dosaev málimdedi, dep habarlaıdy aqshamnews.kz
«Kóriktendirý men kógaldandyrý – jaıly qalalyq orta qurý men turǵyndardyń ómir sapasyn arttyrýdyń negizgi quramdas bólikteri. Osyǵan baılanysty Memleket basshysy bastamashylyq etken «Taza Qazaqstan» aksıasy ekologıany jaqsartýǵa jáne qorshaǵan ortaǵa uqypty qaraýǵa baǵyttalǵan», – dedi Erbolat Dosaev.
2023 jyldyń qańtar aıynan bastap Almaty ákimdigi jańa jasyl jelekterdi qorǵaý jáne kútý erejelerin engizýdi belsendi túrde qolǵa aldy. Al bıylǵy shilde aıynda jaıly qalalyq ortany qamtamasyz etý maqsatynda Almaty qalasyn kóriktendirýdiń jańa erejeleri qabyldandy.
Aıta keteıik, jańa kóriktendirý erejeleri «Taza Qazaqstan» respýblıkalyq aksıasynyń ıdeıasyna negizdelgen jáne eldi mekenderdiń aýmaǵyn kóriktendirýdiń respýblıkalyq úlgilik erejelerine sáıkes ázirlengen.
Jasyl ekpelerdi qorǵaý jáne kútý erejeleri Memleket basshysynyń Almatyda jańa rekreasıalyq aımaqtar qurý jáne kógaldandyrý jónindegi tapsyrmasyn oryndaý aıasynda qabyldandy. Bul rette, jańa kóshetterge qoıylatyn talaptar kúsheıtilip, jasyl ekpelerdi kútý jáne qorǵaý normalary arttyryldy, sondaı-aq sýarý júıesin ornatý mindetti bolyp bekitildi. Jyl saıyn qalada 320 myń aǵash pen buta otyrǵyzý josparlanýda. 2023-2024 jyldary 500 shaqyrym avtosýarý jáne tamshylatyp sýarý jelileri ornatyldy. Al 2025 jyly taǵy 290 shaqyrym jeli ornatylyp, mıllıonnan astam aǵashty avtosýarý júıesimen qamtý josparlanǵan.
Esterińizge sala keteıik, Almatyda aýlalardy keshendi kútip ustaýǵa arnalǵan úsh jyldyq kelisimsharttar engizilgen. Olar sanıtarlyq tazartý, kóriktendirý elementterin jóndeý jáne jasyl aımaqtardy kútý jumystaryn qamtıdy. Sonymen qatar, magıstraldyq kósheler boıyndaǵy úılerdiń qasbetin jóndeýge qatysty tásilder qaıta qaraldy.